ग्वालियर, 17 जून (हि.स.)।

मध्यप्रदेशस्य ग्वालियरनगरे वीराङ्गना रानी लक्ष्मीबाई इत्यस्याः पुण्यतिथेः बलिदानदिवसस्य च अवसरस्य निमित्तं प्रतिवर्षवत् अस्मिन् वर्षे अपि द्विदिवसीयस्य वीराङ्गना बलिदानमेलस्य आयोजनं क्रियते। अद्य बुधवासरे सायंकाले शहीदज्योतियात्रायाः शोभायात्रया अस्य प्रारम्भः भविष्यति।

राज्यवित्तायोगस्य अध्यक्षः तथा बलिदानमेलस्य संस्थापकाध्यक्षः जयभान सिंह पवैया अवदत् यत् अद्य झाँसीदुर्गात् प्रज्वलिता शहीदज्योतियात्रा सायं षड्वादने ग्वालियरनगरं प्राप्स्यति। तां ज्योतिं सार्धषड्वादने पडावचत्वरात् सजीवाश्वारूढझाङ्कीभिः सह समाधिस्थलपर्यन्तम् आनाय स्थापयिष्यन्ति। ततः परं सायं सप्तवादनपञ्चदशमिनिटसमये नगरनिगमेन आयोजितायाः रान्याः मौलिकशस्त्रप्रदर्शन्याः तथा स्वराजसंस्थानेन प्रायोजितायाः क्रान्तिकारिविषयकप्रदर्शन्याः उद्घाटनं भविष्यति। सायं सप्तवादनत्रिंशन्मिनिटसमयात् बलिदानमेलस्य प्रमुखमञ्चे महाराणा प्रतापस्य जयन्त्याः उपलक्ष्ये “प्रतापस्य प्रतिज्ञा” इति नाट्यस्य मंचनं भविष्यति तथा देशभक्तिपूर्णाः सांस्कृतिककार्यक्रमाः अपि आयोजिताः भविष्यन्ति।

तेन उक्तं यत् परदिने गुरुवासरे १८ जून दिनाङ्के अखिलभारतीयकविसम्मेलनस्य आयोजनं भविष्यति यस्मिन् देशस्य प्रख्याताः कवयः सहभागित्वं करिष्यन्ति। एतेन सह सायंकाले भारतविकासपरिषदः समर्पणशाखया लघुउद्योगभारत्या जेसीआईक्लबेन च “एका दीपिका वीराङ्गनायाः नाम्ना” इति कार्यक्रमान्तर्गतं सहस्रदीपप्रज्वालनं करिष्यते।

---------------

Hindusthan Samachar / Dheeraj Maithani