नवदेहली, १० जूनमासः (हि.स.)। भारतीयजनतापक्ष-नेतृत्वयुक्तस्य राष्ट्रिय-जनतान्त्रिक-गठबन्धनस्य महत्त्वपूर्णा सभा अद्य अपराह्णे त्रिवादने भारतमण्डपे आरभ्यते। अस्यां सभायां राजग-सर्वकारस्य विभिन्न-राज्यानां मुख्यमन्त्रिणः, उपमुख्यमन्त्रिणः तथा सहयोगि-दलानां नेतारः उपस्थिताः भविष्यन्ति।

आन्ध्रप्रदेशस्य मुख्यमन्त्री तथा तेलुगुदेशम्-पक्षस्य प्रमुखः एन. चन्द्रबाबूनायडुः सभायां नरेन्द्रमोदिनः सर्वाधिककालं निर्वाचित-प्रधानमन्त्रित्वस्य अभिलेखसम्बद्धम् अभिनन्दन-प्रस्तावं स्थापयिष्यति। अन्ये सहयोगि-दलानां नेतारः अपि अस्य प्रस्तावस्य समर्थनं करिष्यन्ति। सभायां प्रधानमन्त्री-नरेन्द्रमोदिनः अभिनन्दनं करिष्यते।

अस्मिन् प्रस्तावे प्रधानमन्त्रीणः गत-द्वादशवर्षीय-कार्यकालस्य प्रमुख-उपलब्धीनां उल्लेखः भविष्यति। तदतिरिक्तं सर्वकारस्य द्वादशवर्ष-पूर्णतायाः अवसरे उपलब्धीनां तथा अग्रिम-निर्वाचनानां विषये चर्चा अपि सम्भाव्यते। उल्लेखनीयं यत् नरेन्द्रमोदिनः नेतृत्वे राष्ट्रिय-जनतान्त्रिक-गठबन्धन-सर्वकारेण जूनमासे २०२६ तमे वर्षे द्वादशवर्षात्मकः ऐतिहासिकः कार्यकालः पूर्णीकृतः।

नरेन्द्रमोदी-महोदयः २६ मे २०१४ तमे वर्षे प्रथमवारं भारतस्य प्रधानमन्त्री-पदस्य शपथं गृहीतवान्। ततः परं ९ जून २०२४ तमे वर्षे सः निरन्तरं तृतीयवारम् अपि प्रधानमन्त्री-पदस्य शपथं गृहीतवान्। ९ जून २०२६ तमे वर्षे प्रधानमन्त्रीरूपेण तस्य ४,३९८ दिवसाः पूर्णाः अभवन्। एतेन सः स्वतन्त्र-भारते सर्वाधिककालं निर्वाचित-प्रधानमन्त्रिरूपेण कार्यं कृत्वा नूतनम् अभिलेखं स्थापितवान्।

विशेषतया सः भारतस्य प्रथम-प्रधानमन्त्रिणः पण्डित-जवाहरलाल-नेहरू-महोदयस्य अभिलेखम् अतिक्रम्य नूतनं कीर्तिमानं स्थापितवान्। नेहरू-महोदयः यद्यपि १५ अगस्त १९४७ तः २७ मे १९६४ पर्यन्तं ६,१३० दिवसान् प्रधानमन्त्रीरूपेण आसीत्, तथापि १९५२ तमे वर्षे प्रथम-सामान्य-निर्वाचने विजयम् प्राप्य निर्वाचित-प्रधानमन्त्रिरूपेण तस्य कार्यकालः ४,३९७ दिवसात्मकः आसीत्।

