भुवनेश्वरम्, 12 जूनमासः (हि.स.)।ओडिशा सर्वकारस्य द्विवर्षपरिपूर्त्याः अवसरे मुख्यमन्त्री मोहन माझी सामाजिकमाध्यमस्य माध्यमेन राज्यवासिनां नाम एकं सन्देशं प्रकाशित्य तेषां प्रति कृतज्ञताम् व्यक्तवान्। सः उक्तवान् यत् द्वादश जून २०२४ दिनाङ्के भगवान् जगन्नाथस्य कृपया जनतायाः आशीर्वादेन विश्वासेन च राज्ये सुशासनस्य नूतनयुगस्य आरम्भः अभवत्।

मुख्यमन्त्री उक्तवान् यत् ओडिशायाः भूमेः पुत्ररूपेण तस्मै प्रधानमन्त्रिणो नरेन्द्र मोदिनो मार्गदर्शनेन जनसेवां कर्तुं अवसरः प्राप्तः। सः स्वस्य राजनैतिकसामाजिकजीवनस्य यात्रायाः उल्लेखं कुर्वन् उक्तवान् यत् शिक्षकः, सरपञ्चः तथा विधायकः इति रूपेण जनानां सुखदुःखयोः सहचरः भूत्वा अद्य मुख्यमन्त्रिपदे स्थितः अपि तस्य सेवाभावः पूर्ववत् अविचलितः अस्ति।

सः उक्तवान् यत् मुख्यमन्त्रिपदं तस्य कृते सत्तायाः प्रतीकं न अस्ति, अपितु जनसेवायाः एकं पवित्रं माध्यमम् अस्ति। गतद्विवर्षयोः तस्य सर्वकारेण केवलं प्रशासनिककार्याणि एव न कृतानि, अपितु सेवा, समर्पणं तथा सुशासनस्य माध्यमेन जनतायाः विश्वासः प्राप्तुं प्रयासः कृतः अस्ति।

मुख्यमन्त्री स्वसन्देशे उक्तवान् यत् ग्रामात् नगरं प्रति, कृषेः उद्योगं प्रति तथा शिक्षायाः स्वास्थ्यं प्रति प्रत्येकस्मिन् क्षेत्रे विकासस्य नूतना धारा प्रवहति। सः अस्याः उपलब्धेः श्रेयः राज्यस्य जनतायाः सहयोगाय विश्वासाय आशीर्वादाय च अर्पितवान्।

सः उक्तवान् यत् समृद्धस्य, सशक्तस्य तथा विकसितस्य ओडिशायाः निर्माणं तस्य सरकारस्य प्रमुखलक्ष्यम् अस्ति। एतत् केवलं तस्य स्वप्नं न अस्ति, अपितु सार्धचतुर् कोटि ओडिशावासिनां सामूहिकः सङ्कल्पः अस्ति। सः राज्यस्य जनान् विकासस्य अस्य यात्रायाः अधिकवेगेन अग्रे नेतुं सामूहिकप्रयत्नं कर्तुम् आह्वानं कृतवान्।

स्वसन्देशस्य अन्ते मुख्यमन्त्री उक्तवान् यत् तस्य जीवनम् ओडिशायाः सेवायै समर्पितम् अस्ति तथा अग्रे अपि भविष्यति। सः उक्तवान् यत् जनतायाः अखण्डः विश्वासः स्नेहः च एव तस्य महान् शक्तिः अस्ति तथा राज्यस्य विकासस्य अस्य यात्रायाः वास्तविकाः नायकाः ओडिशायाः जनाः एव सन्ति।

---------------

Hindusthan Samachar / Dheeraj Maithani