गुवाहाटीनगरम्, ११ जूनमासः (हि.स.)। असम-नागालैण्ड-सीमा-प्रदेशे अपक्व-तैलस्य प्राकृतिक-वाते: च अन्वेषण-उत्पादनयोः गतिं दातुं केन्द्र-सर्वकारेण उभाभ्यां राज्याभ्यां सह एकं महत्त्वपूर्णं त्रिपक्षीय-सन्धि-पत्रं गुरुवासरे नवदेहल्यां सम्पन्नं भविष्यति।

अस्मिन् अवसरे केन्द्रीय-गृहमन्त्री अमितशाह: उपस्थितः भविष्यति। एषः कार्यक्रमः गृहमन्त्रालयस्य कार्यालये गुरुवासरे सायं प्रायः ६:३० वादने आयोज्यते।

अस्यां सभायां असम-राज्यस्य मुख्यमन्त्री डॉ.हिमन्त-बिस्व-सरमा, नागालैण्ड-राज्यस्य मुख्यमन्त्री नेफ्यू-रियो तथा केन्द्रीय-गृहसचिवः गोविन्द-मोहनेन सहिताः केन्द्र-उभय-राज्य-सर्वकारयोः वरिष्ठाः अधिकारिण: भागं गृह्णन्ति।

एषः सन्धि: असम-नागालैण्ड-सीमा-प्रदेशस्य तेषु संसाधन-समृद्धेषु क्षेत्रेषु तैल-वाति-अन्वेषणाय मार्गं प्रशस्तं करिष्यति, यानि दीर्घकालात् अन्तर-राज्य-सीमा-विवादानां कारणात् पूर्णतया विकसितानि न अभवन्। एतेन क्षेत्रे ऊर्जा-क्षेत्रस्य विकासाय नूतना गतिः भविष्यति इति अपेक्ष्यते।

एमओयू-अन्तर्गतं संयुक्त-अन्वेषण-उत्पादन-क्रियाणां कृते संस्थागत-नमूना निर्मीयते। तेन सह राजस्व-विभाजनम्, परियोजना-संचालनम् तथा सीमा-प्रदेशेषु विधि-व्यवस्था-पालनाय समन्वित-तन्त्रं च विकसितं भविष्यति।

केन्द्र-सर्वकारः इमं सन्धिं सहकारी-संघवादस्य दिशि एकं महत्त्वपूर्णं पदं मन्यते। अस्य माध्यमेन न केवलं ऊर्जा-संसाधनानां सम्यक् उपयोगः प्रवर्धिष्यते, अपि तु असम-नागालैण्ड-राज्ययोः दीर्घकालीन-सीमा-विवादानां न्यूनीकरणं, परस्पर-विश्वासस्य सहयोगस्य च सुदृढीकरणं भविष्यति इति अपेक्षा अस्ति।

Hindusthan Samachar / Divya Ranjan