Enter your Email Address to subscribe to our newsletters
पूर्वमेदिनीपुरम्, जूनमासस्य १५ दिनाङ्कः (हि.स.)। जनपदस्य दीघा-नगरं अग्रिमेषु दिनेषु विश्वस्तरीय-पर्यटनकेन्द्ररूपेण विकसितं भविष्यति। तदनन्तरं मन्दारमणि-ताजपुर-समुद्रतटयोः अपि नूतनरूपेण सौन्दर्यवर्धनस्य योजना निर्मिता अस्ति। एषा घोषणा मुख्यमन्त्रिणा शुभेन्दु-अधिकारी-महोदयेन रविवासरस्य रात्रौ दीघा-शङ्करपुर-विकास-परिषदः अधिकारिभिः सह सम्पन्नायाः सभायाः अनन्तरं कृता।
प्रायः द्विहोरापर्यन्तं चालितायाः सभायाः अनन्तरं मुख्यमन्त्री अवदत् यत् पूर्वमेदिनीपुर-जनपदे समुद्रः, कृषिः, उद्योगश्च इत्यादयः सर्वाः विकाससम्भावनाः विद्यन्ते। यदि सम्यक् प्रकारेण विकासः क्रियते तर्हि अयं जनपदः राज्यस्य अग्रणी-जनपदेषु गणनीयः भविष्यति। सः आरोपितवान् यत् पूर्वतन-सर्वकारस्य काले विकासकार्याणि स्थगितानि आसन् तथा चिकित्सालयानाम् अवस्थापि अत्यन्तं दुर्दशापूर्णा अभवत्।
मुख्यमन्त्री दीघा-राजकीय-सामान्य-चिकित्सालयस्य दुर्व्यवस्थां प्रति चिन्तां प्रकटितवान्। सः अवदत् यत् अत्र पर्याप्त-सघनचिकित्सा-शय्याः, रुग्णवाहनानि तथा आवश्यक-चिकित्सासुविधाः महता अभावेन पीडिताः सन्ति। समीपे काले अभिनेता राहुल-अरुणोदय-बैनर्जी इत्यस्य समुद्रे निमज्जनेन जातां मृत्युम् उल्लिख्य सः अवदत् यत् पर्यटकाणां सुरक्षा तथा उत्तम-चिकित्साव्यवस्था अत्यावश्यकी अस्ति। एतदर्थं शत-शय्यायुक्तस्य चिकित्सालयस्य, पञ्च-सघनचिकित्सा-शय्यानां तथा विशेषज्ञ-चिकित्सकानां व्यवस्थां कर्तुं निर्देशाः दत्ताः सन्ति।
एतदतिरिक्तं मुख्यमन्त्री अवदत् यत् नयाचार-क्षेत्रे निर्मीयमाणस्य मत्स्य-केन्द्रस्य, हल्दिया-बन्दरगाहस्य पुनर्विकासस्य तथा दादनपत्रबाड-क्षेत्रे गम्भीर-समुद्री-बन्दरगाह-परियोजनायाश्च विषये चर्चा अभवत्। तेन उक्तं यत् एतेषां परियोजनानां माध्यमेन सम्पूर्णस्य जनपदस्य अर्थव्यवस्थायां महत्त्वपूर्णं परिवर्तनम् आगमिष्यति।
मुख्यमन्त्री एतदपि घोषितवान् यत् दीघा-नगरम् आगच्छद्भ्यः पर्यटकेभ्यः गृहीयमाणः दशरूप्यकात्मकः विकास-शुल्कः जुलाईमासस्य प्रथमदिनाङ्कात् निरस्तः भविष्यति। सः अवदत् यत् लक्षशः पर्यटकेभ्यः केवलम् एतादृशी अल्पः आयः व्यवस्थायाः प्रभावशीलतां प्रति प्रश्नान् जनयति, अतः सर्वकारः एतां व्यवस्थां समापयिष्यति।
Hindusthan Samachar / Divya Ranjan