प्रयागराज-जनपदः, १ जूनमासः (हि.स.)। उत्तरप्रदेश-माध्यमिक-शिक्षा-परिषदः (यूपी-बोर्ड) परीक्षायाः २०२६ वर्षस्य परिणामेषु प्रदेशीय-श्रेष्ठता-सूच्याः शीर्ष-दश-स्थानप्राप्तेषु प्रयागराज-जनपदस्य पञ्च मेधाविनः छात्राः लखनऊ-स्थिते लोक-भवने मुख्यमन्त्रिणा योगी-आदित्यनाथेन एक-लक्ष-रूप्यक-पुरस्कारैः, टैबलेट-यन्त्रैः, प्रशस्ति-पत्रैः तथा पदकैः सम्मानिताः। लखनऊ-नगरे आयोजितस्य अस्य कार्यक्रमस्य सजीव-प्रसारणं जनपदे कलक्ट्रेट-स्थिते संगम-सभागारे प्रदर्शितम्।

संगम-सभागारे आयोजिते कार्यक्रमे जनपदस्य श्रेष्ठता-सूच्यां शीर्ष-दश-स्थानेषु स्थितान् पञ्चदश मेधाविनः छात्रान् छात्राश्च मुख्यातिथिना महापौरेण गणेश-केसरवाणिना, विधान-परिषद्-सदस्येन सुरेन्द्र-चौधरिणा, जनपदाधिकारिणा मनीष-कुमार-वर्मणा तथा मुख्य-विकास-अधिकारिण्या हर्षिका-सिंहेन एकविंशति-सहस्र-रूप्यक-मूल्यस्य धनादेशः, प्रशस्ति-पत्रं पदकं च प्रदाय सम्मानिताः।

मुख्यातिथिः महापौरः गणेश-केसरवाणी उच्च-माध्यमिक-तथा माध्यमिक-परीक्षायां २०२६ वर्षे उत्कृष्ट-प्रदर्शनं कृतवन्तः सर्वान् मेधाविनः विद्यार्थिनः अभिनन्द्य तेषां उज्ज्वल-भविष्याय शुभकामनाः प्रदत्तवान्। सः विद्यार्थिनां परिश्रमस्य, अनुशासनस्य तथा सफलतायाः प्रशंसां कृत्वा अवदत् यत् एषः दिवसः जीवनपर्यन्तं स्मरणीयः भविष्यति।

सः विद्यार्थिभ्यः उक्तवान्—“भवतां जीवनं केवलं स्वकीयम् एव नास्ति, अपितु समाजस्य पूञ्जी तथा राष्ट्रस्य सम्पत्तिः अस्ति। अतः एतेन भावेन अग्रे गन्तव्यम्।” तेन उक्तं यत् भविष्ये अधिक-बृहत्-सफलताः प्राप्तुं अद्यतः चतुर्गुणितः परिश्रमः करणीयः। लक्ष्यं निश्चित्य तस्य प्राप्त्यर्थं दृढः संकल्पः धारयितव्यः। युवा-वंशस्य उपलब्धयः एव राष्ट्रस्य सशक्त-विकसित-भविष्यस्य आधारशिला: भवन्ति।

महापौरेण अस्मिन् अवसरे विद्यार्थिनां सह तेषाम् अभिभावकानां गुरूणां च अभिनन्दनं कृतम्। तेन मेधाविनः प्रेरयन् उक्तं यत् अतीतं नावलोकनीयम्, अपितु अग्रिमासु परीक्षासु अपि प्रदेशस्य शीर्ष-दश-स्थानेषु स्थानं सुनिश्चितं करणीयम्। अन्तर-माध्यमिक-वर्गस्य विद्यार्थिनः स्वलक्ष्यं निश्चित्य दृढ-संकल्पेन कठिन-परिश्रमं कुर्वन्तु इति तेन प्रेरितम्।

जनपदाधिकारी मनीष-कुमार-वर्मा अपि सर्वान् मेधाविनः अभिनन्द्य अवदत् यत् एषा प्रारम्भिक-सफलता अन्तिमा सफलता न मननीया। एष: केवलं जीवनस्य शुभारम्भः अस्ति, या स्वप्रतिभायां आत्मविश्वासं वर्धयति। तेन उक्तं यत् जीवने सफलतायै केवलं प्रतिभा पर्याप्ता नास्ति, अपितु निश्चित-लक्ष्यं, तस्य प्रति निष्ठा तथा निरन्तरं कठिन-परिश्रमम् आवश्यकम्।

सः अवदत् यत् सफलता तस्मै एव लभते यः निरन्तरं परिश्रमं करोति। कदाचित् कठिन-परिश्रमेऽपि असफलता प्राप्तुं शक्यते, किन्तु तया निरुत्साहितः न भूत्वा लक्ष्य-प्राप्तये प्रयत्नः अविरतं करणीयः। दृढविश्वासेन एकस्मिन् दिने सफलता अवश्यं प्राप्स्यते। सफलतायाः अनन्तरं परिवारं समाजं च न विस्मर्तव्यम्, तान् प्रति उत्तरदायित्वं निर्वोढव्यम्।

जिला-विद्यालय-निरीक्षकः पी.एन.सिंहः अवदत् यत् माध्यमिक-तथा उच्च-माध्यमिक-परीक्षयोः जनपदस्य परिणामः राज्यस्य प्रतिशत-परिणामात् अधिकः आसीत्। महापौरस्य आगमनं तस्य प्रेरणादायकं मार्गदर्शकं च भाषणं मेधाविनां विद्यार्थिनां कृते अत्यन्तं लाभप्रदम् इति तेन उक्तम्।

मुख्य-विकास-अधिकारिणी हर्षिका-सिंहः जिला-विद्यालय-निरीक्षकं तस्य दलं च अभिनन्द्य अवदत् यत् एतादृशैः कार्यक्रमैः विद्यार्थिनां उत्साहवर्धनं भवति तथा स्वस्थ-प्रतिस्पर्धया ते नूतन-उच्चताः प्राप्तुं प्रेर्यन्ते।

कार्यक्रमस्य सञ्चालनं डॉ.प्रभाकर-त्रिपाठिना कृतम् तथा धन्यवाद-ज्ञापनं सह-जिला-विद्यालय-निरीक्षकेण विजय-सिंह-यादवेन सम्पन्नम्। अस्मिन् अवसरे मेधावि-विद्यार्थिनां प्रधानाचार्याः, शिक्षकाः तथा अन्ये गणमान्याः जनाः अपि उपस्थिताः आसन्।

Hindusthan Samachar / Divya Ranjan