अनूपपुरम्, 01 जूनमासः (हि.स.)।

मध्य-प्रदेशस्य अनूपपुर-जनपदे जनगणनायाः-२०२७ प्रथम-चरणस्य क्षेत्रीय-कार्यं ३० मे-दिनाङ्के सफलतापूर्वकं सम्पन्नं कृतम् अस्ति। भारत-सर्वकारेण अधिसूचितानां ३३ प्रश्नानां माध्यमेन जनपदस्य प्रत्येकस्मिन् ग्रामे नगरीय-क्षेत्रे च प्रगणकैः गृहात् गृहं गत्वा गृहाणां स्थितेः, उपलब्ध-मूलभूत-सुविधानां परिसम्पत्तीनां च सम्बन्धिनी सूचना मोबाइल्-एप्-माध्यमेन डिजिटल-रूपेण सङ्गृहीता। अस्य व्यापक-राष्ट्रियाभियानस्य सतत-निगरानी पटलमाध्यमेन कृता, येन कार्यस्य गुणवत्ता, पारदर्शिता समयबद्धता च सुनिश्चिताः अभवन्।

सोमवासरे कलेक्टरः प्रमुख-जनगणना-अधिकारी च हर्षल-पंचोली अवदत् यत् जनगणना-२०२७ इत्यस्य अस्य प्रथम-चरणस्य समय-सीमायां दोषरहित-रूपेण च सम्पन्नतायै जनपदः १४ चार्ज-क्षेत्रेषु विभक्तः आसीत्। अस्य महा-अभियानस्य भूमिस्थ-स्तरे सफलतायै जनपदे ११९५ प्रगणकाः तथा १९८ पर्यवेक्षकाः नियुक्ताः आसन्। सर्वे १३९३ प्रगणकाः पर्यवेक्षकाः च क्षेत्रीय-स्तरे उत्कृष्ट-समन्वयेन तत्परतया च स्व-दायित्वानां निर्वहनं कृतवन्तः, यस्य परिणामस्वरूपं जनपद-स्तरे एतत् महत्त्वपूर्णं प्रशासनिक-कार्यं सुगमतया सम्पन्नं जातम्।

उल्लेखनीयं यत् अस्मिन् वारे डिजिटल-जनगणनायाः अन्तर्गतं नागरिकेभ्यः स्व-गणनायाः विशेष-अवसरः अपि प्रदत्तः आसीत्। क्षेत्रीय-कार्यस्य आरम्भात् पूर्वं १६ एप्रिल्-तिथेः ३० एप्रिल् २०२६ पर्यन्तं सञ्चालितायां अस्यां प्रक्रियायां जनपदस्य नागरिकाः उत्साहपूर्वकं सहभागितां कृतवन्तः। सञ्चालितस्य जागरूकता-अभियानस्य सकारात्मक-परिणामस्वरूपम् अनूपपुर-जनपदस्य ९९०० परिवाराः उत्साहेन सहभागितां कृत्वा स्वीयां सूचनां स्वयमेव ऑनलाइन-माध्यमेन अभिलेखितवन्तः, यत् नागरिक-सहभागितायाः उत्कृष्टम् उदाहरणम् अस्ति।

जिलाधिकारी जनपदस्य नागरिकान् आश्वासयन् अवदत् यत् जनगणना-प्रक्रियायाः वैधानिक-प्रावधानानां अन्तर्गतं अस्मिन् समये सङ्गृहीताः सर्वाः वैयक्तिक-सूचनाः जनगणना-अधिनियमः १९४८ तथा जनगणना-नियमावली १९९० इत्यस्य नियमानुसारं पूर्णतया गोपनीयाः भविष्यन्ति। एतेषाम् आँकडानां उपयोगः कस्यचित् वैयक्तिक-विवरणरूपेण न भविष्यति, अपितु केवलं भविष्यस्य जनकल्याणकारी-योजनानां, नीति-निर्माणस्य विकास-कार्यक्रमाणां च प्रभावी-क्रियान्वयनाय भविष्यति। तेन सूचना प्रदत्ता यत् जनगणना-२०२७ इत्यस्य द्वितीय-चरणस्य अन्तर्गतं वास्तविक-जनसङ्ख्यायाः गणनाकार्यं फेब्रुवरी २०२७ मासे सम्पन्नं भविष्यति।

जनगणनायाः प्रथम-चरणस्य सफल-समयबद्ध-सम्पादनस्य उपलक्ष्ये जिलाधिकारी हर्षल-पंचोली जनपदस्य सर्वेषां नागरिकानां, जनप्रतिनिधीनां, प्रशासनिक-अधिकारीणां, क्षेत्रीय-कर्मचारिणां तथा मुद्रित-, इलेक्ट्रॉनिक्- डिजिटल्-माध्यमानां प्रतिनिधीनां प्रति कृतज्ञतां व्यक्तवान्।

Hindusthan Samachar / Dheeraj Maithani