Enter your Email Address to subscribe to our newsletters
नवदेहली, ११ जूनमासः (हि.स.)। केन्द्रीय-अन्वेषण-ब्यूरो-संस्थया साइबर-प्रवञ्चना-प्रकरणे वाञ्छितस्य पलायित-अभियुक्तस्य गणेश-बालासो-काले-इत्यस्य थाइलैण्डदेशात् प्रत्यर्पणे गुरुवासरे सफलता प्राप्ता। सः २४ मई-दिनाङ्के बैंकॉक-नगरे थाई-अधिकारिभिः निगृहीतः आसीत् तथा च विधिक-प्रक्रियाणां सम्पूर्णतायाः अनन्तरं १० जून-दिनाङ्के भारतदेशं प्रेषितः। सीबीआई-अधिकारिणः अभियुक्तेन सह अद्य मुम्बई-नगरम् प्राप्तवन्तः।
सीबीआई-संस्थया सूचितं यत् मुम्बई-नगरं प्राप्ते सति गणेश-बालासो-काले-महोदयः महाराष्ट्र-पुलिसस्य साइबर-प्रकोष्ठेन स्वाधीनतायां गृहीतः। तस्मिन् आरोपः अस्ति यत् सः अन्तर्जाल-माध्यमेन अंशकालिक-नियोजनस्य प्रलोभनं दत्त्वा निवेशस्य नाम्ना जनेभ्यः धनराशिं संगृहीतवान् तथा च अनन्तरं तान् प्रवञ्चितवान्। सः एतादृशं जालकं सञ्चालयति स्म, यस्मिन् निर्दोष-जनान् सम्मिल्य तेषां बैङ्क-लेखानां उपयोगः अवैध-धन-स्थानान्तरणार्थं क्रियते स्म।
एतदतिरिक्तं तेन सह-अभियुक्तेभ्यः चल-दूरभाष-यन्त्राणां मिथ्या-सिम-पत्राणां च व्यवस्थां कर्तुं निर्देशाः अपि दत्ताः आसन्। सीबीआई-संस्थया उक्तं यत् प्रकरणस्य अन्वेषणं अद्यापि प्रचलति।
सीबीआई-संस्थया एतदपि सूचितं यत् विदेश-मन्त्रालयस्य, गृह-मन्त्रालयस्य तथा थाइलैण्डस्थ-भारतीय-दूतावासस्य सहयोगेन अभियुक्तः रेड्-कॉर्नर-सूचनाया: निर्गमनानन्तरं केवलं विंशति-दिनेषु अन्विष्य भारतदेशम् आनायितः।
Hindusthan Samachar / Divya Ranjan