लखनऊनगरम्, 20 जूनमासः (हि.स.)। उत्तरप्रदेशस्य उपमुख्यमन्त्री केशवप्रसाद-मौर्यः अवदत् यत् एकः कालः आसीत् यदा पूर्वोत्तर-भारतं देशस्य विकास-मानचित्रे प्रायः अन्तिम-प्रदेशः इति दृष्ट्या अवलोक्यते स्म। प्रधानमन्त्री नरेन्द्रमोदी पूर्वोत्तर-भारतं सीमान्त-प्रदेशः इति न मन्यमानः, अपितु भारतस्य सामर्थ्यस्य सम्भावनानां च प्रवेशद्वारम् इति अभिमन्यते। गत-द्वादश-वर्षेषु पूर्वोत्तर-भारतं विकासस्य, सम्पर्कस्य तथा शान्तेः नूतनाध्यायस्य साक्षी अभवत्।

उपमुख्यमन्त्री शनिवासरे स्वस्य सामाजिक-माध्यमे प्रकाशिते सन्देशे अलिखत् यत् रेलमार्ग-राजमार्ग-वायुमार्ग- तथा जलमार्ग-सम्पर्कस्य क्षेत्रे अभूतपूर्वः विस्तारः अभवत्। षट्चत्वारिंशत्-सहस्राधिक-किलोमीटर-परिमिताः ग्रामीण-मार्गाः, नूतनानि ग्रीनफील्ड-विमानस्थानानि, रेलविभागे अभिलेखीय-निवेशः तथा अन्तर्देशीय-जलमार्गाणां विस्तारः पूर्वोत्तर-भारतं विकासस्य मुख्यधारया सुदृढतया संयोजितवन्तः। अपरञ्च शान्ति-सन्ध्या, सहस्रशः उग्रवादिनाम् आत्मसमर्पणेन तथा वर्धमानाभिः आर्थिक-गतिविधिभिः क्षेत्रे विश्वासस्य स्थैर्यस्य च नूतनं वातावरणं निर्मितम्।

जैविक-कृषिः, पर्यटनम् तथा स्थानीय-उद्यमाः अपि नूतनाम् अभिज्ञतां प्राप्तवन्तः। एषैव मोदी-सर्वकारस्य द्वादश-वर्षाणां विशेषता अस्ति, यत्र पूर्वोत्तर-भारतः उपेक्षातः अवसरम्, अस्थिरतातः विश्वासम्, दूरतातः विकासम् इति दिशि अग्रे नीतः। एतदेव नूतनं भारतम्, यत्र पूर्वोत्तर-भारतं विकसित-भारतस्य विकास-यात्रायाः सशक्तम् आधारम् इव उदितम् अस्ति।

Hindusthan Samachar / Divya Ranjan