नवदेहली, २० जूनमासः (हि.स.)। केन्द्रीयः श्रम-रोजगारमन्त्री डॉ.मनसुख-माण्डविया शनिवासरे अवदत् यत् महिलाः भारतस्य विकासयात्रायाः केवलं सहभागिन्यः न, अपितु देशस्य भविष्यस्य वास्तविकाः निर्मातार: सन्ति।

नवदेहल्यां यशोभूमि-स्थले आयोजिते पञ्चमे नेशनल् रियल एस्टेट डेवलपमेण्ट काउन्सिल माही रियल एस्टेट् सम्मेलनं-२०२६ इत्यस्य उद्घाटनसमारोहे सम्बोधनं कुर्वन् माण्डविया एतद् उक्तवान्। सः अवदत् यत् २०४७ तमवर्षपर्यन्तं ‘विकसित-भारतस्य’ लक्ष्यं महिलानां पूर्ण-सहभागितां, नेतृत्वं तथा आर्थिक-योगदानं विना साधयितुं न शक्यते।

तेन पुनः प्रतिपादितं यत् महिलानां समभागित्वं विना विकसित-भारतस्य स्वप्नं साकारं कर्तुं न शक्यते। महिलाः आर्थिक-विकासस्य, सामाजिक-परिवर्तनस्य तथा राष्ट्रनिर्माणस्य प्रमुखाः प्रेरकशक्तयः सन्ति। ‘विकसित-भारत-२०४७’ इत्यस्य यात्रा महिलानां सक्रिय-सहभागितां, नेतृत्वं आर्थिक-योगदानं च विना पूर्णा न भविष्यति।

माण्डविया अवदत् यत् नारेडको माही इत्येतादृशाः उपक्रमाः अधुना केवलं चर्चायाः विषयाः न सन्ति, अपितु प्रभावशालिनः आन्दोलनस्य रूपं धारयन्ति। एते महिला-व्यावसायिकाभ्यः, उद्यमिनिभ्यः तथा परिवर्तनस्य वाहिकाभ्यः सशक्तं मञ्चं प्रददति। तेन उक्तम्— “महिलाः भारतस्य विकासगाथायाः केवलं सहभागिन्यः न, अपितु तस्याः वास्तविकाः निर्मातार: सन्ति।”

मन्त्री अवदत् यत् सम्मेलनस्य विषयः महिलानां कृते अवसराणां विस्तारस्य तथा परम्परागत-धारणानां परित्यागस्य आवश्यकतां प्रकाशयति। तेन उक्तम्— “यदा महिलाः नेतृत्वं कुर्वन्ति, तदा उद्योगाः विकसिताः भवन्ति, समाजः समृद्धः भवति, राष्ट्रं च अग्रे प्रसरति।”

श्रम-रोजगारमन्त्री सामाजिक-माध्यमे प्रकाशितसन्देशे अवदत् यत् सुदृढा निर्माणोद्योगव्यवस्था एव विकसित-भारतस्य आधारशिला अस्ति। अद्य भारत-बिल्डकॉन इत्यस्मिन् नारेडको ‘माही’ सम्मेलनस्य उद्घाटनं कृतम् तथा विविध-निर्माण-सामग्रीणाम् प्रदर्शनी-स्थलानां अवलोकनस्य अवसरः अपि प्राप्तः।

नारेडको माही इत्यस्य अध्यक्षा स्मिता-पाटिल: संस्थायाः पञ्चवर्षीय-यात्रां स्मरन्ती अवदत् यत् एषः उपक्रमः अधुना देशव्यापि स्थावर-सम्पत्ति-क्षेत्रे महिलानां नेतृत्वस्य सुदृढं जालं जातम्। संस्था कौशल-विकासे, मार्गदर्शने, उद्यमितायां, स्थायित्वे तथा सामुदायिक-सहभागितायां कार्यं करोति।

उल्लेखनीयं यत् ‘प्रभावात् प्रेरणां प्रति’ इति विषयम् आधारीकृत्य आयोजिते नारेडको माही रियल एस्टेट् सम्मेलनं-२०२६ इत्यस्मिन् स्थावर-सम्पत्ति-क्षेत्रे महिलानां सहभागितायाः नेतृत्वस्य च संवर्धने विशेषं बलं प्रदत्तम्।

Hindusthan Samachar / Divya Ranjan