जम्मूः, 16 जूनमासः (हि.स.)। नटरङ्गस्य प्रवर्तमाने ग्रीष्मकालीननाट्यकार्यशालायां समग्रशिक्षायाः व्यक्तित्वविकासस्य च संवर्धनार्थम् अद्य बालकानां कृते योगक्षेमाय योगः इति विषये विशेषसत्रम् आयोजितम्। एतत् सत्रम् आयुषविभागस्य जम्मूकश्मीरस्य सहयोगेन आयोजितम् यस्य उद्देश्यं युवा नाट्यकलाकाराणां मध्ये शारीरिकस्वास्थ्यस्य मानसिकस्वास्थ्यस्य भावनात्मकसन्तुलनस्य च प्रति जागरूकतावृद्धिः आसीत्।

अस्मिन् अवसरे पद्मश्री बलवन्तठाकुरः नटरङ्गस्य निदेशकः आयुषविभागस्य जम्मूकश्मीरस्य निदेशकाय तथा राजकीयआयुर्वेदचिकित्सालयस्य जम्मोः चिकित्साधीक्षिकायै डा अरुणा भट्टायै कृतज्ञतां व्यक्तवान्।

सः अस्याः महत्त्वपूर्णायाः पहलायाः सफलतायै आयुषविभागस्य सहयोगस्य प्रशंसां कृत्वा उक्तवान् यत् बालकान् योगस्य महत्त्वेन परिचाययितुं सृजनात्मकक्रियाकलापैः सह स्वास्थ्यसम्बद्धाभ्यासानां संयोजनस्य अयं प्रयासः अत्यन्तं प्रशंसनीयः अस्ति।

पद्मश्री बलवन्तठाकुरः अवदत् यत् वर्षे एकोनविंशतिशताधिकनवत्यां आरभ्य नटरङ्गः स्वस्य वार्षिकग्रीष्मकालीननाट्यकार्यशालायाः माध्यमेन बालकेभ्यः ग्रीष्मावकाशस्य सृजनात्मकप्रयोगस्य अवसरं प्रददाति। एषा पहलाः वर्षाणां प्रवाहे सहस्रशः बालकानां व्यक्तित्वनिर्माणे व्यवसायनिर्माणे च महत्त्वपूर्णां भूमिकां निर्वहति।

कार्यशालायाः माध्यमेन बालकेषु आत्मविश्वासः सृजनशीलता अनुशासनम् संवादकौशलं दलभावना च विकसिताः भवन्ति।

योगसत्रस्य संचालनम् आयुषविभागस्य चिकित्साधिकारी डा अरुणगुप्तः तथा योगप्रशिक्षकः राजेशः अकुरुताम्। ताभ्यां बालकाः विविधैः योगाभ्यासैः परिचिताः कृताः तथा तेषां शारीरिकमानसिकस्वास्थ्ययोः उपरि पतन्ति सकारात्मकप्रभावाः अपि ज्ञापिताः।

तौ नाट्यकलायाः योगस्य च सम्बन्धं व्याख्याय उक्तवन्तौ यत् योगः एकाग्रतायाः शारीरिकसन्तुलनस्य लचीलतायाः श्वासनियन्त्रणस्य तथा मञ्चीयप्रस्तुतेः उन्नयनाय महत्त्वपूर्णां भूमिकां निर्वहति।

Hindusthan Samachar / Dheeraj Maithani