—विश्वस्तरीय सुविधाभिः सह संस्कृत अध्ययनस्य श्रेष्ठं केन्द्रं विश्वविद्यालय: प्रो. शैलेश मिश्रः

वाराणसी,14 जूनमासः (हि.स.)।उत्तरप्रदेशस्य वाराणस्यां स्थिते सम्पूर्णानन्दसंस्कृतविश्वविद्यालये शास्त्री स्नातककक्षायां प्रवेशप्रक्रियायाः आरम्भः सोमवासरे पञ्चदशजूनदिनात् भविष्यति। पञ्चदशजुलाई द्विसहस्रषड्विंशतितमवर्षपर्यन्तं प्रवेशप्रक्रिया प्रचलिता भविष्यति। विश्वविद्यालयप्रशासनेन संस्कृतभारतीयदर्शनप्राच्यविद्यानां अध्ययनस्य अभिरुचिं धारयद्भ्यः विद्यार्थिभ्यः निर्धारितकालावधौ प्रवेशार्थं आवेदनं कर्तुं आह्वानं कृतम्।

रविवासरे एतत् सूचना छात्रकल्याणसंकायाध्यक्षः प्रो शैलेशकुमारमिश्रः अददात्। तेन उक्तं यत् शास्त्रीकक्षायां प्रवेशं स्वीकृत्य विद्यार्थिनः स्वस्य उज्ज्वलभविष्यस्य निर्माणं कुर्वन्तु। संस्कृतं केवलं भाषा नास्ति अपितु भारतस्य ज्ञानपरम्परायाः सांस्कृतिकचेतनायाः जीवनदर्शनस्य च आधारशिला अस्ति। सम्पूर्णानन्दसंस्कृतविश्वविद्यालयः विद्यार्थिभ्यः परम्परायाः आधुनिकतायाः च समन्वितस्वरूपे गुणवत्तायुक्तां शिक्षां प्रददाति।

प्रो शैलेशकुमारमिश्रस्य अनुसारं विश्वविद्यालये वेदव्याकरणज्योतिषसाहित्यपुराणधर्मशास्त्रन्यायवेदान्तपालिथेरवादादिषु विविधेषु पारम्परिकविषयेषु स्नातकस्तरीया शिक्षा उपलब्धा अस्ति। अत्र अध्ययनरतविद्यार्थिभ्यः भारतीयज्ञानपरम्परायाः मूलस्रोतसां सह सम्बन्धं स्थापयितुं आधुनिकयुगस्य आवश्यकतानुसारं स्वव्यक्तित्वस्य विकासं कर्तुं च अवसरः प्राप्यते।

प्रो शैलेशकुमारमिश्रः अवदत् यत् प्रायः षट्त्रिंशदधिकद्विशतवर्षीयया गौरवशालिन्या शैक्षिकपरम्परया समृद्धं एतत् विश्वविद्यालयं काश्याः आध्यात्मिकसांस्कृतिकविरासतायाः जीवन्तप्रतीकम् अस्ति। विश्वविद्यालये प्रत्येकविद्यार्थिनः कृते छात्रवृत्तेः व्यवस्था विद्वद्भिः आचार्यैः अध्यापनम् पारम्परिकाधुनिकशिक्षणपद्धतीनां समन्वयः तथा रोजगारपरकमूल्यसंवर्धनपाठ्यक्रमाणां विशेषसुविधा उपलब्धा अस्ति।

विश्वविद्यालये अध्ययनस्य विशेषताः

प्रो शैलेशकुमारमिश्रस्य अनुसारं विद्यार्थिनां समग्रविकासार्थं विश्वविद्यालये आधुनिकसंगणकप्रयोगशाला भाषाप्रयोगशाला वेधशाला यन्त्रशाला पुरातत्त्वसंग्रहालयः दुर्लभपाण्डुलिपिभिः समृद्धः ग्रन्थालयः यज्ञशाला विशालपुस्तकालयः छात्रावासाः अन्तर्जालसुविधायुक्तः परिसरः शुद्धपेयजलस्य तथा क्रीडाकलापानां उत्कृष्टसुविधाः उपलब्धाः सन्ति। विदेशीविद्यार्थिभ्यः छात्राभ्यः च पृथक् छात्रावासव्यवस्था अपि विश्वविद्यालयस्य विशेषतासु सम्मिलिता अस्ति।

प्रो शैलेशकुमारमिश्रः अभिभावकान् विद्यार्थिनः च आह्वयन् अवदत् यत् भारतीयसंस्कृतेः संस्कृतभाषायाः प्राच्यविद्यानां च संरक्षणसंवर्धने सहभागीभवितुं अधिकाधिकसंख्यया विद्यार्थिनः विश्वविद्यालयेन सह सम्बद्धाः भवन्तु तथा च स्वजीवनं ज्ञानसंस्काररोजगारपरकशिक्षाभिः समृद्धं कुर्वन्तु। प्रवेशसम्बद्धा विस्तृता सूचना विश्वविद्यालयस्य जालपुटे उपलब्धा अस्ति।

Hindusthan Samachar / Dheeraj Maithani