नवदेहली, १४ जूनमासः (हि.स.)। ‘अन्ताराष्ट्रिय-योग-दिवसस्य’ पूर्व-रविवासरे आयोजितेन अन्तर्जाल-योग-सत्रेण नूतनः इतिहासः रचितः। प्रातःकाले आयोजिते अस्मिन् अन्तर्जाल-योग-सत्रे केवलं भारते एव न, अपितु विश्वस्य विविध-देशेषु स्थिताः प्रायः ४,३५,८३१ जनाः एककाले योगाभ्यासं कृतवन्तः। गतवर्षे एषा सङ्ख्या २,४६,४५२ आसीत्।

अस्मिन् अवसरे पत्रकारै: सह संवादं कुर्वन् आयुष-मन्त्री प्रतापराव-जाधव-महोदयः उक्तवान् यत् योगः केवलम् एकदिवसीयः कार्यक्रमः नास्ति, अपितु स्वस्थस्य सकारात्मकस्य च जीवनस्य जीवन-शैली अस्ति।

तेन विशेषरूपेण युवभ्यः आग्रहः कृतः यत् ते योगं स्वजीवन-शैलीरूपेण स्वीकुर्युः तथा स्वकुटुम्बं मित्राणि समाजं च योगेन सह सम्बद्धं कुर्युः।

सः उक्तवान् यत् नरेन्द्र-मोदी-महोदयस्य नेतृत्वे योगः अद्य वैश्विक-जनान्दोलनरूपं प्राप्तवान् अस्ति। यूट्यूब-माध्यमेन प्रत्यक्ष-प्रसारिते कार्यक्रमे लक्षशः देशवासिनां सहभागिता भारतस्य सामूहिक-योग-शक्तेः अद्भुतं परिचयं प्रदर्शयन्ती गिनीज्-वर्ल्ड-अभिलेखस्य दिशि महत्त्वपूर्णं पदं स्थापितवती।

तेन उक्तं यत् प्रधानमन्त्रीणः ‘योग-३६५’ इत्यस्य आह्वानं सर्वान् प्रेरयति यत् योगः केवलं २१ जूनपर्यन्तं न सीमितः भवेत्, अपितु वर्षस्य ३६५ दिवस: जीवनस्य अविभाज्यः अंशः भवेत्। एषः केवलः अभ्यासः नास्ति, अपितु स्वस्थस्य सशक्तस्य विकसितस्य च भारतस्य निर्माणाय दृढः सङ्कल्पः अस्ति।

अस्मिन् अवसरे आयुष-सचिवः वैद्य-राजेश-कोटेचा-महोदयः उक्तवान् यत् आगामिनि २१ जूनमासे अन्ताराष्ट्रिय-योग-दिवसे प्रधानमन्त्री नरेन्द्र-मोदी-महोदयः कोलकातानगरे मुख्य-योग-कार्यक्रमस्य नेतृत्वं करिष्यति। तेन देशस्य विश्वस्य च जनाः आहूताः यत् ये प्रत्यक्षरूपेण उपस्थिताः भवितुं न शक्नुवन्ति, ते आभासिक-माध्यमेन सम्बद्धाः भूत्वा प्रधानमन्त्रीणा सह योगाभ्यासं कुर्युः। स्वस्य योगाभ्यासस्य छायाचित्रं #हरघरयोग इति चिह्नेन सामाजिक-माध्यमेषु प्रसारयन्तु तथा आयुष-मन्त्रालयं चिह्नितवन्तः भवन्तु।

उल्लेखनीयं यत् अस्य अभियानस्य जन-जन-पर्यन्तं प्रसारणार्थं तथा अधिक-सुलभीकरणार्थं आयुष-मन्त्रालयस्य आधिकारिक-यूट्यूब-मार्गेण निरन्तरं शत-दिनात्मकाः निःशुल्काः अन्तर्जाल-प्रत्यक्ष-योग-सत्राणि आयोज्यन्ते।

हैबिल्ड-संस्थायाः संस्थापकेन प्रदत्तस्य मार्गदर्शनस्य अन्तर्गतं सम्पन्ने अस्मिन् यूट्यूब-प्रत्यक्ष-प्रसारणे भारतेन सह विश्वस्य विविध-देशेभ्यः लक्षशः जनाः महोत्साहेन सहभागीभूताः। योग-साधकानां एषा अभूतपूर्वा सहभागिता गिनीज्-वर्ल्ड-अभिलेखस्य दिशि दृढं पदक्षेपं स्थापयन्ती विश्वपटलस्य उपरि भारतस्य सामूहिक-योग-शक्तेः अद्वितीयं परिचयं प्रदर्शितवती।

Hindusthan Samachar / Divya Ranjan