मुंबईनगरम्, ११ जूनमासः (हि.स.)। एन.सी.पी. नेत्री तथा महाराष्ट्रस्य उपमुख्यमन्त्री सुनेत्रा-पवारः गुरुवासरे राष्ट्रवादी-कांग्रेस-पक्षस्य वरिष्ठनेतृषु कटाक्षं कृतवती। तया उक्तं यत् यदि पक्षकार्येषु कस्यचित् अनावश्यक-हस्तक्षेपः भवति, तर्हि तस्य विषये समुचितः विचारः करिष्यते। सा अद्य मुंबई-नगरे आयोजिते एन.सी.पी.-पक्षस्य २७तम-स्थापना-दिवस-समारोहे सम्बोधनं कुर्वती आसीत्।

कार्यक्रमकाले सुनेत्रा भावुकाऽपि दृश्यत। तया उक्तं यत् पक्षे समये सर्वेभ्यः न्यायः तथा अवसरः दास्यते इति सा निश्चिततां ददाति। अद्यावधि पक्षे यत् किमपि जातम्, तत् तया सम्यक् अवगतम् तथा समाहितम् अस्ति। तया इदम् अपि उक्तं यत् अजित-पवारः स्वकार्यकाले सर्वान् कार्यकर्तॄन् अवगत्य तेषां समस्याः समाधाय पक्षं सुदृढं कर्तुं प्रयत्नं कृतवान्।

सा अवदत् यत् अग्रेऽपि सा पक्षहितं सर्वोपरि स्थापयिष्यति। यदि कस्यचित् अनावश्यक-हस्तक्षेपः भविष्यति तर्हि तस्य विषये निश्चितं विचारः करिष्यते। सा इदम् अपि स्पष्टं कृतवती यत् पक्षहिताय कठोर-निर्णया: कर्तव्याः स्युः चेत् तदर्थं अपि सा सज्जा अस्ति। न्याय-प्रदानाय सा अजित-पवारस्य पथम् अनुसृत्य अग्रे गन्तुं प्रयासं करिष्यति।

कार्यक्रमे सा कार्यकर्तॄन् एकतायाः आग्रहं कृतवती तथा पक्षं परिवारवत् वर्णितवती। तया उक्तं यत् छत्रपति-शिवाजी-महाराजः, शाहू-महाराजः, महात्मा-फुले तथा डॉ. बाबासाहेब-आम्बेडकरस्य विचारधारां अग्रे नेतुं सर्वान् सहैव नेतव्यम्। स्वतंत्रता-संग्रामे तथा संयुक्त-महाराष्ट्र-आन्दोलनकाले सर्वेषां वर्गाणां योगदानं महत्त्वपूर्णम् आसीत्।

सा इदम् अपि अवदत् यत् अस्मिन् वर्षे पक्ष-स्थापना-दिवसस्य विषयः “समर्पणं, संघर्षः, संकल्पः” इति अस्ति, यः अजित-पवाराय समर्पितः अस्ति। तया उक्तं यत् अजित-पवारः पक्षाय पूर्णतया आत्मसमर्पणं कृतवान्।

सा कार्यकर्तॄणां योगदानस्य उल्लेखं कृत्वा अवदत् यत् राष्ट्रवादी-कांग्रेस-पक्षस्य निर्माणे शतशः कार्यकर्तॄणां महत्त्वपूर्णं योगदानम् अस्ति। अजित-पवारः कृषकाणां, युवानां, महिलानां, उद्यमिनां तथा वञ्चित-वर्गाणां कृते निरन्तरं कार्यं कृतवान्। सा इदम् अपि उक्तवती यत् अजित-पवारस्य स्थानं कश्चन अन्यः न पूरयितुं शक्नोति, किन्तु तेन प्रदर्शितः विकासमार्गः तथा जनहिते प्रतिबद्धता एव पक्षस्य वास्तविकं बलम् अस्ति। तस्य संकल्पः पक्षं सुदृढं कर्तुं तथा जनहितकार्याणि अग्रे नेतुं आसीत्। सीमितकालेऽपि अजित-पवारः पक्षं राष्ट्रियस्तरे परिचययितुं सफलः अभवत् तथा च सामान्यजनानां मध्ये “स्वकीयः जनः” इति छविं निर्मितवान्।

Hindusthan Samachar / Divya Ranjan