दतिया, 20 जूनमासः (हि.स.)।उत्तरप्रदेशस्य मुख्यमन्त्री योगी आदित्यनाथश्शनिवासरे अल्पकालीनप्रवासाय मध्यप्रदेशस्य दतियानगरम् आगतः तथा विश्वविख्याते श्रीपीताम्बरापीठे मातुः बगलामुखीदेव्याः दर्शनं कृत्वा विशेषपूजार्चनां कृतवान्। तेन देशस्य प्रदेशस्य च सुखसमृद्ध्यै, शान्तये, खुशहालजीवनाय च कामना कृता। दर्शनानन्तरं मुख्यमन्त्री झाँसीनगराय प्रस्थितवान्, यत्र सः प्रायः पञ्चदशशतकोटिरूप्यकपरिमितानां विकासपरियोजनानां लोकार्पणं शिलान्यासं च करिष्यति।

मुख्यमन्त्री योगी आदित्यनाथ प्रातः १० वादनस्य १५ निमिषे विशेषविमानेन दतियाविमानपत्तनम् आगतः। तत्र मध्यप्रदेशस्य पूर्वगृहमन्त्री डा. नरोत्तम मिश्र, विधायकः प्रदीप अग्रवाल, जिलाधीशः स्वप्निल वानखडे, पुलिसअधीक्षकः मयूर खंडेलवाल तथा अन्ये जनप्रतिनिधयः प्रशासनिकाधिकारिणश्च तस्य स्वागतं कृतवन्तः। विमानपत्तनात् तस्य वाहनसमूहः प्रत्यक्षं पीताम्बरापीठम् अगच्छत्।

मुख्यमन्त्री योगी आदित्यनाथ प्रथमं मातुः बगलामुखीदेव्याः दर्शनं कृत्वा विशेषपूजार्चनां कृतवान्। ततः सः परिसरस्थितं महाभारतकालीनं प्राचीनं वनखण्डेश्वरमहादेवमन्दिरम् अगच्छत्, यत्र तेन विधिविधानपूर्वकं भगवानः शिवस्य जलाभिषेकः कृतः। मन्दिरन्यासस्य पक्षतः तस्मै मातुः चुनरी तथा प्रसादः समर्पितः।

सुरक्षाव्यवस्थायाः विशेषप्रबन्धाः आसन्

मुख्यमन्त्रिणः आगमनं दृष्ट्वा मन्दिरपरिसरे तदुपकण्ठप्रदेशे च सुरक्षायाः व्यापकाः प्रबन्धाः कृताः आसन्। विशिष्टजनगमनागमनस्य कारणेन मन्दिरपरिसरः प्रायः अर्धद्विघण्टापर्यन्तं सामान्यश्रद्धालुभ्यः पूर्णतया निरुद्धः आसीत्। अस्मिन् काले केवलं दर्शनार्थिनः एव न, अपितु अनेकेषां पण्डितपुरोहितानामपि प्रवेशः निरुद्धः आसीत्। मुख्यमन्त्रिणः दर्शनपूजनयोः समाप्त्यनन्तरं श्रद्धालुभ्यः मन्दिरस्य द्वाराणि पुनः उद्घाटितानि तथा दर्शनव्यवस्था सामान्यरूपेण सञ्चालिता।

मुख्यमन्त्री प्रायः पञ्चदशनिमिषपर्यन्तं पीताम्बरापीठपरिसरे स्थितवान्। अस्मिन् अवसरे प्रशासनिकपुलिसाधिकारिणां दलं पूर्णतया सज्जम् आसीत्। तस्य आगमनस्य कारणेन मन्दिरपरिसरे विशेषोत्साहस्य वातावरणं दृष्टम्।

उपमुख्यमन्त्री केशव मौर्य अपि दर्शनार्थम् आगतः

मुख्यमन्त्रिणः आगमनात् पूर्वं उत्तरप्रदेशस्य उपमुख्यमन्त्री केशव प्रसाद मौर्य अपि शनिवासरे प्रातः दतियाम् आगतः तथा मातुः पीताम्बरायाः दर्शनं कृत्वा पूजार्चनां कृतवान्। तेन अपि प्रदेशस्य देशस्य च समृद्धये जनकल्याणाय च कामना कृता।

झाँसीनगरे विकासकार्याणां सौगातं दास्यति

दतियाप्रवासानन्तरं मुख्यमन्त्री योगी आदित्यनाथ स्थलमार्गेण झाँसीनगराय प्रस्थितवान्। तत्र तस्य प्रायः विंशतिघण्टात्मकः प्रवासः प्रस्तावितः अस्ति। अस्मिन् काले सः विविधविभागानां समीक्षोपवेशनं करिष्यति तथा प्रायः पञ्चदशशतकोटिरूप्यकपरिमितानां विकासपरियोजनानां लोकार्पणं शिलान्यासं च करिष्यति। मुख्यमन्त्रिणः भ्रमणस्य निमित्तं दतिया तथा झाँसी इति उभयोः जनपदयोः प्रशासनं पूर्णतया सक्रियं सजगं च आसीत्।

---------------

Hindusthan Samachar / Dheeraj Maithani