भोपालनगरम्, 20 जूनमासः (हि.स.)। अन्ताराष्ट्रिय-योगदिवसात् एकदिनपूर्वं शनिवासरे प्रातः राजधानी भोपालनगरं पूर्णतया योगमयम् जातम्। दीर्घतडागस्य बोट-क्लबतः टीटी-नगर-स्टेडियमपर्यन्तं आयोजितेषु विविधेषु कार्यक्रमेषु सहस्रशः यूनां, क्रीडकानां तथा नागरिकाणां उत्साहपूर्वकं सहभागेन सह स्वस्थ-सन्तुलित-जीवनस्य सन्देशः प्रदत्तः। योगविषये यूनां वर्धमाना जागरूकता सहभागिता च कार्यक्रमं विशेषं कृतवती।

टीटी-नगर-स्टेडियममध्ये आयोजिते मुख्यकार्यक्रमे केन्द्रीय-रक्षाराज्यमन्त्री संजय-सेठः तथा राज्यस्य सहकारिता-क्रीडा-युवा-कल्याणमन्त्री विश्वास-सारङ्गः सहस्रशः प्रतिभागिभिः सह सामूहिक-योगाभ्यासं कृतवन्तौ। प्रातःकालादेव स्टेडियममध्ये यूनां, क्रीडकाणां सामान्यनागरिकाणां च उत्साहः द्रष्टुं योग्यम् आसीत्। योगसत्रकाले सम्पूर्णः परिसरः अनुशासनेन, सकारात्मक-ऊर्जया च उत्साहेन च आप्लावितं दृश्यम् आसीत्।

अस्मिन् अवसरे केन्द्रीय-रक्षाराज्यमन्त्री संजय-सेठः अवदत् यत् योगः केवलं शारीरिकव्यायामः न, अपि तु स्वस्थ-सन्तुलित-सकारात्मक-जीवनशैल्याः आधारः अस्ति। नियमितयोगेन शरीरं स्वस्थं भवति, मानसिक-शान्तिः आत्मिक-सन्तुलनं च लभ्यते। सः यून: योगं स्व-दैनिक-चर्यायाः अङ्गं कर्तुं अपि आह्वानं कृतवान्।

दीर्घतडाग-तटे योगस्य संगमः

मुख्यकार्यक्रमानन्तरं मन्त्री विश्वास-सारङ्गः दीर्घतडाग-स्थिते बोट-क्लबमध्ये आयोजिते योगसत्रे अपि सम्मिलितः अभवत्। प्राकृतिकपर्यावरणे मनोहरदृश्ये च सहस्रशः यूनां सामूहिक-योगाभ्यासेन सह फिट-एवं-स्वस्थ-जीवनस्य संकल्पः गृहीतः। तालाबतटे योगं कुर्वतां यूनां दृश्यं आकर्षणस्य केन्द्रं जातम्, सम्पूर्णे क्षेत्रे स्वास्थ्य-जागरूकता-सन्देशः प्रतिध्वनितः अभवत्।

योगः वैश्विक-मान्यतां प्राप्तवान्

मन्त्री विश्वास-सारङ्गः अवदत् यत् प्रधानमन्त्री नरेन्द्रमोदी-प्रयत्नैः भारतस्य प्राचीन-योगपरम्परा वैश्विकां मान्यतां प्राप्तवती। अद्य विश्वस्य 190 अधिकेषु देशेषु योगः स्वीकृतः अस्ति, तथा अन्ताराष्ट्रिय-योगदिवसे कोटिशः जनाः सामूहिकरूपेण योगाभ्यासं कुर्वन्ति। एषः भारतीयसंस्कृतेः ज्ञानपरम्परायाः च वैश्विकस्वीकारस्य प्रमाणम् अस्ति। सः उक्तवान् यत् योगः स्वस्थशरीरस्य, शान्तमनसः, सशक्तव्यक्तित्वस्य च निर्माणे अत्यन्तं प्रभावात्मक: उपायः अस्ति। एतत् केवलं रोगनिवारणस्य साधनं न, अपि तु उत्तमजीवनजीवनकला अपि शिक्षयति।

यूनां फिट-इण्डिया-सन्देशः

कार्यक्रमेषु यूनां उल्लेखनीय-सहभागितया इदं सिद्धं जातं यत् नववंश: स्वास्थ्य-फिटनेस-मानसिक-सन्तुलनविषये अधिकं सजग: अभवत्। सामूहिक-योगाभ्यासद्वारा यूनां स्वस्थभारतस्य तथा फिट-इण्डिया-संकल्पस्य सुदृढीकरणं कृतम्। अन्ताराष्ट्रिय-योगदिवसपूर्वसन्ध्यायां आयोजितैः एतैः कार्यक्रमैः राजधानी योगमय-वातावरणेन आलोकिता अभवत् तथा स्वस्थ-जागरूक-सशक्तसमाज-निर्माणदिशि नवऊर्जा प्रवाहिता।

Hindusthan Samachar / Divya Ranjan