कोलकाता, 18 जूनमासः (हि.स.)। तृणमूलकाङ्ग्रेसदलस्य वरिष्ठनेता अरूपविश्वासः दलस्य बैङ्कलेखातः कस्यापि प्रकारस्य वित्तीयव्यवहारस्य निरोधनस्य मागं कृत्वा एकस्य निजीबैङ्कस्य सेन्ट्रलप्लाजाशाखायाः प्रबन्धकाय पत्रम् अलिखत्। पत्रे तेन स्वयम् अखिलभारतीयतृणमूलकाङ्ग्रेसदलस्य कोषाध्यक्षः इति निर्दिष्टम् अस्ति तथा च दलस्य लेखस्य सुरक्षां दृष्ट्वा व्यवहारनिरोधनस्य अनुरोधः कृतः अस्ति।

किन्तु अरूपविश्वासस्य अस्मिन् पदक्षेपे दलस्य अन्तरे एव प्रश्नाः उत्थापिताः सन्ति। तृणमूलकाङ्ग्रेसदलस्य पञ्चमजूनदिने सम्पन्नायां कार्यकारिणीसमितेः उपवेशने शुभाशीषचक्रवर्ती दलस्य नूतनः कोषाध्यक्षः इति घोषितः आसीत्। अतः अरूपविश्वासेन कोषाध्यक्षरूपेण बैङ्काय पत्रप्रेषणस्य अधिकारं प्रति विवादः उत्पन्नः अस्ति।

सूत्राणां अनुसारेण अरूपविश्वासस्य पत्रे षोडशजूनदिनाङ्कः उल्लिखितः अस्ति। पत्रे तेन दलस्य अन्तः सम्प्रति अस्थिरपरिस्थितिः विद्यमाना इति प्रतिपादितम्। तेन लिखितम् यत् संसदीयदले विधायकदले च विभाजनस्य स्थितिः उत्पन्ना अस्ति तथा च दलस्य निर्वाचनचिह्नस्य कोषस्य च नियन्त्रणं प्रति जटिलता अपि जाता अस्ति।

पत्रे बैङ्कप्रबन्धनस्य समीपे अनुरोधः कृतः यत् विवादस्य स्थितिः स्पष्टा न भवति तावत् दलस्य बैङ्कलेखातः सर्वेषां व्यवहाराणां निरोधनं क्रियताम्, येन दलनिधिः सुरक्षितः तिष्ठेत् तथा च कस्यापि वित्तीयानियमिततायाः आशङ्का न भवेत्।

राजनीतिविशेषज्ञाः मन्यन्ते यत् अरूपविश्वासस्य अनेन पत्रेण तृणमूलकाङ्ग्रेसदलस्य अन्तः प्रचलितः सङ्गठनात्मकविवादः अधिकं गभीरः भवितुम् अर्हति। तेन सह दलस्य वित्तीयाधिकारानां वैधानिकप्रतिनिधित्वस्य च विषये नूतनः विवादः अपि उत्पद्येत इति सम्भावना वर्तते।

दलनेतृत्वस्य पक्षतः अद्यावधि अस्मिन् विषये काचित् आधिकारिकप्रतिक्रिया न प्राप्ता, किन्तु अरूपविश्वासस्य अनेन पदक्षेपेण तृणमूलकाङ्ग्रेसदलस्य आन्तरिकराजनीतौ नूतना हलचलः उत्पन्ना अस्ति।

Hindusthan Samachar / Dheeraj Maithani