वॉशिङ्गटननगरम्, २० जूनमासः (हि.स.)। अमेरिकादेशस्य राष्ट्रपतिः डोनाल्ड-ट्रम्पः पुनरेकवारम् उक्तवान् यत् तस्य प्रशासनम् अद्यावधि अष्ट युद्धानि निरोद्धुं सफलम् अभवत्, किन्तु तेषु ईरान-सम्बद्धः सङ्घर्षः सर्वाधिकः समस्यापूर्णः आसीत्।

लेबनानस्य संवाद-समितेः राष्ट्रीयसमाचारसंस्थाया: तथा विभिन्न-माध्यम-प्रतिवेदनानुसारं ट्रम्पः अवदत् यत् तस्य प्रशासनस्य नीति: सैन्य-हस्तक्षेपस्य अपेक्षया कूटनीतिः, संवादः तथा राजनैतिक-समाधानम् इत्येतेषु आधृता आसीत्। तस्य मते दीर्घकालात् प्रवर्तमानानां सङ्घर्षाणां समाप्त्यर्थं कृतानां प्रयत्नानाम् उद्देश्यं मानवीय-आर्थिक-हानेः न्यूनीकरणं तथा प्रादेशिक-स्थैर्यस्य संवर्धनम् आसीत्।

राष्ट्रपतिः अमेरिकादेशस्य रक्षामन्त्रिणः सेनायाश्च प्रशंसाम् अकरोत्। सः अवदत् यत् युद्ध-सङ्कट-परिस्थितिषु ताभ्यां उत्कृष्टं कार्यं कृतम्। तेन अमेरिकीय-सशस्त्र-बलानां कार्यप्रणाली व्यावसायिक-प्रभावशालिनी चेति वर्णिता।

ट्रम्पः अस्मात् पूर्वम् अपि फ्रान्सदेशस्य एवियान-नगरे १५ तः १७ जूनपर्यन्तम् आयोजिते जी-७-शिखर-सम्मेलने भारतस्य प्रधानमन्त्रिण: नरेन्द्र-मोदिनः उपस्थितौ एतादृशमेव कथनम् अकरोत्। तेन उल्लिखितेषु अष्टसु सङ्घर्षेषु इज़राइल-ईरान-सङ्घर्षः, इज़राइल-हमास-सङ्घर्षः, सर्बिया-कोसोवो-विवादः, आर्मेनिया-अज़रबैजान-सङ्घर्षः, रवाण्डा-डेमोक्रेटिक-रिपब्लिक्-ऑफ्-काङ्गो-सङ्घर्षः, मिस्र-इथियोपिया-विवादः, थाईलैण्ड-कम्बोडिया-विवादः तथा भारत-पाकिस्तान-सङ्घर्षः अपि समाविष्टः।

ट्रम्पः अवदत् यत् ईरान-सम्बद्धः सङ्कटः अन्येभ्यः सर्वेभ्यः विवादेभ्यः अधिकः जटिलः आसीत्, यतः अस्मिन् विषये प्रादेशिक-अन्ताराष्ट्रिय-शक्तीनां हितानि सम्बद्धानि आसन्। अतः सर्वान् सहमत्याः समान-बिन्दुं प्रति नेतुम् अत्यन्तं कठिनम् आसीत्।

अमेरिकीय-राष्ट्रपतिः इज़राइलदेशेन सह स्वस्य अत्युत्तमान् सम्बन्धान् अपि उल्लेखितवान्। सः सऊदी-अरबदेशस्य, कतारदेशस्य तथा संयुक्त-अरब-अमीरात-देशस्य नेतृभ्यः कृतज्ञतां प्रकटयन् अवदत् यत् एतेषां राष्ट्रै: सह अमेरिकादेशस्य सम्बन्धाः अत्युत्तमाः सन्ति।

अन्यतः ट्रम्पस्य एतेषां कथनानां मध्ये अपि एषा चर्चा निरन्तरं प्रवर्तते यत् एतेषु सङ्घर्षेषु अमेरिकादेशस्य भूमिका वस्तुतः कियत् निर्णायिका आसीत् तथा एतेषां विवादानां स्थायी-समाधानं वस्तुतः प्राप्तम् अथवा न इति।

Hindusthan Samachar / Divya Ranjan