उज्जयिनीनगरम्, २० जूनमासः (हि.स.)। केन्द्रीय-ऊर्जा-तथा-आवास-नगरीयविकासमन्त्री मनोहरलाल-खट्टरः शुक्रवासरस्य रात्रौ उज्जयिनीप्रवासस्य अवसरे महाकालेश्वरमन्दिरपरिसरे स्थितस्य श्रीमहाकालमहालोकस्य अवलोकनं कृतवान्। अस्मिन् अवसरे तेन सह मध्यप्रदेशस्य मुख्यमन्त्री डॉ.मोहनयादवः अपि उपस्थितः आसीत्।

अवलोकनकाले सम्भागायुक्तः आशीषसिंहः केन्द्रीयमन्त्रिणे मनोहर-लालाय महाकाललोके स्थापितानां भगवता शिवेन त्रिपुरासुरस्य संहारं प्रदर्शयन्तीनां तथा अन्यासां प्रतिमानां विषये विस्तृतां सूचनाम् अयच्छत्। ततः परं केन्द्रीयमन्त्री खट्टरः, मुख्यमन्त्री डॉ.यादवः तथा अन्ये जनप्रतिनिधयः रुद्रसागरे आयोजितं प्रकाश-ध्वनि-प्रदर्शनम् अपश्यन्।

श्रीमहाकालमहालोकस्य रुद्रसागरतीरे निर्मिते मञ्चे अतिथीनां आगमनसमये श्रीमहाकालेश्वरमन्दिरप्रबन्धसमित्याः अधीनस्थेन श्रीमहाकालवाद्यवृन्देन “महाकाल सरकार मेरे महाकाल सरकार” इति गीतस्य संगीतमयी प्रस्तुतिः प्रदत्ता। अनन्तरं प्रकाश-ध्वनि-प्रदर्शने लेसर-प्रकाशैः, जलपटलप्रदर्शनेन तथा उत्कृष्टध्वनिप्रभावैः बाबा महाकालस्य, मातुः शिप्रायाः तथा प्राचीनायाः अवन्तिकानगर्याः पौराणिककथाः अतीव मनोहररीत्या प्रदर्शिताः।

प्रकाश-ध्वनि-लेसर-प्रदर्शनस्य दर्शनानन्तरं ई-कार्टयानस्य उपयोगेन श्रीमहाकालमहालोकस्य अवलोकनकाले मुख्यमन्त्री डॉ.यादवः केन्द्रीयमन्त्रिणे खट्टराय तत्र स्थापितानां विविधप्रतिमानां विषये सूचनाम् अयच्छत्।

अस्मिन् अवसरे नगरीयविकास-आवासमन्त्री कैलाशविजयवर्गीयः, राज्यमन्त्री प्रतिमाबागरी, विधायकः अनिलजैन-कालूहेडा, नगरनिगम-सभापतिः कलावतीयादवः, उज्जयिनी-विकासप्राधिकरणस्य अध्यक्षः रविसोलङ्की, संजय-अग्रवालः, अपर-मुख्यसचिवः संजयदुबे, नगरीय-प्रशासनायुक्तः संकेतभोंडवे इत्यादयः जनप्रतिनिधयः वरिष्ठ-अधिकारिणश्च उपस्थिताः आसन्।

एतस्मात् पूर्वं केन्द्रीयमन्त्री मनोहरलालः तथा मुख्यमन्त्री मोहनयादवः विश्वविख्यातं ज्योतिर्लिङ्गं भगवान्-महाकालेश्वरमन्दिरं गत्वा बाबामहाकालस्य दर्शनं कृत्वा आशीर्वादं प्राप्तवन्तौ। तौ भगवतः महाकालस्य पूजार्चनमपि कृतवन्तौ।

Hindusthan Samachar / Divya Ranjan