कोलकाता, 17 जूनमासः (हि.स.)। कोलकातानगरनिगमः स्पष्टतया उक्तवान् यत् जनकल्याणशिविरस्य बुधवासरे समापनानन्तरमपि आयुष्मानभारतयोजनायाः अन्यासां शासकीययोजनानां च आवेदनपत्रसमर्पणप्रक्रिया निरन्तरं प्रवर्तिष्यते। निगमस्य अस्य घोषणया तेषां सहस्रशः जनानां रक्षणम्अभवत् ये शिविरेषु दीर्घपङ्क्तीनां कारणात् समये आवेदनपत्राणि समर्पयितुं न शक्तवन्तः।

नगरनिगमस्य अधिकारिणां अनुसारम् जनकल्याणशिविरस्य समापनानन्तरमपि आवेदकाः सम्बन्धितेषु बोरोकार्यालयेषु गत्वा स्वानि आवेदनपत्राणि समर्पयितुं शक्नुवन्ति। अधिकारिणः जनान् प्रति आवेदितवन्तः यत् कस्यापि प्रकारस्य चिन्ता न क्रियताम् यतः आवेदनप्रक्रिया न निरुध्यते।

आयुष्मानभारतयोजनायां नामाङ्कनविषये प्रसृते भ्रमावस्थायां निगमेन पात्रतासम्बद्धाः नियमाः अपि स्पष्टीकृताः। निगमस्रोतसां अनुसारं सप्ततिवर्षीयाः अथवा ततोऽधिकवयस्काः सर्वे निवासिनः विना कस्यापि अतिरिक्तपात्रतापरीक्षणस्य योजनायाः परिधौ समावेशिताः भविष्यन्ति। अपरं सप्ततिवर्षेभ्यः न्यूनवयस्कानां आवेदकानां कृते निर्धारिताः पात्रतामानदण्डाः प्रवर्तिष्यन्ते।

नगरनिगमस्य एकः अधिकारी उक्तवान् यत् गतदिनेषु सहस्रशः जनाः आवेदनपत्रसमर्पणार्थं शिविरेषु उपस्थिताः अभवन्। तथापि ये जनाः अद्यापि आवेदनपत्रं समर्पयितुं न शक्नुवन्ति ते पश्चात् स्वक्षेत्रस्य बोरोकार्यकारीस्वास्थ्याधिकारिणः कार्यालये आवेदनपत्रं समर्पयितुं शक्नुवन्ति।

सोमवासरात् आरब्धः त्रिदिवसीयः जनकल्याणशिविरः बुधवासरे समाप्तिं गच्छति किन्तु ततः परम् अपि आवेदनस्वीकारव्यवस्था निरन्तरं प्रवर्तिष्यते। अस्मिन् मध्ये स्वास्थ्यसाथीयोजनायाः लाभार्थिनाम् मध्ये अपि भ्रमावस्था दृश्यते। बहवः जनाः एतत् न ज्ञातवन्तः यत् तैः नूतनम् आवेदनपत्रं पूरणीयं वा अथवा शासकीयकर्मचारिणः गृहे गृहे गत्वा आयुष्मानभारतयोजनायां समावेशनप्रक्रियां पूर्णां करिष्यन्ति।

राज्यशासनस्य एकः अधिकारी उक्तवान् यत् पूर्वमेव षट्कोट्यधिकानि पूर्वपूरितानि आवेदनपत्राणि सज्जीकृतानि सन्ति। आशाकार्मिकाः गृहे गृहे गत्वा परिचयपत्राणां सत्यापनं करिष्यन्ति आवश्यकसूचनानां च मिलनं करिष्यन्ति। आधारसंख्यायाः परीक्षणस्य आधारेण एतत् निर्धारितं क्रियते यत् कः नूतनम् आवेदनपत्रं पूरयेत् कः वा न पूरयेत्।

अधिकारिणां मतम् अस्ति यत् स्वास्थ्यसाथीयोजना सार्वभौमस्वास्थ्यबीमायोजना अस्ति यदा तु आयुष्मानभारतयोजनायां समावेशनार्थं निर्धारितपात्रतामानदण्डानां पालनम् आवश्यकम् अस्ति। अतः आवेदनसत्यापनप्रक्रिया अपेक्षया अधिकविस्तृता अस्ति।

उल्लेखनीयम् अस्ति यत् कोलकातानगरस्य प्रायः सर्वेषु जनकल्याणशिविरेषु गतदिनेषु आवेदनपत्रग्रहणसमर्पणयोः कृते दीर्घाः पङ्क्तयः दृश्यन्ते स्म। नगरनिगमस्य अस्य घोषणानन्तरम् आवेदकानाम् उपरि दबावस्य न्यूनीकरणं प्रक्रियासम्बद्धचिन्तायाश्च निवारणं भविष्यति इति अपेक्षा वर्तते।------------------

Hindusthan Samachar / Dheeraj Maithani