नीसः (फ्रांसः), 14 जूनमासः (हि.स.)।भारतफ्रांसयोः मध्ये आचर्यमाणस्य नवाचारवर्षस्य अन्तर्गतं प्रधानमन्त्री नरेन्द्र मोदी फ्रांसदेशस्य राष्ट्रपतिः इमैनुएल मैक्रों च रविवासरे संयुक्तरूपेण भारत इनोवेट्स कार्यक्रमस्य उद्घाटनं कृतवन्तौ। अस्य आयोजनस्य पूर्वं प्रधानमन्त्री मोदी वैश्विकस्तरस्य प्रमुखनिवेशकान् जोखिमपूँजिप्रतिनिधीन् च समभाषत तथा भारतदेशे निवेशस्य सम्भावनाः विषये चर्चां कृतवान्।

प्रधानमन्त्री नरेन्द्र मोदी सामाजिकमाध्यममञ्चे एक्स इति क्रमशः लेखान् प्रकाशित्य अस्य कार्यक्रमस्य भेटानां च विवरणं समवेदितवान्। सः राष्ट्रपतिम् इमैनुएल मैक्रों प्रति कृतज्ञतां प्रदर्श्य अलिखत् यत् मम मित्र राष्ट्रपते मैक्रों नीस नगरे पुनः भवता सह मिलित्वा अहं अत्यन्तं प्रीतः अस्मि। भारत इनोवेट्स कार्यक्रमे सहभागाय अहं भवतः धन्यवादं करोमि यतः अस्माकं उभौ राष्ट्रौ संयुक्तरूपेण नवाचारवर्षम् आचरतः।

अन्यस्मिन् लेखे प्रधानमन्त्रिणा निवेशकैः सह जाता चर्चा अत्यन्तं समृद्धा दूरदर्शिनी च इति कथिता। सः अलिखत् यत् भारत इनोवेट्स २०२६ कार्यक्रमे सम्पन्नाः चर्चाः अत्यन्तं ज्ञानवर्धकाः आसन्। अस्मिन् समये निवेशकैः जोखिमपूँजिनेतृभिः च सह नवाचारः प्रौद्योगिकी निर्माणक्षेत्रं तथा उद्भवमानक्षेत्रेषु भारतदेशेन प्रदर्श्यमानाः अनन्ताः अवसराः इति विषयेषु संवादः अभवत्।

प्रधानमन्त्री भारतदेशं निवेशस्य अत्यन्तम् आकर्षकं केन्द्रम् इति कथयन् अलिखत् यत् भारतस्य विकासयात्रा देशस्य प्रतिभया विशालपरिमाणेन स्थिरत्वेन निरन्तरं प्रवर्तमानैः सुधारैः च प्रेर्यते। एताः विशेषताः एव भारतं वैश्विकनिवेशस्य नवाचारस्य च कृते प्रियं आकर्षकं च गन्तव्यस्थानं निर्मन्ति। एतदेव सन्देशं प्रधानमन्त्रिणा एक्स मञ्चे फ्रेञ्च भाषायामपि प्रकाशितम्।

अस्मिन् त्रिदिवसीये आयोजने भारतस्य शतविंशत्यधिकाः अग्रणी स्टार्टअप संस्थाः तथा विंशत्यधिकाः उत्कृष्टसंस्थानानि सहभागं कुर्वन्ति। ते वैश्विकमहत्त्वयुक्तेषु त्रयोदश महत्त्वपूर्णप्रौद्योगिकीस्तम्भेषु भारतस्य गहनप्रौद्योगिकीक्षमतानां प्रदर्शनं कुर्वन्ति। कार्यक्रमे विश्वस्य विभिन्नदेशेभ्यः त्रिशतपञ्चाशदधिकाः श्रेष्ठनिवेशकाः जोखिमपूँजिनिवेशकाः च उपस्थिताः आसन्। प्रधानमन्त्री क्वाण्टम् गणनविद्या अर्धचालकविज्ञानम् जैवप्रौद्योगिकी रक्षाक्षेत्रम् अन्तरिक्षक्षेत्रम् स्वच्छऊर्जाक्षेत्रम् इत्यादिषु अत्याधुनिकक्षेत्रेषु कार्यरतैः स्टार्टअपसंस्थाभिः नवाचारकर्तृभिः च सह प्रत्यक्षसंवादं कृतवान्।

समारोहं सम्बोधयन् प्रधानमन्त्री मोदी अन्तर्राष्ट्रीयसौरगठबन्धनस्य कृत्रिमबुद्धेः हिन्दप्रशान्तक्षेत्रे सुरक्षा स्थिरतयोः संवर्धनार्थं भारतफ्रांसयोः संयुक्तप्रयत्नानां च उल्लेखं कृतवान्। प्रधानमन्त्री ग्रामीणविकासाय उपग्रहप्रौद्योगिक्याः सततजीवनाय उन्नतनिर्माणस्य स्वच्छविकासाय हरितहाइड्रोजनस्य विद्युत्गतिशीलतायाः च परिवर्तनकारीशक्तेः उपरि बलं दत्तवान्।

प्रधानमन्त्री कार्यक्रमे उपस्थितान् उद्यमिनः निवेशकान् च तादृशीनां प्रौद्योगिकीनां विकासाय आह्वानं कृतवान् याः विश्वसनीयाः समावेशात्मकाः मानवकेन्द्रिताः च स्युः। सः विशेषरूपेण उक्तवान् यत् स्टार्टअपसंस्थानां मूल्याङ्कनं केवलं तेषां बाजारमूल्येन न भवेत् अपि तु मानवजातेः उपरि तेषां सकारात्मकप्रभावेन अपि भवेत्। सः वैश्विकसमुदायं वैश्विकनवाचारस्य अस्य नवीनस्य अध्यायस्य सहनिर्माणाय भारतेन सह हस्तं संयोजयितुं आमन्त्रितवान्।

---------------

Hindusthan Samachar / Dheeraj Maithani