नवदेहली, १४ जूनमासः (हि.स.)। राष्ट्रिय-चलचित्र-विकास-निगमेन १९तमस्य मुम्बई-अन्ताराष्ट्रिय-चलचित्र-महोत्सवस्य अवसर-मध्ये आयोजितस्य वेव्स-डॉक-विपणस्य द्वितीय-संस्करणाय द्वादश-वृत्तचित्र-परियोजनानां चयनस्य घोषणा कृता।

एषः आयोजनः १६ तः १८ जूनपर्यन्तं मुम्बई-नगरे भविष्यति, यस्मिन् वृत्तचित्र-लघु-चलचित्र-तथा-एनीमेशन-क्षेत्रे कार्यरताः चलचित्र-निर्मातारः, उत्पादकाः, वितरकाः, प्रसारकाः तथा उद्योग-विशेषज्ञाः भागं ग्रहीष्यन्ति। अस्य नूतन-उपक्रमस्य अन्तर्गतं वेव्स-डॉक-विपण-२०२६ मध्ये सम्मिलिताभ्य: तिसृभ्यः श्रेष्ठ-परियोजनाभ्यः ३ लक्ष-रूप्यकाणां नगद-अनुदानं प्रदातुं घोषणा कृता अस्ति। एतत् अनुदानं तेषां परियोजनानां दास्यते याः स्वस्य सर्जनशीलतां, प्रभावशाली-कथनम्, कलात्मक-गुणवत्तां तथा वैश्विक-दर्शक-पर्यन्तं गमन-क्षमतां प्रदर्शयन्ति।

सूचना-प्रसारण-मन्त्रालयेन रविवासरे प्रकाशिते विवरणे उक्तं यत् वेव्स-डॉक-विपण-रिकमेंड-कार्यक्रमाय अस्मिन् वर्षे १९ देशेभ्यः तथा ३५ भाषासु १५५ प्रविष्टयः प्राप्ताः, येषु द्वादश-परियोजनानां चयनं कृतम्। एतेषु चतस्रः परियोजनाः ‘वर्क-इन-प्रोग्रेस-लैब’ कृते चयनिताः, यत्र चलचित्र-निर्मातारः स्व-चलचित्राणां अपूर्ण-रूपं अन्ताराष्ट्रिय-विशेषज्ञानां समक्षं प्रस्तूय मार्गदर्शनं प्राप्स्यन्ति।

अपरं च अष्ट-परियोजनाः वेव्स-डॉक-विपणस्य ‘लाइन-अप' मध्ये समाविष्टाः सन्ति। एतानि चलचित्राणि प्रायः पूर्णानि अथवा पश्चात्-उत्पादन-चरणे स्थितानि सन्ति, येषां कृते विक्रय-वितरण-तथा-प्रदर्शन-अवसरा: अन्विष्यन्ते।

सर्वाः द्वादश-चयनिताः परियोजनाः १६ जून-दिने आयोज्ये ओपन-पिच-सत्रे क्रेतृभ्यः, वितरकेभ्यः, प्रसारकेभ्यः, स्ट्रीमिंग-प्लेटफॉर्म-इत्येतेभ्यः तथा चलचित्र-महोत्सव-प्रतिनिधिभ्यः स्व-परियोजनानां प्रस्तुतीकरणं करिष्यन्ति। अस्य आयोजनस्य प्रमुख-आकर्षणं ‘व्यूइङ्ग-रूम’ अपि भविष्यति, यत्र सर्वाः १५५ परियोजनाः डिजिटल-पुस्तकालय-रूपेण प्रदर्शिताः भविष्यन्ति।

Hindusthan Samachar / Divya Ranjan