बेंगलुरुः, 10 जूनमासः (हि.स.)। प्रधानमन्त्रिणः नरेन्द्र मोदिनो देशस्य शासनभारं वहतः द्वादशवर्षाणां पूर्णतायाः अवसर उपलक्ष्य कर्नाटकस्य विभिन्नप्रदेशेषु भारतीयजनता पक्षस्य नेतृभिः कार्यकर्तृभिः च विशेषपूजार्चनायाः आयोजनं कृतम्। अस्मिन् अवसरे प्रधानमन्त्रिणः मोदिनः उत्तमस्वास्थ्याय दीर्घायुषे तथा देशस्य निरन्तरविकासाय समृद्धये च प्रार्थनाः कृताः।

बेङ्गलुरुनगरस्य विजयनगरस्थे आरपीसी लेआउट क्षेत्रे सङ्कटहर गणपति मन्दिरे रेलराज्यमन्त्री वी सोमन्ना इत्यनेन विशेषपूजार्चना कृता। अस्मिन् अवसरे तेन प्रधानमन्त्रिणः मोदी इत्यस्य नेतृत्वस्य प्रशंसा कृता तथा च तस्य स्वस्थदीर्घजीवनाय राष्ट्रस्य उन्नत्यै च शुभकामनाः व्यक्ताः। कार्यक्रमे विजयनगर गोविन्दराजनगर विधानसभाक्षेत्रयोः बहुसंख्यकाः भारतीयजनता पक्षस्य पदाधिकारीणः कार्यकर्तारः च सम्मिलिताः।

पूजार्चनानन्तरं माध्यमैः सह संवादं कुर्वन् वी सोमन्ना उक्तवान् यत् प्रधानमन्त्रिणः मोदी इत्यस्य नेतृत्वे देशेन विकासे सुशासने वैश्विकप्रतिष्ठायां च उल्लेखनीयाः उपलब्धयः प्राप्ताः। तेन प्रधानमन्त्रिणः नेतृत्वं दूरदर्शि इति कथयित्वा तस्य योगदानस्य प्रशंसा कृता।

एवमेव विधानसौधपरिसरस्थे अरलिकट्टे मुनेश्वर मन्दिरे विधानसभायां विपक्षनेता आर अशोक इत्यनेन प्रधानमन्त्रिणः मोदी इत्यस्य कल्याणाय विशेषपूजा कारिता। अस्मिन् अवसरे विधायकः चन्नबसप्पा सहिताः अनेके भारतीयजनता पक्षस्य नेतारः समर्थकाः च उपस्थिताः आसन्।

कार्यक्रमस्य समये प्रधानमन्त्रिणः नरेन्द्र मोदी इत्यस्य चित्रस्य पुरतः विशेषपूजा कृता तथा च तस्य समर्थनार्थं जयघोषाः कृताः। भारतीयजनता पक्षस्य नेतारः एतत् ऐतिहासिकम् अवसरम् इति उक्तवन्तः तथा च प्रधानमन्त्रिणा मोदी इत्यनेन दीर्घकार्यकाले देशाय नूतना दिशा नूतना गति च प्रदत्ता इति कथितवन्तः।

तथैव भारतीयजनता पक्षस्य कर्नाटकप्रभारी डॉ राधामोहनदास अग्रवाल तथा विधानपरिषदि विपक्षनेता चलवाडी नारायणस्वामी इत्येताभ्यां शेषाद्रिपुरस्थे श्री रामलिङ्गेश्वर स्वामी मन्दिरे प्रधानमन्त्रिणः मोदी इत्यस्य नाम्ना विशेषपूजार्चना कारिता। पूजार्चनानन्तरम् उपस्थितजनानां मध्ये मिष्टान्नस्य वितरणं कृतम् तथा च प्रधानमन्त्रिणः नेतृत्वे देशस्य प्रगतये शुभकामनाः व्यक्ताः।

अन्यत्र गदगस्थे श्री वीरनारायण मन्दिरे अपि भारतीयजनता पक्षस्य पक्षतः विशेषधार्मिककार्यक्रमस्य आयोजनं कृतम्। प्रधानमन्त्रिणः मोदी इत्यस्य चतुःसहस्रत्रिशतनवनवतिनवदिनात्मकस्य ऐतिहासिककार्यकालस्य स्मरणं कृत्वा तस्य नेतृत्वाय उपलब्धिभ्यः च विशेषप्रार्थनाः कृताः। अस्मिन् धार्मिकानुष्ठाने राज्यस्य पूर्वमुख्यमन्त्री बसवराज बोम्मई, विधायकः सी सी पाटिल, विधानपरिषद्सदस्यः एस वी सङ्कनूर तथा भारतीयजनता पक्षस्य जिलाध्यक्षः राजू कुरडगी सहिताः बहुसंख्यकाः नेतारः कार्यकर्तारः च उपस्थिताः आसन्।

राज्यव्यापिनेषु एतेषु अनुष्ठानेषु भारतीयजनता पक्षस्य नेतारः कार्यकर्तारः च प्रधानमन्त्रिणः मोदी इत्यस्य नेतृत्वे भारतस्य निरन्तरप्रगतये आर्थिकसमृद्धये वैश्विकमञ्चे वर्धमानप्रतिष्ठायै च प्रार्थनाः कृतवन्तः। विभिन्नमन्दिरेषु आयोजितानां विशेषपूजार्चनानां माध्यमेन प्रधानमन्त्रिणः स्वस्थदीर्घसफलजीवनस्य कामना कृता तथा विकसितभारतस्य सङ्कल्पस्य अग्रे नयनस्य सन्देशः प्रदत्तः।

-------------

Hindusthan Samachar / Dheeraj Maithani