नवदेहली, १७ जूनमास: (हि.स.)। कांग्रेस-दलस्य नेता राहुल-गान्धिनः कोटा-नगरे आयोजितः छात्र-संवाद-कार्यक्रमः राजनीतिक-विवादस्य केन्द्रं जातः। भारतीय-जनता-पक्षः राहुल-गान्धिनः तीव्रं प्रहारं कृत्वा आरोपितवान् यत् नीट-परीक्षायाः केवलं त्रिदिनपूर्वं एतादृशस्य कार्यक्रमस्य आयोजनं छात्राणां भविष्येन सह क्रीडा अस्ति।

भाजपा-दलस्य राष्ट्रिय-प्रवक्ता डॉ.सुधांशु-त्रिवेदी बुधवासरे दलस्य मुख्यालये आयोजितायां पत्रकार-वार्तायाम् अवदत् यत् केवलं त्रिदिनानन्तरं नीट-परीक्षा पुनः सम्पद्यते। अस्मिन् विषये यत्र सर्वे छात्राः सम्पूर्ण-मनोयोगेन परीक्षायाः सिद्धतां कुर्वन्ति, तत्र सर्वकारः अपि पूर्ण-संवेदनशीलतया सावधानतया च सम्पूर्णां प्रक्रियां सुव्यवस्थितरूपेण सम्पन्नां कर्तुं प्रयतते।

तेन उक्तं यत् एकतः सर्वकारः उत्तरदायित्वेन कार्यं करोति, अपरतः विपक्ष-नेता राहुल-गान्धी कुटिल-राजनीतिम् अवलम्बते। त्रिवेदी अवदत् यत् राहुल-गान्धी छात्रजीवने, सेवाक्षेत्रे, स्वकीय-उद्योगे तथा नेतृत्वरूपेण अपि असफलः अभवत्।

भाजपा-प्रवक्त्रा प्रश्नः कृतः यत् परीक्षायाः पूर्वं अन्तिमेषु द्विसप्तत्यधिक-द्विहोरासु, यदा परीक्षार्थिनः पूर्ण-एकाग्रतया मानसिक-तनावरहिताः भूत्वा अन्तिम-सज्जतां कुर्वन्ति, तदा कांग्रेस-दलेन एतादृशस्य कार्यक्रमस्य आयोजनं किमर्थं क्रियते? छात्राणां मनसि भयम्, तनावः च उत्पाद्य तेषां एकाग्रतां भङ्गं कर्तुं किमर्थं प्रयत्नः क्रियते?

त्रिवेदी उक्तवान् यत् पुनः परीक्षा-सम्पादनस्य निर्णयः पूर्वमेव कृतः अस्ति, न्यायपालिकया अपि अस्य विषयस्य संज्ञानं गृहीतम्। तर्हि कांग्रेस-दलः अधुना किं पुनः याचते? तेन राजस्थान-राज्यस्य विरोधस्य केन्द्रत्वेन चयनम् अपि प्रश्नीकृतम्। तस्य कथनानुसारं कांग्रेस-सर्वकारस्य काले राजस्थाने एकोनविंशतिः (१९) प्रश्नपत्र-लीक-प्रकरणानि अभवन्, किन्तु तदा कस्यापि प्रकरणस्य विषये कठोरा कार्यवाही न कृता। अपरतः भाजपा-सर्वकारस्य गत-अर्धत्रिवर्षीय-कार्यकाले एकमपि प्रश्नपत्र-निस्सारण-प्रकरणं न अभवत्।

भाजपा-नेता आरोपितवान् यत् राहुल-गान्धिनः सभायां छात्राणां सम्मर्दं सङ्ग्रहीतुं छात्रावासानां, पीजी-निवासानां तथा अतिथिगृहाणां सञ्चालकेषु दबावः निर्मीयते। सः पुनः अपृच्छत् यत् परीक्षायाः केवलं ७२ होरापूर्वम् एतादृशः प्रयत्नः किमर्थं क्रियते।

अन्ते त्रिवेदी कांग्रेस-दलस्य विरुद्धं सुनियोजित-षड्यन्त्रस्य आरोपं कृत्वा अवदत् यत् एषा कांग्रेस-दलस्य टूलकिट्-मानसिकता इत्यस्य उदाहरणम् अस्ति। यदा पुनः परीक्षायाः निर्णयः कृतः अस्ति तथा न्यायालयेन अपि विषयः विचाराधीनः अस्ति, तर्हि कांग्रेस-दलस्य एषा नूतना याचना कस्य कृते इति प्रश्नः उत्पद्यते।

Hindusthan Samachar / Divya Ranjan