खटीमानगरम्, १५ जूनमासः (हि.स.)। प्रधानमन्त्रिण: नरेन्द्र-मोदी-महोदयस्य कार्यकालस्य द्वादश-वर्ष-पूर्णतायाः उपलक्ष्ये उत्तराखण्डस्य मुख्यमन्त्री पुष्करसिंह-धामी-महोदयः उधमसिंह-नगर-जनपदस्य खटीमा-स्थिते पूर्णानन्दगिरि-मन्दिर-परिसरे स्वच्छता-अभियानं सञ्चालितवान्। अस्मिन् अवसरे तेन मन्दिर-परिसरे स्वच्छता-कार्यं कृत्वा स्वच्छतायाः सन्देशः प्रदत्तः तथा ‘एकं वृक्षं मातुः नाम्ना’ इत्यभियानस्य अन्तर्गतं वृक्षारोपणमपि कृतम्।

अस्मिन् अवसरे मुख्यमन्त्रिणा प्रदेशवासिनः स्वच्छ-स्वस्थ-उत्तराखण्ड-निर्माणे सक्रिय-सहभागितायै आहूताः। तेन उक्तं यत् सर्वे नागरिकाः स्वगृहेषु, स्व-स्थानेषु तथा समीपवर्तिषु क्षेत्रेषु स्वच्छतां रक्षितुं सङ्कल्पं कुर्युः।

मुख्यमन्त्री पर्यावरण-संरक्षणस्य महत्त्वं प्रतिपादयन् उक्तवान् यत् अधिकाधिक-वृक्षारोपणेन प्रकृतिं प्रति स्वकीय-दायित्वस्य निर्वहणं करणीयम्। तेन उक्तं यत् स्वच्छता तथा पर्यावरण-संरक्षणम् इत्यादयः विषयाः तदैव व्यापक-जनान्दोलनरूपं धारयितुं शक्नुवन्ति यदा तेषु सामान्य-जनानां सहभागिता सुनिश्चिता भवति।

सः अपि उक्तवान् यत् अग्रिम-वंशेभ्यः स्वच्छं वातावरणं हरितं पर्यावरणं च प्रदातुं अस्माकं सर्वेषां सामूहिकं दायित्वम् अस्ति। एतदर्थं समाजस्य प्रत्येकं वर्गः अग्रे आगन्तुं प्रयत्नं कुर्यात् इति तेन आहूतम्।

Hindusthan Samachar / Divya Ranjan