Enter your Email Address to subscribe to our newsletters
पटना, 12 जूनमासः (हि.स.)।
प्रख्यातमैथिलीहिन्दीलेखकस्य नागार्जुनस्य व्यक्तित्वं कृतित्वं च विषयीभूय साहित्य अकादमी, नूतनदिल्ली तथा चेतना समिति, पटना इत्येतयोः संयुक्ततत्त्वावधाने द्विदिवसीया मैथिलीसङ्गोष्ठी मिथिलाभवने, राजेन्द्रनगरस्थिते पटने शुक्रवासरे सम्पन्ना।
सङ्गोष्ठ्याः अन्तिमदिने विद्यानन्दझा तथा प्रमोदकुमारझा इत्येतयोः अध्यक्षतायां द्वे सत्रे आयोजिते। तयोः सत्रयोः कृष्णमोहनझा ‘मोहन’, अरुणकुमारसिंहः, भास्करज्योतिः, मेनकामल्लिका, आशीषचमनः तथा पल्लवीमण्डला स्वस्वशोधपत्राणि प्रस्तुतवन्तः।
एतैः शोधपत्रैः यात्री (नागार्जुनस्य) काव्यसाधना, गद्यसाहित्यस्य समग्रविश्लेषणं, तस्य स्त्रीदृष्टिः, मिथिलायाः सामाजिकसमस्यासु तस्य दृष्टिकोणः तथा यात्रीसाहित्ये मिथिलायाः मैथिलीभाषायाश्च उपस्थितिः इत्यादिषु विषयेषु सारगर्भिता चर्चा अभवत्।
सङ्गोष्ठ्यां उपस्थितैः विद्वद्भिः एकस्वरेण उक्तं यत् महाकवेः यात्रीणः साहित्यं सामाजिकचेतनायाः, लोकतान्त्रिकमूल्यानां, मानवीयसंबेदनानां तथा जनहितसम्बद्धविषयाणां शक्तिशाली दस्तावेजः अस्ति तथा नूतनपीढ्यै प्रेरणास्रोतः भविष्यति।
ततः पूर्वं जूनमासस्य एकादशदिनाङ्के उद्घाटनसत्रे स्वागतभाषणं साहित्य अकादेम्याः सचिवेन वरुणगुलाटिना प्रस्तुतम् तथा बीजभाषणं प्रख्यातमैथिलीलेखकेन तारानन्दवियोगिना प्रदत्तम्। विषयप्रवर्तनं साहित्य अकादेम्याः मैथिलीपरामर्शमण्डलस्य सदस्या वीणाठाकुरा अकरोत्। अस्य सत्रस्य अध्यक्षता चेतना समितेः अध्यक्षेण विवेकानन्दझेन कृता तथा धन्यवादज्ञापनं समितेः सचिवेन जयदेवमिश्रेण व्यक्तम्।
स्वागतवक्तव्ये साहित्य अकादेम्याः सचिवः वरुणगुलाटी अवदत् यत् यात्री-नागार्जुन इव साहित्यकारः केवलं मिथिलाक्षेत्रे सीमितः न कर्तव्यः। अधुना समयः आगतः यत् बाबायाः साहित्यं वैश्विकस्तरे प्रतिष्ठापनीयम्। वीणाठाकुरा यात्रिणः कवितासु सौन्दर्यबोधस्य विषये विस्तरेण चर्चां कृतवती। सा अवदत् यत् बाबायाः अत्यन्तसामान्यवस्तूनामपि सौन्दर्यं सहजतया प्रस्तुतम्, यत् अभूतपूर्वम् अस्ति।
तारानन्दवियोगी अवदत् यत् बाबेन मैथिलीहिन्दीभाषयोः अतिरिक्तं संस्कृतबाङ्गलाभाषयोः अपि लेखनं कृतम्, किन्तु मिथिला तस्मात् कदापि पृथक् न अभवत्। वस्तुतः तेन बाङ्गला, हिन्दी, संस्कृतभाषासु अपि मिथिलायाः एव अभिव्यक्तिः कृता।
अस्य दिने अन्ययोः द्वयोः सत्रयोः अशोकस्य गङ्गानाथगङ्गेशस्य च अध्यक्षतायां क्रमशः दिलीपकुमारझा, कुमारराहुलः, सुरेन्द्रभारद्वाजः, पुतुलप्रियम्बदा, वैद्यनाथमिश्रः तथा विभाकुमारी स्वस्वशोधपत्राणि प्रस्तुतवन्तः।
Hindusthan Samachar / Dheeraj Maithani