Enter your Email Address to subscribe to our newsletters
पूर्वी सिंहभूमः, 10 जूनमासः (हि.स.)।राज्यपाल सन्तोष कुमार गंगवारः उक्तवान् यत् कस्यापि समाजस्य राष्ट्रस्य च महत्तमा सम्पत्तिः तस्य युवाप्रतिभाः भवन्ति। शिक्षिताः संस्कारिताः उत्तरदायित्वसम्पन्नाश्च युवानः एव राष्ट्रस्य प्रगतेः वास्तविकाः आधाराः सन्ति। सः अवदत् यत् शिक्षायाः उद्देश्यं केवलं जीविकाप्राप्तिः न अस्ति, अपितु व्यक्तित्वस्य चरित्रस्य च निर्माणं, सामाजिकचेतनायाः विकासः तथा राष्ट्रस्य प्रति उत्तरदायित्वभावनायाः उत्पत्तिः अपि अस्ति।
राज्यपालः बुधवासरे पूर्वी सिंहभूम जिलस्य बहरागोड़ा स्थिते देव वाटिका स्थले आयोजिते प्रतिभा सम्मान समारोह २०२६ कार्यक्रमे सम्बोधनं कुर्वन् आसीत्। अस्मिन् अवसरे तेन मैट्रिक तथा इण्टरमीडिएट परीक्षयोः उत्कृष्टप्रदर्शनं कृतवन्तः विद्यार्थिनः सम्मानिताः तथा तेषां उज्ज्वलभविष्यस्य कामना कृता।
राज्यपालः अवदत् यत् प्रतिभा कस्यचित् नगरस्य वा विशालसंस्थायाः वा अधीना न भवति। ग्रामीणक्षेत्रेषु अपि असीमाः सम्भावनाः प्रतिभाश्च विद्यमानाः सन्ति। आवश्यकता केवलं तासां कृते सम्यक् अवसरस्य, मार्गदर्शनस्य तथा प्रोत्साहनस्य उपलब्धिकरणस्य अस्ति। सः अवदत् यत् एते सम्मानसमारोहाः न केवलं मेधाविनां विद्यार्थिनां उत्साहं वर्धयन्ति, अपितु अन्येषां छात्राणाम् अपि प्रेरणायाः माध्यमं भवन्ति।
सन्तोष कुमार गंगवार विद्यार्थिभ्यः जीवने महान् लक्ष्याणि निर्धारितुं तानि प्राप्तुं च निरन्तरं परिश्रमं कर्तुम् आह्वानं कृतवान्। सः अवदत् यत् सफलता केवलं उपलब्धिभिः न मीयते, अपितु एतेन निर्धार्यते यत् व्यक्तिः कियत् संवेदनशीलः संस्कारितः मानवतापूर्णः च अस्ति। अतः सफलः मानवः भवितुं सह उत्तमः मानवः भवितुम् अपि समानेन महत्त्वेन आवश्यकम् अस्ति।
सः विद्यार्थिभ्यः विनयम् अनुशासनम् संस्कारान् मानवीयमूल्यानि च जीवनस्य आधारं कर्तुम् उपदिशन् अवदत् यत् स्वप्रतिभायाः ज्ञानस्य च उपयोगः केवलं व्यक्तिगत उन्नतेः कृते न कर्तव्यः, अपितु समाजस्य राष्ट्रस्य च कल्याणाय अपि करणीयः। राज्यपालः विश्वासं व्यक्तवान् यत् झारखण्डस्य युवा सन्ततिः स्वस्य परिश्रमेण प्रतिभया संस्कारैः च केवलं स्वपरिवारस्य क्षेत्रस्य च न, अपितु सम्पूर्णस्य राज्यस्य देशस्य च यशः प्रसारयिष्यति।
कार्यक्रमस्य अनन्तरं राज्यपालः प्रतिभासम्पन्नैः विद्यार्थिभिः सह भोजनम् अकरोत् तथा तैः सह संवादं कृत्वा तेषाम् उत्साहवर्धनम् अकरोत्। अस्मिन् काले सः विद्यार्थिनां स्वप्नानां, व्यावसायिकलक्ष्याणां तथा भविष्ययोजनानां विषये सूचना प्राप्तवान् तथा तान् निरन्तरं अग्रे गन्तुं स्वलक्ष्याणि प्राप्तुं च प्रेरितवान्।
---------------