Enter your Email Address to subscribe to our newsletters
फिरोजाबादम्, १२ जूनमासः (हि.स.)। उत्तरप्रदेशस्य फिरोजाबाद-रेलस्थानकस्य समीपे गुरुवासरे सायंकाले लखनऊ-शताब्दी-एक्सप्रेस-रेलयानस्य उपरि पाषाण-प्रहारस्य घटना प्रकाशम् आगता। अस्मिन्नेव रेलयाने राष्ट्रिय-स्वयंसेवक-संघस्य प्रमुखः मोहन-भागवतः अपि यात्रां कुर्वन् आसीत्। आरक्षक-विभागेन रात्रौ विलम्बपर्यन्तं घटनास्थलस्य परितः अन्वेषणं कृतम्। सम्प्रति अस्य प्रकरणस्य विस्तृतं निरीक्षणं प्रवर्तते।
लखनऊ-नगरात् दिल्ली-नगरं प्रति गच्छति शताब्दी-एक्सप्रेस-रेलयानम्। गुरुवासरे सायंकाले मक्कनपुर-फिरोजाबाद-रेलस्थानकयोः मध्ये पैमेश्वर-द्वारस्य समीपे केचन अज्ञातानि समाजविघातक-तत्त्वानि रेलयानं लक्ष्यीकृत्य पाषाणान् प्रक्षिप्तवन्तः। घटना ज्ञाता चेत् रेल-प्रशासने सुरक्षा-अभिकरणेषु च कम्पनम् अभवत्।
संघ-प्रमुखः मोहन-भागवतः कानपुर-नगरे आयोजिते कार्यक्रमे सहभागित्वं कृत्वा लखनऊ-शताब्दी-एक्सप्रेसेण दिल्लीं प्रति गच्छन् आसीत्। तथापि अस्यां घटनायां सः पूर्णतया सुरक्षितः अस्ति। तस्मै अन्यस्मै वा कस्यचित् यात्रिकस्य कापि हानिः न अभवत्।
रेलयानस्य टुण्डला-रेलस्थानके आगमनानन्तरं आरपीएफ-निरीक्षकः अवधेश-गोस्वामी स्वदलेन सह सम्बन्धित-यानकक्षस्य निरीक्षणम् अकरोत्। अन्वेषणेन एतत् पुष्टं यत् केवलं बाह्य-काचः भग्नः अभवत्, सर्वे यात्रिण: सुरक्षिताः सन्ति।
घटनायाः सूचनां प्राप्य आरक्षक-विभागस्य वरिष्ठ-अधिकारिणः, एलआईयू-दलम् तथा अन्यानि अभिकरणानि घटनास्थले स्थापितानां सीसीटीवी-दृश्यानां परीक्षणं कृत्वा अन्वेषणम् आरब्धवन्तः।
रेल-अधिकारिणां अनुसारं संघ-प्रमुखः मोहन-भागवतः E-1 यानकक्षे ३९ तथा ४० सङ्ख्याकयोः आसन्दयोः उपविष्टः आसीत्।
अस्य विषये वरिष्ठ-आरक्षक-अधीक्षकः आदित्य-लाङ्घे उक्तवान् यत् रेलयानस्य उपरि पाषाण-प्रहारस्य घटना अभवत्। अस्य प्रकरणस्य अन्वेषणाय सप्त आरक्षक-दलानां गठनं कृतम् अस्ति। सीसीटीवी-दृश्यानि परीक्षितानि सन्ति। अन्वेषणोपरान्तं यः कश्चन दोषी भविष्यति, सः अवश्यं गृहीतः भविष्यति।
Hindusthan Samachar / Divya Ranjan