नाहनम्, १८ जूनमासः (हि.स.)। रोटरी-क्लब-नाहनस्य प्रयासैः राजकीय-प्राथमिकपाठशालायै रामपुर-जटानाय शतं विद्यालयोपवेशनपीठिकाः प्रदत्ताः। अस्मिन्नवसरे विद्यालयपरिसरे सरलः कार्यक्रमः आयोजितः।

रोटरी-क्लब-नाहनस्य अध्यक्षः मनीष-जैनः अवदत् यत् विद्यालयप्रबन्धनेन क्लब प्रति उपवेशन-पट्टिकानां तथा समुचितोपवेशन-व्यवस्थायाः आवश्यकताविषये सूचितम् आसीत्। विद्यालये प्रायः द्विशतं विद्यार्थिनः अध्ययनरताः सन्ति, येषु अधिकांशाः श्रमिकपरिवारेभ्यः आर्थिक-दृष्ट्या दुर्बलपरिवारेभ्यश्च सम्बद्धाः सन्ति। बालकाः भूमौ उपविश्य अध्ययनं कर्तुं विवशाः आसन्।

एतस्याः आवश्यकतायाः दृष्ट्या रोटरी-क्लब-नाहनेन एषः विषयः जनपद-उद्योगकेन्द्रस्य महाप्रबन्धकस्य रचित-शर्मणः पुरतः प्रस्तुतः। तस्य सहयोगेन एषा अपेक्षा विर्गो-एल्युमिनियम् तथा श्रीरामप्रकाश-विर्गो-फाउण्डेशन इत्येतयोः संस्थयोः समीपम् प्रापिता। फलतः श्रीरामप्रकाश-विर्गो-फाउण्डेशन-इत्यनेन स्वस्य निगम-सामाजिक-उत्तरदायित्व-कार्यक्रमस्य अन्तर्गतं विद्यालयाय शतं विद्यालयोपवेशनपीठिकाः प्रदत्ताः।

Hindusthan Samachar / Divya Ranjan