प्योङ्गयाङ्ग/इस्तान्बुलनगरम्, जूनमासः १९ दिनाङ्कः (हि.स.)। उत्तरकोरियादेशेन जी-७ राष्ट्रैः तस्य परमाण्वस्त्रकार्यक्रमस्य समापनार्थं कृता याचना तीव्रतया प्रत्याख्याता। उत्तरकोरियादेशस्य सर्वोच्चनेतुः किम् जोङ्ग-उन इत्यस्य भगिनी तथा सत्तारूढ-वर्कर्स-पार्टी इत्यस्याः वरिष्ठाधिकारिणी किम यो-जोङ्ग: उक्तवती यत् उत्तरकोरियादेशस्य परमाणुशक्तिसम्पन्नराष्ट्ररूपेण स्थितिः अपरिवर्तनीया वास्तविकता अस्ति, या कस्यापि परिस्थितेः कारणात् परिवर्तयितुं न शक्यते।

उत्तरकोरियादेशस्य शासकीयवार्तासंस्था कोरियन् सेन्ट्रल न्यूज़ संस्थाया: अनुसारं गुरुवासरस्य रात्रौ प्रकाशिते वक्तव्ये किम् यो-जोङ्ग: अवदत् यत् उत्तरकोरियादेशस्य परमाण्वस्त्रसञ्चयः राष्ट्रस्य प्रमुखेषु राष्ट्रियहितेषु अन्यतमः अस्ति तथा बाह्यसङ्कटानां विरुद्धम् आत्मरक्षणस्य महत्त्वपूर्णं साधनम् अस्ति। सा इदमपि अवदत् यत् उत्तरकोरियादेशस्य परमाणुस्थितिं दुर्बलीकर्तुं कृतः कश्चन प्रयासः गम्भीरान् परिणामान् जनयितुं शक्नोति।

एषा प्रतिक्रिया जी-७ राष्ट्राणां नव्यतमसम्मेलनानन्तरम् आगता। फ्रान्सदेशस्य एवियान-नगरे सम्पन्ने जी-७ शिखरसम्मेलने सदस्यराष्ट्राणि संयुक्तराष्ट्रसुरक्षापरिषदः प्रस्तावानामनुसारं उत्तरकोरियादेशस्य पूर्णपरमाणुनिरस्त्रीकरणं प्रति स्वप्रतिबद्धतां पुनरुक्तम्। तैः उत्तरकोरियादेशस्य परमाणुकार्यक्रमे तथा बैलिस्टिक-प्रक्षेपास्त्रकार्यक्रमे चिन्ता व्यक्ता, साइबर-अपराधानां तथा क्रिप्टोमुद्राचौर्यस्य निवारणाय परस्परसहयोगवृद्धेः संकल्पश्च कृतः।

किम् यो-जोङ्ग् जी-७ राष्ट्राणां याचनाम् पुरातनीम् अव्यावहारिकीं च इति निरूप्य उक्तवती यत् अन्ताराष्ट्रियदप्रभावेण प्योङ्गयाङ्गस्य परमाणुनीतौ कदापि परिवर्तनं न भविष्यति। सा पुनरपि प्रतिपादितवती यत् उत्तरकोरिया स्वस्य परमाणुक्षमतां अधिकं सुदृढां कर्तुं स्वनीतौ दृढतया स्थितः भविष्यति।

अन्यस्मिन् पक्षे, योनहाप् न्यूज़् इत्यस्य अनुसारं दक्षिणकोरियादेशस्य राष्ट्रपतिः लीजेम्युङ्ग: अवदत् यत् अमेरिकादेशस्य राष्ट्रपतिः डोनाल्ड् ट्रम्पः उत्तरकोरियादेशेन परमाण्वस्त्रप्राप्तेः पूर्वम् प्रभावी उपायानां न कृतत्वे विषादम् अभिव्यक्तवान्। फ्रान्सदेशे जी-७ शिखरसम्मेलनस्य अवसरे उभयोः नेत्रयोः सम्पन्ने साक्षात्कारे लीजेम्युङ्ग: ट्रम्पम् उत्तरकोरियादेशस्य परमाणु-विषयस्य सर्वोच्चप्राथमिकतया ग्राह्यताम् आग्रहवान्। ट्रम्पः तस्मिन् विषये सम्मतिं प्रदर्श्य वर्तमानपरिस्थितेः विषये चिन्ताम् अपि व्यक्तवान्।

उत्तरकोरियादेशस्य परमाणुकार्यक्रमं प्रति अन्ताराष्ट्रियसमुदायस्य प्योङ्गयाङ्गस्य च मध्ये युद्वं पुनरेकवारं वर्धमानं दृश्यते, येन प्रादेशिकसुरक्षायाः तथा कूटनीतिक-प्रयत्नानां समक्षं नवीनाः समस्या: उत्पद्यन्ते।

Hindusthan Samachar / Divya Ranjan