पलवलनगरम्, २० जूनमासः (हि.स.)। केन्द्रीय-सहकारिता-राज्यमन्त्री कृष्णपाल-गुर्जरः पलवलनगरे प्रबुद्धजनैः सह सभां कृत्वा केन्द्रसर्वकारस्य गत-द्वादश-वर्षाणां प्रमुख-उपलब्धीः अवगतवान्। अस्मिन् अवसरे तेन सर्वकारस्य उपलब्धीनां पुस्तिका वितरिता तथा प्रबुद्धजनाः सम्मानिताः।

सभां सम्बोधयन् कृष्णपाल-गुर्जरः अवदत् यत् प्रधानमन्त्रिणः नरेन्द्रमोदिनः नेतृत्वे केन्द्रसर्वकारस्य द्वादश-वर्षाणि विकासाय, विश्वासाय जनकल्याणाय च समर्पितानि सन्ति। तेन उक्तं यत् प्रधानमन्त्रिणा राष्ट्रनिर्माणं सर्वोच्च-प्राथमिकतया स्वीकृत्य भारताय नूतना दिशा वैश्विकी च प्रतिष्ठा प्रदत्ता।

तेन उक्तं यत् गत-द्वादश-वर्षेषु आधारभूत-संरचनायाः, स्वास्थ्यस्य, शिक्षायाः, परिवहनस्य तथा रक्षाक्षेत्रस्य अभूतपूर्वा प्रगतिः अभवत्। देशव्यापि द्रुतमार्गाणां राष्ट्रीय-राजमार्गाणां च विस्तारः कृतः। विमानस्थानानां चिकित्सा-महाविद्यालयानां च सङ्ख्या अपि उल्लेखनीयरूपेण वर्धिता। रेलमार्गस्य आधुनिकीकरणेन विद्युतीकरणेन च यातायात-व्यवस्था अधिका सुदृढा जाता, पर्यावरण-संरक्षणमपि प्रोत्साहितम्।

गुर्जरः अवदत् यत् जम्मू-कश्मीरात् अनुच्छेदस्य ३७० अपसारणम्, अयोध्यायां राममन्दिरस्य निर्माणम्, काशी-विश्वनाथ-धाम्नः, केदारनाथ-धाम्नः तथा महाकाल-मन्दिरस्य विकासश्च देशस्य सांस्कृतिक-परम्परां नूतनां दृढतां प्रदत्तवन्तः। तेन उक्तं यत् भारतम् अद्य विश्वस्य शीघ्रतम-विकासशीलासु प्रमुख-अर्थव्यवस्थासु अन्यतमम् अस्ति। विकसित-भारतस्य लक्ष्यस्य सिद्ध्यर्थं प्रत्येकस्य नागरिकस्य सहभागिता अनिवार्या इति तेन प्रतिपादितम्।

अस्मिन् अवसरे विधायकः हरेंद्रसिंहः, भाजपा-जनपदाध्यक्षः विपिन-बैंसला, उपायुक्तः डॉ. जयेंद्रसिंह-छिल्लरः तथा अन्ये गणमान्याः उपस्थिताः आसन्।

Hindusthan Samachar / Divya Ranjan