- सीहोरे महाराणा प्रताप जयंत्यां प्रतिमायाः अनावरणम् एवं भव्य चल समारोहः आयोजितः

सीहोरम्, 17 जूनमासः (हि.स.)।मध्यप्रदेशस्य राजस्वमन्त्री करणसिंहवर्मा उक्तवान् यत् महाराणाप्रतापः भारतीयइतिहासस्य तादृशः महानायकः आसीत् येन राष्ट्रस्य धर्मस्य स्वाभिमानस्य च रक्षणार्थं स्वस्य सम्पूर्णं जीवनं समर्पितम्। तेन प्रतिकूलपरिस्थितिषु अपि कदापि स्वात्मसम्मानस्य विषये समझौतं न कृतम् तथा संघर्षमार्गे दृढतया स्थितः। तस्य जीवनं साहसस्य त्यागस्य पराक्रमस्य राष्ट्रभक्तेः च अद्वितीया दृष्टान्तरूपा कथा अस्ति।

मन्त्री वर्मा बुधवासरे सीहोरनगरे वीरशिरोमणि महाराणाप्रतापस्य प्रतिमायाः अनावरणकार्यक्रमं सम्बोधयन् एतानि वचनानि उक्तवान्। अस्मिन् अवसरे भव्यः चलसमारोहः अपि आयोजितः। पावरहाउसचौराहास्थिते कार्यक्रमस्थले आयोजिते समारोहे राजस्वमन्त्री वर्मा तथा कार्तिकेयचौहानः महाराणाप्रतापस्य प्रतिमायाः विधिवदनावरणं कृतवन्तौ। अस्मिन् अवसरे नगरे भव्यः चलसमारोहः निष्कासितः। चलसमारोहे महाराणाप्रतापस्य जीवनं शौर्यं च प्रदर्शयन्त्यः झाङ्क्यः आकर्षणस्य केन्द्रम् अभवन्। अस्मिन् अवसरे विधायकः सुदेशरायः, भाजपाजिलाध्यक्षः नरेशमेवाडा तथा नगरपालिकाध्यक्षः प्रिन्सराठौरः अपि सहभागी अभवन्।

अस्मिन् अवसरे राजस्वमन्त्री वर्मा उक्तवान् यत् महाराणाप्रतापः केवलं वीरयोद्धा एव नासीत्, अपितु स्वाभिमानस्य स्वतन्त्रतायाः च प्रतीकः आसीत्। महाराणाप्रतापस्य आदर्शाः अद्यापि युवजनान् राष्ट्रहिते कार्यं कर्तुं तथा स्वकर्तव्यस्य निष्ठापूर्वकं पालनं कर्तुं प्रेरयन्ति। तस्य जीवनम् अस्मान् शिक्षयति यत् कठिनतमासु परिस्थितिषु अपि स्वसिद्धान्तानां मूल्यनां च परित्यागः न कर्तव्यः। महाराणाप्रतापस्य गौरवगाथा आगामिसंततीः सदा प्रेरयन्ती भविष्यति।

वर्मा उक्तवान् यत् महापुरुषाणां जीवनात् प्रेरणां गृहीत्वैव समाजस्य राष्ट्रस्य च सशक्तनिर्माणं कर्तुं शक्यते। तेन युवभ्यः आह्वानं कृतं यत् ते महाराणाप्रतापस्य आदर्शान् स्वजीवने आत्मसात्कुर्वन्तु तथा राष्ट्रस्य एकता अखण्डता विकासे च सक्रियं योगदानं ददतु। अस्मिन् अवसरे नगरपालिकाध्यक्षः प्रिन्सराठौरः अपि सम्बोधितवान्।

कार्यक्रमे जनप्रतिनिधयः समाजसेविनः तथा बहुसंख्यकाः नागरिकाः महाराणाप्रतापस्य प्रतिमायां पुष्पाञ्जलिं समर्प्य तस्मै श्रद्धाञ्जलिं प्रदत्तवन्तः। कार्यक्रमे पङ्कजगुप्तः, नारायणसिंहपटेलः, नरेन्द्रराजपूतः सहिताः जनप्रतिनिधयः नागरिकाश्च उपस्थिताः आसन्।

---------------

Hindusthan Samachar / Dheeraj Maithani