खूंटी, 17 जूनमासः (हि.स.)। खूंटीजनपदस्य जरियागढस्थे उत्क्रमितउच्चविद्यालये इदानीं स्थितिः अत्यन्तं चिन्ताजनका वर्तते। विद्यालयस्य भवनं पूर्णतया जीर्णशीर्णं जातम् अस्ति, किन्तु भवनाभावस्य कारणात् अत्र शतानि छात्रछात्राः प्रतिदिनं स्वप्राणान् संकटे स्थापयित्वा शिक्षां प्राप्तुं विवशाः सन्ति। विद्यालयस्य एषा दयनीया स्थितिः न केवलं विद्यार्थिनां अपितु शिक्षकाणाम् अभिभावकानां च चिन्तायाः विषयः अभवत्।

विद्यालयस्य अनेककक्षाणां छदिभ्यः निरन्तरं पलस्तरखण्डाः भग्नावशेषाश्च पतन्ति। अनेकेषु स्थानेषु छदस्य अन्तर्भागे स्थापिताः लौहदण्डाः अपि दृश्यन्ते, येन भवनस्य दुर्बलावस्थायाः सहजतया अनुमानं कर्तुं शक्यते। शिक्षकाणां मतानुसारं अध्ययनसमये सर्वदा कस्यचित् महतः दुर्घटनायाः आशङ्का वर्तते। अनेकवारं कक्षासु अध्ययनकाले छदतः पलस्तरखण्डाः पतिताः सन्ति, येन छात्रछात्राणां मध्ये भयस्य वातावरणं निर्मितम् अस्ति।

वर्षर्तौ विद्यालयस्य समस्या अधिका गम्भीरा भवति। विद्यालयस्य कक्षाणां सह कार्यालयस्य छदः अपि अनेकेभ्यः स्थानेभ्यः जलं स्रवति। वर्षाकाले कक्षासु जलसञ्चयः भवति। छात्राः वर्षाजलेन आर्द्राः सन्तः अध्ययनं कर्तुं विवशाः भवन्ति।

विद्यालये समीपवर्तिग्रामक्षेत्रेभ्यः आगताः शतानि निर्धनमध्यमवर्गीयपरिवाराणां बालकाः शिक्षां प्राप्तुं आगच्छन्ति। स्थानीयग्रामीणानां कथनानुसारं भवनस्य जीर्णावस्था न नूतना समस्या अस्ति। बहुवर्षेभ्यः विद्यालयः मरम्मतकार्यस्य नूतनभवननिर्माणस्य च याचनां करोति, किन्तु अद्यावधि अस्मिन् विषये काचित् दृढः उपक्रमः न कृतः।

विद्यालयस्य प्रधानाचार्यः अवदत् यत् भवनस्य दयनीयस्थितेः विषये अनेकवारं विभागीयाधिकारिणः लिखितरूपेण सूचिताः सन्ति। तेन उक्तं यत् भवनं बहुवर्षेभ्यः क्षतिग्रस्तम् अस्ति तथा च समये समये छदतः भग्नावशेषाः पतन्ति, येन विद्यार्थिनां शिक्षकाणां च सुरक्षां प्रति सर्वदा चिन्ता वर्तते। तेन उक्तं यत् भवनाभावस्य कारणात् अध्ययनकार्यं स्थगयितुं न शक्यते, अतः जोखिमस्य उपस्थितावपि कक्षाः सञ्चाल्यन्ते।

विद्यालयप्रबन्धनसमित्या अभिभावकैः स्थानीयग्रामीणैश्च शिक्षाविभागात् अविलम्बं हस्तक्षेपं कृत्वा नूतनविद्यालयभवनस्य निर्माणं वा जीर्णशीर्णभवनस्य जीर्णोद्धारं वा कर्तुं याचितम्। तेषां मतम् अस्ति यत् विद्यार्थिभ्यः सुरक्षितं श्रेष्ठं च शैक्षणिकवातावरणं प्रदातुं शासनस्य विभागस्य च प्राथमिकं दायित्वम् अस्ति। यदि समये आवश्यकानि पदक्षेपाणि न स्वीकृतानि भविष्यन्ति तर्हि कदापि काचित् महती दुर्घटना घटितुं शक्नोति।।

---------------

Hindusthan Samachar / Dheeraj Maithani