Enter your Email Address to subscribe to our newsletters
पूर्वी सिंहभूमः, 11 जूनमासः (हि.स.)।
प्रदेशाध्यक्षः आदित्य प्रसाद साहूः नरेन्द्र मोदिनः शासनकालस्य द्वादशवर्षाणि ऐतिहासिकानि कथयन् एतत् केवलं सत्ताप्राप्त्यर्थं न अपि तु देशस्य चित्रं भाग्यं च परिवर्तयितुं समर्थं कार्यकालम् इति उक्तवान्।
सः उक्तवान् यत् अस्मिन् कालखण्डे मोदी तानि कार्याणि कृतवान् यानि कदापि कांग्रेसदलेन चिन्तितानि अपि न आसन्। सः अवदत् यत् मोदीशासनेन सर्वेषां सहयोगः सर्वेषां विकासः सर्वेषां विश्वासः इति घोषवाक्यं भूमौ साकारं कृतम् तथा च कस्यापि भेदभावस्य विना समाजस्य सर्वेषु वर्गेषु केन्द्रशासनस्य योजनाः प्रापिताः। अद्य नरेन्द्र मोदी देशस्य दीर्घकालपर्यन्तं सेवा प्रदत्तवान् निर्वाचितः प्रधानमन्त्री अभवत्।
साहू प्रधानमन्त्रिणः नरेन्द्र मोदीस्य सफलतमस्य द्वादशवर्षपूर्त्यवसरे पूर्वीसिंहभूमि जमशेदपुरस्य सोनारीस्थिते चित्रगुप्तभवने आयोजितायां पत्रकारवार्तायां भाषमाणः आसीत्।
सः अस्मिन् अवसरे प्रधानमन्त्रिणः नरेन्द्र मोदिनः शासनकालस्य उपलब्धयः गणितवान्।
प्रदेशाध्यक्षः उक्तवान् यत् नरेन्द्र मोदी शपथग्रहणस्य अनन्तरं यस्मिन् प्रथमदस्तावेजे हस्ताक्षरं कृतवान् सः कृषकहितेन सम्बद्धः आसीत्। पूर्वं कृषकाः ऋणस्य दबावेन आत्महत्यां कुर्वन्ति स्म। अस्याः समस्यायाः समाधानं कुर्वन् सः कृषकसम्माननिधियोजनायाः अन्तर्गतं प्रतिवर्षं ६००० रूप्यकाणां धनराशिं प्रायः ११ कोटि कृषकेभ्यः प्रदत्तवान्।
एतेषु द्वादशवर्षेषु मोदी २५ कोटि जनान् दारिद्र्यरेखातः बहिः आनयत्। ८१ कोटिमिताञ्जनान् निःशुल्करूपेण अन्नं प्रदाय एतत् सुनिश्चितं कृतवान् यत् कोऽपि क्षुधया न म्रियेत तथा च कोपि क्षुधितोदरेण न शयीत। प्रधानमन्त्री आवासयोजनायाः अन्तर्गतं ४ कोटि परिवाराणां कृते दृढगृहाणि उपलब्धानि कारितानि। ११ कोटि परिवाराणां कृते उज्ज्वलायोजनायाः अन्तर्गतं गैससंयोजनानि प्रदत्तानि येन मातृभ्यः भगिनीभ्यः च नेत्ररोगाः न भवन्तु।
जनधनयोजनायाः अन्तर्गतं ५८ कोटि लेखाः उद्घाटिताः तेषु ३२ कोटि लेखाः केवलं महिलानां कृते उद्घाटिताः। महिलानां बहिर्मलत्यागस्य लज्जाजनकस्थितेः निवारणार्थं ११ कोटि शौचालयानां निर्माणं कारितम्।
सः उक्तवान् यत् अद्य देशात् भ्रष्टाचारस्य राजनीति समाप्तिं गच्छति। अधुना देशः विकासस्य मार्गे तीव्रवेगेन अग्रे धावति।
सः अवदत् यत् मोदीशासनेन जलजीवनमिशनयोजनायाः अन्तर्गतं १५.६ कोटि परिवाराणां कृते नलजलयोजनया शुद्धपेयजलम् उपलभ्यते।
देशस्य कश्चन नागरिकः चिकित्सायाः अभावात् न म्रियेत इति उद्देश्येन आयुष्मानयोजनायाः अन्तर्गतं प्रायः ७ कोटि जनानां कृते ५ लक्षरूप्यकपर्यन्तं निःशुल्कचिकित्साव्यवस्था कृता।
सः अवदत् यत् राज्ये ३० सहस्र ३३३ किलोमीटरपरिमितस्य राष्ट्रीयराजमार्गस्य निर्माणं कृतम् अस्ति। केन्द्रशासनस्य योजनायाः अन्तर्गतं झारखण्डे चतुर्लेन तथा षट्लेन एक्सप्रेसमार्गाणां कार्यं प्रचलति। झारखण्डे ५ चिकित्सामहाविद्यालयानां तथा ३ केन्द्रीयविद्यालयानां निर्माणस्य अनुमतिः प्रदत्ता अस्ति।
झारखण्डे वर्षेभ्यः निरुद्धानाम् उद्योगानां पुनर्जीवनार्थं ८०९ कोटि रूप्यकाणां साहाय्यराशिः प्रदत्ता अस्ति। सांस्कृतिकविरासतायाः संरक्षणाय वैद्यनाथधामस्य विकासार्थं ३९ कोटि रूप्यकाणां धनराशिः अनुमोदिता अस्ति।
पत्रकारवार्तायां सांसदः विद्युत वरण महतो, प्रदेशोपाध्यक्षः आभा महतो, विधायकः पूर्णिमा साहू, प्रदेशप्रवक्ता अमरप्रीत सिंह काले, जिलाध्यक्षः संजीव सिन्हा, जिलाप्रभारी बबन गुप्ता च मुख्यरूपेण उपस्थिताः आसन्।
---------------
Hindusthan Samachar / Dheeraj Maithani