कोलकातानगरम्, ९ मे-मासः (हि.स.)। प्रायः सार्ध-पञ्च-दशकानन्तरं पश्चिम-बङ्गालस्य सत्ता पुनः पूर्व-मेदिनीपुर-जनपदस्य एकस्य सुपुत्रस्य हस्ते आगता। भारतीय-जनता-दलस्य नेता शुभेन्दु-अधिकारी राज्यस्य मुख्यमन्त्री घोषितः इति अनन्तरं राजनैतिक-वृत्तेषु एका रोचका ऐतिहासिकी समानता चर्चायाम् आगता।

प्रायः ५९ वर्षेभ्यः पूर्वं पूर्व-मेदिनीपुरस्य एव नेता अजय-कुमार-मुखर्जी तामलुक-आरमबाग इत्युभय-विधानसभा-स्थानयोः निर्वाचनं विजित्य राज्यस्य सत्तां स्वीकृतवान्। तस्मिन् काले तेन तामलुक-क्षेत्रे भाकपा-दलस्य प्रत्याशी विश्वनाथ-मुखर्जी पराजितः, आरमबाग-क्षेत्रे च तत्कालीनः मुख्यमन्त्री प्रफुल्ल-चन्द्र-सेन पराजितः आसीत्।

अधुना प्रायः तादृशी एव स्थिति पुनः दृष्टा। अस्मिन् वारे शुभेन्दु-अधिकारी भवानीपुर-नन्दीग्राम इत्युभय-स्थानयोः निर्वाचनं कृतवान् तथा उभयत्र विजयम् अलभत। भवानीपुर-क्षेत्रे तेन तृणमूल्-काङ्ग्रेस्-दलस्य प्रत्याशिनी तत्कालीना मुख्यमन्त्री ममता-बनर्जी पराजिता। एतस्मात् कारणात् अनेके जनाः एतां इतिहासस्य रोचक-समानता इति कथयन्ति।

इतिहासः दर्शयति यत् अजय-कुमार-मुखर्जी पूर्वं बिधान-चन्द्र-रायस्य मन्त्रिपरिषदः त्रिवारं मन्त्री आसीत्। पश्चात् तेन काङ्ग्रेस-दलं त्यक्त्वा ‘बङ्गला-काङ्ग्रेस’ इति नाम्ना नूतन-दलस्य स्थापना कृता तथा १९६७ तमे वर्षे निर्वाचनं विजित्य संयुक्त-मोर्चा-सर्वकारस्य प्रथमः मुख्यमन्त्री अभवत्। किन्तु तस्य सर्वकारस्य कार्यकालः दीर्घकालं यावत् न स्थिरः अभवत् तथा कतिपय-मासेषु एव पतितः। अनन्तरं सः पुनरपि मुख्यमन्त्री अभवत्, किन्तु तदा अपि तस्य कार्यकालः लघुः एव आसीत्।

राजनैतिक-संघर्षस्य विषयेऽपि उभयोः नेतृयोः मध्ये अनेकाः समानताः कथ्यन्ते। शुभेन्दु-अधिकारी २०२० तमे वर्षे ममता-बैनर्जी-सर्वकारात् त्यागपत्रं दत्त्वा भारतीय-जनता-पक्षे सम्मिलितः तथा सर्वेभ्यः सर्वकारीय-पदेभ्यः अपि त्यागपत्रं दत्तवान्। २०२१ तमे वर्षे विधानसभानिर्वाचने नन्दीग्राम-स्थानात् तेन ममता-बैनर्जी पराजिता तथा महान् राजनैतिक-सन्देशः प्रदत्तः।

गत-पञ्च-वर्षेषु तेन राज्यस्य प्रायः सर्वेषु जनपदेषु भाजपा-सङ्घटनस्य सुदृढीकरणस्य कार्यं कृतम्। अधुना तस्यैव राजनैतिक-परिश्रमस्य परिणामः इति मन्यते यत् सः राज्यस्य मुख्यमन्त्री चयनितः।

------

हिन्दुस्थान समाचार / अंशु गुप्ता