पौड़ी-गढ़वाल-जनपदः, ०२ जूनमासः (हि.स.)। विकासखण्डस्य खिर्सू-क्षेत्रे मङ्गलवासरे विविध-विकास-कार्यक्रमाणां लोकार्पणं शिलान्यासं च सम्पन्नम्। प्रदेशस्य मन्त्रिमण्डलीय-मन्त्री डॉ.धनसिंह-रावतः थानधारतः उल्ली-ग्रामपर्यन्तं निर्मितस्य द्वि-किलोमीटर-दीर्घस्य मोटर-मार्गस्य लोकार्पणं कृतवान्। ५८.२२ लक्ष-रुप्यक-व्ययेन निर्मितः अयं मार्गः क्षेत्रवासिनां आवागमने सुविधां प्रदास्यति।

अस्मिन् अवसरे मन्त्रिणा उल्ली-ग्रामे पर्यटकानां सुविधार्थं पञ्च-लक्ष-रुप्यक-व्ययेन निर्मीयमाणस्य यात्रि-प्रतीक्षालयस्य शिलान्यासः अपि कृतः। तेन उक्तं यत् अनेन क्षेत्रम् आगच्छद्भ्यः पर्यटकेभ्यः आवश्यकाः सुविधाः उपलब्धाः भविष्यन्ति।

मन्त्रिणा खिर्सू-माण्डाखाल-मोटर-मार्गे बिडोली-स्थाने निर्मितस्य दृश्यावलोकन-स्थलस्य (व्यू-पॉइण्ट्) अपि लोकार्पणं कृतम्। तेन उक्तं यत् एतत् स्थलम् यात्रिभ्यः विश्रामस्य अवसरं प्रदास्यति तथा क्षेत्रस्य प्राकृतिक-सौन्दर्यस्य अवलोकनाय अपि उपयुक्तं भविष्यति।

सः अवदत् यत् राज्य-सर्वकारः ग्रामीण-क्षेत्रेषु मार्ग-शिक्षा-स्वास्थ्य-पेयजल-पर्यटन-सम्बद्धानां आधारभूत-सुविधानां विकासाय निरन्तरं कार्यं करोति। अस्मिन् अवसरे पौड़ी-विधानसभा-क्षेत्रस्य विधायकः राजकुमार-पोरी, खिर्सू-विकासखण्डस्य प्रमुखः अनिल-भण्डारी, ज्येष्ठ-उपप्रमुखः नितिन-रावतः तथा अन्ये गणमान्यजनाः उपस्थिताः आसन्।

Hindusthan Samachar / Divya Ranjan