Enter your Email Address to subscribe to our newsletters
दोहानगरम्, २० जूनमासः (हि.स.)। भारतीयः कुन्तप्रक्षेपकः नीरजः चोपड़ा प्रायः अष्टमासानन्तरं स्पर्धात्मकक्षेत्रं पुनरागत्य शुक्रवासरे रात्रौ दोहा-डायमण्ड-लीग् २०२६ स्पर्धायां चतुर्थस्थानं प्राप्तवान्। यद्यपि सः पदकप्राप्तेः अवसरं न प्राप्तवान्, तथापि राष्ट्रमण्डलक्रीडा-२०२६ इत्यस्य कृते निर्धारितम् अर्हतामानदण्डम् अतिक्रान्तवान्।
अष्टाविंशतिवर्षीयः नीरजः पृष्ठभागस्य आघातकारणात् दीर्घकालपर्यन्तं क्रीडाक्षेत्रात् बहिः आसीत्। स्पर्धायां तस्य प्रथमः प्रयासः निष्फलः अभवत्, किन्तु ततः परं सः स्वलयं प्राप्तवान् तथा तृतीयप्रयासे ८५.६९ मीटरपरिमितं कुन्तं प्रक्षिप्य तृतीयस्थानं प्राप्तवान्।
अनन्तरं चतुर्थप्रयासे तेन ८३.४५ मीटरपरिमितः प्रक्षेपः कृतः। अन्तिमचरणे स्थानं सुनिश्चितं कर्तुं तस्मै पञ्चमप्रयासे ८६ मीटराधिकं प्रक्षेपणम् आवश्यकम् आसीत्, किन्तु अयमपि प्रयासः निष्फलः अभवत्, फलतः सः चतुर्थस्थाने पतितः।
यद्यपि नीरजः स्वस्य पुनरागमनं स्मरणीयविजये परिणमयितुं न शक्तवान्, तथापि तस्य सर्वोत्तमः ८५.६९ मीटरपरिमितः प्रक्षेपः राष्ट्रमण्डलक्रीडा-२०२६ इत्यस्य कृते निर्धारितात् ८२.६१ मीटरपरिमितात् अर्हतामानदण्डात् श्रेष्ठः आसीत्।
स्पर्धायाः उपाधिं श्रीलङ्कादेशीयः क्रीडकः रुमेश-थरङ्ग-पथिरागे ८८.६८ मीटरपरिमितेन प्रक्षेपेण प्राप्तवान्। तेन सम्प्रतिकाले एव रोम-डायमण्ड-लीग-स्पर्धायां ९२.६२ मीटरपरिमितः उत्कृष्टः प्रक्षेपः कृतः आसीत्।
द्वितीयस्थानं ग्रेनेडादेशीयस्य क्रीडकस्य एण्डर्सनपीटर्सस्य अभवत्, येन ८६.३८ मीटरपरिमितः प्रक्षेपः कृतः। तथा अमेरिकादेशीयः क्रीडकः कर्टिसथॉम्प्सन् ८५.९९ मीटरपरिमितेन प्रक्षेपेण तृतीयस्थानं प्राप्तवान्।
दोहायां नीरजस्य पुनरागमनं भारतीय-क्रीडाजगतः कृते शुभसंकेतः मन्यते, अधुना च तस्य दृष्टिः अग्रिमेषु अन्ताराष्ट्रियस्पर्धासु उत्कृष्टतरप्रदर्शनस्य उपरि भविष्यति।
---------------
Hindusthan Samachar / अंशु गुप्ता