गुवाहाटीनगरम्, ११ जूनमासः (हि.स.)। असम-राज्यस्य गुवाहाटीनगरे ब्रह्मपुत्र-नद्याः उपरि निर्मिते कुमार-भास्कर-वर्म-सेतौ गुरुवासरे ‘प्रगति-पथ-यात्रा’ आयोजिता अभवत्। अस्मिन् कार्यक्रमे केन्द्रीय-जलशक्ति-मन्त्री सी.आर.पाटिलः, स्थानीय-विधायकः विजय-गुप्तः तथा बहुसङ्ख्याकाः भारतीयजनतापक्ष-कार्यकर्तारः भागं गृहीतवन्तः।

विदितं यत् विकसित-भारतस्य संकल्पं जन-जनपर्यन्तं नेतुं विविधाः प्रेरणादायक-कार्यक्रमाः अद्य आयोजिताः। तेषु केन्द्रीयमन्त्री सहितं समाजस्य सर्वेषां वर्गाणां जनाः उत्साहेन भागं स्वीकृतवन्तः।

कार्यक्रमस्य आरम्भे कुमार-भास्कर-वर्म-सेतौ आयोजितायाः ‘प्रगति-पथ-यात्रायाः’ प्रारम्भः अभवत्। यात्रायां उपस्थित-जनसमुदायस्य मध्ये प्रधानमन्त्री नरेन्द्रमोदिनः कुशल-नेतृत्वे विगतानां द्वादश-वर्षाणां मध्ये देशे सम्पन्नानां अभूतपूर्व-विकास-कार्याणां, आधारभूत-संरचनायां जातानां क्रान्तिकारी-परिवर्तनानां तथा जनकल्याणकारी-उपलब्धीनां विस्तरेण वर्णनं कृतम्।

तदनन्तरं उत्तर-गुवाहाटीनगरे स्थिते ऐतिहासिके श्री-दोल-गोविन्द-मन्दिर-परिसरे विशेष-कार्यक्रमः आयोजितः। तत्र पर्यावरण-संरक्षणस्य हरित-चेतनायाश्च संदेशं दत्त्वा वृक्षारोपणं कृतम्। अस्मिन् अवसरे ‘विकसित-भारत-संकल्प-सम्मेलनम्’ इति कार्यक्रमे स्थानीय-नागरिकैः तथा प्रबुद्धजनैः सह प्रत्यक्षसंवादः कृतः, यत्र देश-राज्ययोः विकासविषये विस्तृतचर्चा अभवत्।

एतस्यैव श्रृङ्खलायां विशेष-जनसंपर्क-अभियानः अपि सञ्चालितः। अस्मिन् अभियाने स्थानीयजनैः सह प्रत्यक्षं मिलित्वा तेषां मूल्यवान् विचाराः, प्रतिक्रियाः च प्राप्ताः।

असम-राज्यस्य निरन्तर-प्रगतिः, सुदृढा आधुनिकाधारभूत-संरचना, सर्ववर्गेषु दृश्यमानः जनभागीदारी-उत्साहः च एतस्य प्रमाणं यत् ‘विकसित-भारत’ इत्यस्य संकल्पः अधुना जन-आन्दोलनरूपं गृहीत्वा राष्ट्रं नवशक्तिं संप्रददाति।

Hindusthan Samachar / Divya Ranjan