शिलांग, 19 जून (हि.स.)।

केन्द्रीयवित्तमन्त्री निर्मलासीतारमण अवदत् यत् पूर्वोत्तरक्षेत्रं सततकृष्या, उत्कृष्टजैविकोत्पादैः तथा पर्यावरणा-नुकूलविकासस्य आधारेण भारतस्य आगामीविकासशक्तिः भवितुं शक्नोति। तया उक्तं यत् अस्य क्षेत्रस्य प्राकृतिकसम्पदः पारम्परिककृषिपद्धतयश्च वैश्विकविपण्यां विशेषपरिचयं प्राप्तुं सामर्थ्यं धारयन्ति।

मेघालयराज्यस्य रीभोईजनपदस्य भोइरिमबोंगस्थले ईस्टर्न रीभोई ऑर्गेनिक फार्मर प्रोड्यूसर कम्पनी लिमिटेड संस्थायाः पूर्वोत्तरक्षेत्रस्य बृहत्तमस्य जैविकमसाला-प्रसंस्करणसंयन्त्रस्य उद्घाटनानन्तरं शुक्रवासरे आयोजितं कार्यक्रमम् सम्बोधयन्ती वित्तमन्त्री अवदत् यत् कृषेः भविष्यं केवलम् अधिकोत्पादनकर्तृणां न भविष्यति, अपितु श्रेष्ठान्, स्वच्छान्, विश्वसनीयान् तथा अनुरेखणयोग्यान् उत्पादान् प्रदातृणामेव भविष्यति।

तया उक्तं यत् मेघालयराज्यं जैविककृषिक्षेत्रे विशिष्टपरिचयं प्राप्तवती अस्ति। राज्यस्य कृष्योत्पादेषु पारम्परिककृषौ च उपभोक्तृणां विश्वासः निरन्तरं वर्धते, येन अन्तरराष्ट्रीयविपण्यां तेषां श्रेष्ठमूल्यप्राप्तेः सम्भावना वर्धते। तया उक्तं यत् विश्वम् अद्य तादृशे काले प्रविशति यत्र विश्वासः स्वयं मूल्यवती सम्पत्तिः जातः अस्ति, तथा च मेघालयः अस्मिन् दृष्टिकोणे अत्यन्तं सुदृढस्थितौ वर्तते।

सीतारमण अवदत् यत् मेघालयस्य वर्धमाना मसालाअर्थव्यवस्था एतत् प्रमाणयति यत् आर्थिकविकासः पर्यावरणसंरक्षणं च सहैव अग्रे गन्तुं शक्नुतः। तया बलं दत्तं यत् विकासप्रक्रिया प्रकृतेः मूल्येन न भवेत् तथा च मानवसमाजेन प्रकृत्या सह सामञ्जस्यं स्थापयित्वा एव प्रगतिः कर्तव्या।

भारतं २०४७ तमवर्षपर्यन्तं विकसितराष्ट्रं कर्तुम् इति लक्ष्यस्य उल्लेखं कुर्वन्ती तया उक्तं यत् “विकसितभारतस्य” निर्माणे देशस्य प्रत्येकक्षेत्रस्य समुदायस्य च सहभागिता आवश्यकी अस्ति। तस्याः मते पूर्वोत्तरक्षेत्रं अस्यां राष्ट्रियविकासयात्रायां केन्द्रीयां भूमिकां निर्वहिष्यति तथा च भविष्ये देशस्य नेतृत्वं कर्तुं सामर्थ्यं धारयति।

वित्तमन्त्री अवदत् यत् उन्नतप्रसंस्करणसुविधाः सुदृढाः उत्पादकसहकारीसंस्थाश्च कृषकाणां विशेषतः पारम्परिककृषिसम्बद्धानां महिलानां च अधिकलाभप्राप्तौ सहायकाः भविष्यन्ति। एतेन स्थानीयोत्पादानां वैश्विकपरिचयः वर्धिष्यते तथा च कृषकाणाम् आयवृद्धिः भविष्यति।

नवनिर्मितेन मसालाप्रसंस्करणसंयन्त्रेण लाकाडोंगहरिद्रा, आर्द्रकं तथा मरिचम् इत्यादीनां शस्योत्पादकानां कृते उत्तमविपणी उपलब्धा भविष्यति। एषा परियोजना राज्यस्य जैविककृषितन्त्रस्य सुदृढीकरणाय, कृषिनिर्यातवृद्धये तथा क्षेत्रे स्थायिजीविकायाः नूतनावसरसृजनाय च महत्त्वपूर्णं पदक्षेपं मन्यते।

----------

Hindusthan Samachar / Dheeraj Maithani