भारतीयजनतापक्षेण स्वस्य ‘एक्स’-माध्यमे “परिवर्तनस्य द्वादशवर्षाणि : प्रतिज्ञाभ्यः विकासपर्यन्तम्” इति उल्लासपूर्वकं प्रकाशितम्। पक्षेण उक्तं यत् अन्धकारात् प्रकाशं प्रति, अपक्व-गृहात् पक्व-गृहं प्रति, दूरस्थ-जलस्रोतसः गृहे नल-जलस्य प्राप्तिपर्यन्तं भारतेन गत-द्वादशवर्षेषु नूतना कथा लिखिता। एतत् केवलं योजनानां सङ्ख्यानां विवरणं न, अपितु कोटिशः भारतीयानां जीवने समागतस्य सकारात्मक-परिवर्तनस्य प्रतीकम् अस्ति।

पक्षेण एषः कालः सेवा-संकल्प-समृद्धीनां अद्वितीय-यात्रा इति वर्णितः। आधारभूत-सुविधानां—गृह, जल, स्वास्थ्य, आवास तथा स्वच्छ-ऊर्जा—विस्तारात् आरब्धा विकास-कथा अद्य कोटिशः भारतीयानां समृद्धेः आधारः अभवत्। एषा यात्रा केवलं शासकीय-योजनानां न, अपितु सामान्य-नागरिकाणां जीवने प्राप्तानां नव-अवसराणां तथा आत्मनिर्भर-भारतस्य उदयस्य प्रतीकः अस्ति।

प्रधानमन्त्रिणः अस्य उपलब्धेः उपलक्ष्ये श्रीलङ्कादेशस्य राष्ट्रपतिः अनुरा-कुमार-दिसानायके, पापुआ-न्यू-गिनी-देशस्य प्रधानमन्त्री जेम्स-मारापे, त्रिनिदाद-टोबैगो-देशस्य प्रधानमन्त्री कमला-प्रसाद-बिसेसर इत्यादयः अनेके राष्ट्राध्यक्षाः अभिनन्दन-सन्देशान् प्रेषितवन्तः।

पूर्वप्रधानमन्त्री एच.डी. देवेगौडा-महोदयः तथा आन्ध्रप्रदेशस्य मुख्यमन्त्री चन्द्रबाबूनायडुः अपि स्वलेखयोः प्रधानमन्त्रीणः लोकतान्त्रिक-दृष्टिकोणस्य विश्लेषणं कृतवन्तौ। देवेगौडा-महोदयेन उक्तं यत् मोदी-महोदयः देशस्य सर्वाधिककालं लोकतान्त्रिक-रीत्या निर्वाचितः प्रधानमन्त्री अभवत् तथा जवाहरलाल-नेहरू-महोदयस्य अभिलेखम् अतिक्रान्तवान्।

नायडु-महोदयेन स्वलेखे ‘राष्ट्रं सर्वोपरि’ तथा ‘सर्वेषां सहयोगः, सर्वेषां विकासः, सर्वेषां विश्वासः’ इति मन्त्रौ भारतस्य विकासस्य आधाररूपेण वर्णितौ। तेन उक्तं यत् प्रधानमन्त्री मोदी-महोदयेन भारतस्य सांस्कृतिक-वैभवं आधुनिक-प्रशासन-प्रौद्योगिकीभिः सह संयोज्य विकासस्य नूतनं प्रतिमानं प्रस्तुतम्।

तयोः नेतृभ्यां प्रतिपादितं यत् प्रधानमन्त्री मोदी-महोदयस्य द्वादशवर्षीयः कार्यकालः केवलं राजनैतिक-स्थैर्यस्य प्रतीकः न, अपितु आत्मनिर्भर-भारतस्य, प्रौद्योगिक-प्रगतिः, सामाजिक-समावेशनस्य तथा वैश्विक-मञ्चे भारतस्य वर्धमान-प्रतिष्ठायाः अपि प्रतिनिधित्वं करोति। एषः कालखण्डः भारतस्य आत्मविश्वासाय, आधुनिकतायै तथा वैश्विक-नेतृत्वाय नूतनां दिशां प्रदत्तवान्।

Hindusthan Samachar / Divya Ranjan