नवदेहली, १४ जूनमासः (हि.स.)। प्रधानमन्त्री नरेन्द्र-मोदी-महोदयः सर्बिया-देशस्य राष्ट्रपतिना अलेक्जेण्डर-वुसिच-महोदयेन भारतस्य इतिहासे सर्वाधिक-कालपर्यन्तं निरन्तरं निर्वाचित-प्रधानमन्त्रित्वस्य उपलब्ध्यर्थं प्रदत्ताभ्यः शुभकामनाभ्यः कृतज्ञतां व्यक्तवान्। प्रधानमन्त्री उक्तवान् यत् भारतं सर्बिया-देशेन सह स्वकीयान् मैत्रीपूर्ण-सम्बन्धान् अत्यन्तं महत्त्वं ददाति तथा उभयदेशयोः मध्ये सहयोगं सहभागितां च अधिकं सुदृढीकर्तुं प्रतिबद्धम् अस्ति।

प्रधानमन्त्री मोदी-महोदयः रविवासरे सामाजिक-माध्यम-मञ्चे ‘एक्स’ इत्यत्र राष्ट्रपतिवुसिच्-महोदयस्य सन्देशस्य प्रत्युत्तरं दत्त्वा उक्तवान् यत् तस्य राष्ट्रपतेः समीपवर्तिनी भारत-यात्रा तथा उभयोः नेतृभ्यां मध्ये सम्पन्नाः सार्थकाः सकारात्मकाश्च चर्चाः सम्यक् स्मरणे सन्ति। तेन उक्तं यत् भारत-सर्बिया-सम्बन्धाः परस्पर-विश्वास-सम्मान-सहयोगानां दृढ-आधारे प्रतिष्ठिताः सन्ति।

प्रधानमन्त्री स्वसन्देशे उक्तवान् यत् भारतम् अग्रिमेषु वर्षेषु सर्बिया-देशेन सह द्विपक्षीय-सम्बन्धान् नूतन-उच्चताः प्रति नेतुं तथा विविध-क्षेत्रेषु सहयोगं अधिकं सुदृढीकर्तुं सहकार्यं कर्तुम् उत्सुकम् अस्ति।

उल्लेखनीयं यत् एतस्मात् पूर्वं सर्बिया-देशस्य राष्ट्रपतिः अलेक्जेण्डर-वुसिच-महोदयः प्रधानमन्त्री नरेन्द्र-मोदी-महोदयं भारतस्य इतिहासे सर्वाधिक-कालपर्यन्तं निरन्तरं निर्वाचित-प्रधानमन्त्री भवितुं शुभकामनाः प्रदत्तवान्। तेन उक्तं यत् कस्मिंश्चित् लोकतान्त्रिक-देशे एतावत्कालं सर्वोच्च-पदे स्थितिः जनानां गाढ-विश्वासस्य, नेतृत्व-क्षमतायाः जनसमर्थनस्य च प्रतीकः अस्ति।

राष्ट्रपतिः वुसिच्-महोदयः प्रधानमन्त्रीं मोदी-महोदयं दूरदर्शिनं अनुभवी-राजनेतारं च कथयन् उक्तवान् यत् तस्य वाणी अद्य वैश्विक-मञ्चे सम्मानपूर्वकं श्रूयते। तेन भारतस्य निरन्तर-प्रगतेः विकासस्य च कृते प्रधानमन्त्रीणः नेतृत्वस्य प्रशंसा कृता तथा तस्य उत्तम-स्वास्थ्याय दीर्घायुषे निरन्तर-सफलतायै च शुभकामनाः प्रदत्ताः।

वुसिच-महोदयः उभयोः नेतृभ्यां मध्ये सम्पन्नायाः समीपवर्तिन्याः साक्षात्कारस्य उल्लेखं कृत्वा उक्तवान् यत् सा सभा परस्पर-सम्मान-विश्वास-अवबोधन-भावनाभिः परिपूर्णा आसीत्। तेन प्रधानमन्त्री मोदी-महोदयः आधुनिक-वैश्विक-समस्याया: राष्ट्रिय-हितानां च गम्भीर-अवबोधयुक्तः प्रभावशाली-नेता इति वर्णितः तथा विश्वासः व्यक्तीकृतः यत् तस्य नेतृत्वे भारतं वैश्विक-स्तरे स्वकीयां भूमिकाम् अधिकं सुदृढां करिष्यति।

Hindusthan Samachar / Divya Ranjan