Enter your Email Address to subscribe to our newsletters
कोलकातानगरम्, जूनमासः १७ दिनाङ्कः (हि.स.)। पश्चिमबङ्गराज्ये सत्तापरिवर्तनानन्तरं तृणमूल-काङ्ग्रेस-दलस्य समक्षम् अन्यापि एका असहजा परिस्थितिः उपस्थिता जाता। दलनेतृत्वस्य समीपवर्तिभिः अनेकैः नेतृभिः, समर्थकैः तथा प्रभावशालिभिः व्यक्तिभिः सह दूरी वर्धमाना अस्ति इति चर्चासु प्रचलितासु, अधुना महानगरक्षेत्रे स्थितस्य तृणमूल-दलस्य अस्थायी-कार्यालयस्य रिक्तीकरणस्य घटनया राजनैतिकवृत्तेषु नूतना चर्चा प्रारब्धा अस्ति।
तृणमूल-दलस्य प्रमुखा तथा पूर्वमुख्यमन्त्री-ममता-बैनर्जी-महोदयायाः एकदा निकटवर्ती इति प्रसिद्धः व्यवसायी मनोतोष-साहः, यः मन्टू-साहः इति नाम्नापि परिचितः अस्ति, कोलकाता-नगरस्य पूर्व-महानगरीय-परिपथमार्गे टोपसियाक्षेत्रे स्थितस्य तृणमूल-काङ्ग्रेस-दलस्य अस्थायी-कार्यालयस्य रिक्तीकरणार्थं गत-मे-मासे सूचनां प्रदत्तवान्। अस्य बहुतल-भवनस्य स्वामी स्वयं मन्टू-साहः अस्ति। दीर्घकालात् अस्य भवनस्य एकस्मात् भागात् दलस्य विविधाः संघटनात्मक-क्रियाकलापाः सञ्चालिताः आसन्।
सूत्राणां अनुसारं भवनं रिक्तं कर्तुं दलाय द्विमासात्मकः कालावधिः प्रदत्तः आसीत्। तथापि राजनैतिकवृत्तेषु पूर्वमेव चर्चा आसीत् यत् निर्धारितकालसीमायाः समाप्तेः पूर्वमेव कार्यालयः अन्यत्र स्थानान्तरितः भविष्यति। अन्ततः तथैव अभवत्। मङ्गलवासरस्य रात्रौ भवनस्य तलद्वयं पूर्णतया रिक्तीक्रियते स्म। अवशिष्टभागेभ्यः अपि कार्यालयीयसामग्रीणां तथा अन्यसाधनानां निष्कासनप्रक्रिया प्रारब्धा अस्ति।
अस्य अस्थायी-कार्यालयस्य राजनैतिक-महत्त्वम् अपि न्यूनं नास्ति। वर्षे २०२१ तमे विधानसभानिर्वाचनानन्तरं तृणमूल-दलस्य राष्ट्रिय-महासचिवः अभिषेक-बैनर्जी टोपसियास्थितस्य प्राचीनस्य ‘तृणमूल-भवनस्य’ आधुनिकीकरणस्य उपक्रमम् आरब्धवान्। दलस्य मुख्यालयं आधुनिकं निगम-सदृशं स्वरूपं दातुम् उद्दिश्य पुरातन-कार्यालयात् अस्थायिरूपेण स्थानान्तरणस्य निर्णयः स्वीकृतः आसीत्। तस्मिन् एव समये महानगरक्षेत्रस्थितम् एतत् बहुतल-भवनम् अस्थायी-दलकार्यालयत्वेन चयनितम् आसीत्।
दक्षिण-कोलकाताक्षेत्रस्य सज्जा-व्यवसायेन सम्बद्धस्य मन्टू-साहस्य राजनैतिकः व्यावसायिकः च प्रभावः दीर्घकालात् चर्चायाः विषयः आसीत्। राजनैतिकवृत्तेषु केचन जनाः वदन्ति यत् तृणमूल-दलस्य विविधासु सभासु, यात्रासु तथा कार्यक्रमेषु तस्य संस्थायाः महत्त्वपूर्णा भूमिका आसीत्। किन्तु अर्वाचीनकाले तस्य तृणमूल-दलेन सह वर्धमाना दूरी निरन्तरं दृश्यते स्म। दलस्य कार्यक्रमेभ्यः सेवाप्रदानस्य निरोधनात् आरभ्य कार्यालय-रिक्तीकरण-सूचनाप्रदानपर्यन्तं बहुभिः घटनाभिः उभयोः सम्बन्धेषु उत्पन्ना कटुता प्रकटिता अस्ति।
तथापि सम्पूर्णेऽस्मिन् प्रकरणे मनोतोष-साहस्य पक्षतः अद्यावधि कापि प्रतिक्रिया न प्रदत्ता। अतः तस्य निर्णयस्य वास्तविककारणं किमिति विषये राजनैतिकमण्डले विचाराणां क्रमः निरन्तरं प्रवर्तते। तृणमूल-दलस्य कृते एषः घटनाक्रमः तस्मिन् समये प्रकटितः यदा दलं पूर्वमेव विविधविवादैः, अन्वेषणैः तथा राजनैतिक-समस्याभिः सम्मुखीकृतम् अस्ति।
Hindusthan Samachar / Divya Ranjan