उदयपुरम्(राजस्थानम्), 16 जूनमासः (हि.स.)।

राष्ट्रीयस्वयंसेवकसंघस्य सरसंघचालकः डॉ. मोहनभागवत महोदयः मङ्गलवासरस्य सायंकाले उदयपुरं प्राप्स्यति। सः बुधवासरे प्रतापगौरवकेन्द्रस्य ‘राष्ट्रीयतीर्थस्य’ तत्त्वावधाने महाराणाप्रतापजयन्ती तथा हल्दीघाटीविजयस्य सार्द्धचतुःशतीसमारोहस्य अन्तर्गतं महाराणाभूपालक्रीडाङ्गणे गांधीस्थले आयोजितां राष्ट्रचेतनासंकल्पसभां सम्बोधयिष्यति।

प्रतापगौरवकेन्द्रस्य निदेशकः अनुरागसक्सेना महोदयः अवदत् यत् सरसंघचालकः दिल्लीतः वायुपोतेन मङ्गलवासरे सायं सप्तवादनार्धे महाराणाप्रतापविमानस्थानकं प्राप्स्यति। ततः सः रात्रौ अष्टवादनार्धे प्रतापगौरवकेन्द्रं गमिष्यति, तत्रैव च तस्य रात्रिविश्रामः भविष्यति।

बुधवासरे प्रातःकाले सः गौरवकेन्द्रे आयोजिते कार्यक्रमे भागं गृह्णीयात्। तदनन्तरं गांधीस्थले आयोजितां राष्ट्रचेतनासंकल्पसभां सम्बोधयिष्यति। पुनः गौरवकेन्द्रं प्रत्यागत्य अन्यस्मिन् कार्यक्रमे सहभागित्वा विमानस्थानकं प्रति प्रस्थानं करिष्यति, ततः मुम्बईनगरं गमिष्यति।

उल्लेखनीयम् अस्ति यत् वीरशिरोमणि महाराणाप्रतापसमितेः अन्तर्गतं सञ्चालितस्य प्रतापगौरवकेन्द्रस्य ‘राष्ट्रीयतीर्थस्य’ तत्त्वावधाने गतवर्षात् आरभ्य हल्दीघाटीविजयस्य सार्द्धचतुःशतीसमारोहः आयोजितः अस्ति। तस्यैव अन्तर्गतं एषा विशाल राष्ट्रचेतनासंकल्पसभा आयोज्यते।

महाराणाप्रतापजयन्त्याः पूर्वसन्ध्यायां अद्य सायं पञ्चवादनपञ्चदशमिनिटसमये प्रतापगौरवकेन्द्रस्थितायाः सप्तपञ्चाशत्-फुट्-उन्नतायाः आसनस्थप्रतिमायाः दुग्धाभिषेकः विधास्यते।

हल्दीघाटीविजयसार्द्धचतुःशतीसमारोहस्य संयोजकः सी.ए. डॉ. महावीरचपलोत महोदयः अवदत् यत् अतिविशिष्टजनानां (स्वर्णनिमन्त्रणपत्रधारिणां) तथा साधुसन्तानां (भगवनिमन्त्रणपत्रधारिणां) प्रवेशः प्रथमद्वारतः भविष्यति, तेषां वाहनस्थापनव्यवस्था अपि तत्रैव भविष्यति।

विशिष्टजनानां (नीलनिमन्त्रणपत्रधारिणां) प्रवेशः गुरुगोविन्दसिंहविद्यालयस्य समीपस्थात् तृतीयद्वारात् (३-बी) भविष्यति। तेषां वाहनानां स्थापनं झरिया-मार्गे भविष्यति। तस्मात् मार्गात् आयोजनस्थलं यावत् आगमनार्थं गोल्फयानव्यवस्था अपि कृता अस्ति।

अतिविशिष्ट-विशिष्टजनानां वाहनस्थले केवलं तानि वाहनानि एव स्थापयितुं शक्यन्ते, येषु आयोजनस्य वाहनप्रवेशपत्रं संस्थापितम् अस्ति। एतानि प्रवेशपत्राणि निमन्त्रणपत्रैः सह प्रदत्तानि सन्ति।

प्रबुद्धजनानां, प्रमुखजनानां, पत्रकाराणां, माध्यमप्रतिनिधीनां, कार्यकर्तॄणां च प्रवेशः द्वितीयद्वारतः तथा लम्बरदारविद्यालयस्य समीपस्थात् तृतीयद्वारात् (३-ए) भविष्यति।

उदयपुरनगरात् आगच्छतां प्रमुखजनानां द्विचक्रयानानां स्थापनव्यवस्था पहाडी बसस्थानके, सूचनाकेन्द्रे, मोहता-उद्याने तथा एम.बी. चिकित्सालयमार्गे भविष्यति। चतुश्चक्रयानानां स्थापनव्यवस्था फील्डक्लबे, मधुबनक्षेत्रे, लोककलामण्डले, भट्टजीकीबाड़ी तथा दैत्यमगरी-रेलमार्गक्षेत्रे भविष्यति।

अन्यनगरभ्यः आगच्छतां वाहनानां कृते फतहविद्यालये तथा विद्याभवनस्य देवालीप्राङ्गणे स्थापनव्यवस्था भविष्यति। एताभ्यां स्थानाभ्यां गांधीस्थलं यावत् विशेषयानव्यवस्था अपि उपलब्धा भविष्यति।

विद्याभवनात् विशेषयानानि सहेलियानां बाडी, यूडीए-चक्रमार्गं कृत्वा आकाशवाणीकार्यालयं प्राप्स्यन्ति। तथा फतहविद्यालयात् प्रस्थितानि विशेषयानानि कुम्भकारभट्टा, दुर्गानर्सरीमार्गः, शास्त्रीचक्रम्, कोठारीभवनम्, बंसीपानस्थानम्, एम.जी. महाविद्यालयम् इत्यादि मार्गेण आकाशवाणीकार्यालयं गमिष्यन्ति।

एतेषु विशेषयानेषु आयोजनस्य पताकाः स्थापिताः भविष्यन्ति। उदयपुरनगरस्य प्रबुद्धजनाः अपि एतेषां यानानां उपयोगं कृत्वा कार्यक्रमस्थलं प्राप्तुं शक्नुवन्ति।

---------------

Hindusthan Samachar / Dheeraj Maithani