नवदिल्ली, 20 जूनमासः (हि.स.)। राष्ट्रियपात्रतासहप्रवेशपरीक्षायाः नीट पुनर्परीक्षासम्बद्धे प्रकरणे एकस्मै छात्राय प्रवेशपत्रे त्रुटिपूर्णरीत्या अन्यत् परीक्षाकेन्द्रम् आवंटितम् इति विषयः राजनीतिकविवादस्य कारणं जातः। कांग्रेससांसदः तथा लोकसभायां प्रतिपक्षनेता राहुलगान्धी अस्य घटनाविषये राष्ट्रियपरीक्षणसंस्थां प्रति गम्भीरान् प्रश्नान् उत्थापितवान् तथा च एतत् छात्राणां भविष्येन सह क्रीडारूपम् इति उक्तवान्।

राहुलगान्धी सामाजिकमाध्यममञ्चे एक्स इति माध्यमे एतं विषयम् उत्थाप्य उक्तवान् यत् नागपुरनगरस्य एकस्मै छात्राय पुनर्परीक्षार्थं प्रदत्ते प्रवेशपत्रे अबूधाबीस्थं परीक्षाकेन्द्रम् आवंटितम्, यद्यपि तस्य समीपे पारपत्रं नास्ति तथा च तस्य परिवारस्य विदेशं गत्वा परीक्षां दातुं आवश्यकाः आर्थिकसंसाधनाः अपि न सन्ति।

तेन उक्तं यत् परीक्षातिथेः अत्यन्तसमीपे आगते सति छात्रस्य समीपे अस्याः त्रुटेः संशोधनार्थं पर्याप्तः समयः अपि न अवशिष्टः। राहुलगान्धिनः अनुसारं अस्याः गम्भीरप्रशासनिकत्रुटेः कारणात् छात्रः मानसिकचिन्तायां निमग्नः अभवत् तथा च सः सम्पूर्णां रात्रिं रुदन् आसीत्, अनन्तरं तेन परीक्षायां सहभागित्वम् अपि अस्वीकृतम्।

कांग्रेसनेता उक्तवान् यत् एषा स्थितिः राष्ट्रस्य शिक्षाव्यवस्थायाः विषये गम्भीरं प्रश्नचिह्नं स्थापयति। तेन आरोपः कृतः यत् वर्तमानव्यवस्था छात्राणां भविष्येन, समयेन तथा मानसिकशान्त्या सह क्रीडति तथा च तस्याः त्वरितं सुधारः आवश्यकः अस्ति। राहुलगान्धी उक्तवान् यत् बालकानां भविष्येन सह एतादृशी प्रमादपूर्णता ग्राह्या नास्ति तथा च तेभ्यः अधिका संवेदनशीला, उत्तरदायिनी तथा जवाबदेहपरीक्षाव्यवस्था अपेक्षिता अस्ति।

उल्लेखनीयम् अस्ति यत् विषयस्य प्रकाशे आगमनानन्तरं राष्ट्रियपरीक्षणसंस्था सामाजिकमाध्यमेषु प्रतिक्रियां दत्त्वा उक्तवती यत् शिकायतायाः विषये त्वरितकार्यवाही क्रियते। संस्थया स्पष्टतया उक्तं यत् समुचितसत्यापनानन्तरं सम्बन्धिताय अभ्यर्थिने नागपुरे एव परीक्षाकेन्द्रम् आवंटितं भविष्यति तथा च नूतनं प्रवेशपत्रम् अपि प्रदास्यते।

राष्ट्रियपरीक्षणसंस्थया उक्तं यत् सम्बन्धितः छात्रः अब्दुल्लामोहम्मदतालिब तांत्रिकत्रुटेः कारणात् त्रुटिपूर्णरीत्या अबूधाबीस्थं परीक्षाकेन्द्रम् प्राप्तवान् आसीत्, यस्य संशोधनप्रक्रिया त्वरितमेव प्रारब्धा अस्ति।------------

Hindusthan Samachar / Dheeraj Maithani