सिलीगुडीनगरम्, १२ जूनमासः (हि.स.)। केन्द्रीयमन्त्री सुकान्तमजूमदार: शुक्रवासरे बागडोगरा-विमानस्थानके आगमनानन्तरं पूर्व-मुख्यमन्त्रिणीं ममताबनर्जी तथा तृणमूलकांग्रेसपक्षं प्रति तीक्ष्णं प्रहारम् अकरोत्। तेन उक्तं यत् तृणमूल-काङ्ग्रेस-पक्षः “ताश-पत्राणामिव विखण्डितः भवति” तथा पक्षस्य अन्तः सांसदानां समर्थनविषये गम्भीराः प्रश्नाः उत्पन्नाः सन्ति।

मजूमदारः अवदत् यत् राज्यसभायाः घटनानन्तरम् अधुना लोकसभायाः प्रायः विंशतिः तृणमूल-सांसदानां हस्ताक्षराणि अपि प्रकाशं गतानि, येन पक्षस्य अन्तः असन्तोषः स्पष्टतया दृश्यते। सः व्यङ्ग्येन उक्तवान्— “तत्र कियन्तः सांसदाः सन्ति इति मा गणयन्तु, अपितु ममता-बनर्जी-इत्यनया सह कियन्तः सन्ति इति गणयन्तु; एषा संख्या निरन्तरं न्यूना भविष्यति।” तस्य कथनम् आसीत् यत् शनैः शनैः सर्वे नेतारः पक्षं त्यक्त्वा अन्यत्र गमिष्यन्ति।

अभिषेकबनर्जी इत्यस्य न्यायालये साम्प्रतिक-उपस्थितिविषये टिप्पणीं कुर्वन् सः अवदत् यत् न्यायालयस्य आदेशकारणात् विवशतया गन्तव्यम् अभवत्। “ये पूर्वं राजानम् इव जीवनं यापयितुं अभ्यस्ताः आसन्, ते अधुना न्यायालयं गन्तुं बाध्यन्ते,” इति कटाक्षरूपेण उक्तवान्। तेन आरोपः अपि कृतः यत् पूर्वं केन्द्रीय-अन्वेषण-अभिकरणयोः सीबीआई तथा प्रवर्तन-निदेशालयस्य समाह्वानानि उपेक्षितानि भवन्ति स्म।

मजूमदारः पक्षस्य अन्तः मतभेदानामपि उल्लेखम् अकरोत्। सः अवदत् यत् कल्याणबनर्जी इत्यादीभि: वरिष्ठ-नेतृभि: सह अभिषेक-बनर्जी-इत्यस्य सम्बन्धाः समीचीनाः न सन्ति। तेन उक्तम् यत् “पैराशूटमाध्यमेन अवतीर्य कश्चन नेता भवेत्” इति पुरातन-नेतारः न स्वीकुर्युः। व्यङ्ग्येन सः अवदत् यत् तृणमूल-काङ्ग्रेस-पक्षेण निर्णयः करणीयः यत् सः कल्याण-बनर्जीम् उत अभिषेक-बनर्जीम् धारयिष्यति।

सः एतदपि उक्तवान् यत् अद्य सः मालदा-नगर्यां प्रशासकीय-सभायां भागं ग्रहीष्यति, यतः उत्तर-बङ्गस्य राजनीतिविषये अन्यानि वक्तव्यानि अपि दातुं शक्नोति।

Hindusthan Samachar / Divya Ranjan