अम्बिकापुरम्, 21 जूनमासः (हि.स.)।छत्तीसगढस्य सरगुजाजनपदस्य हृदयस्थली अम्बिकापुरम् अद्य अभूतपूर्वस्य ऐतिहासिकक्षणस्य साक्षी अभवत्, यत्र एकविंशतितमे जूनमासदिने अन्ताराष्ट्रिययोगदिवसस्य महाकार्यक्रमः सम्पूर्णभव्यतया सम्पन्नः। नगरस्य प्रतिष्ठिते पीजीकॉलेजक्रीडाक्षेत्रे आयोजिते अस्मिन् गरिमामये सामूहिकयोगकार्यक्रमे राज्यस्य मुख्यमन्त्री विष्णुदेवसाय मुख्यातिथिरूपेण उपस्थितः अभवत्।

प्रातःकालस्य प्रथमकिरणेन सह सम्पूर्णं क्रीडाक्षेत्रम् ऊर्जा उत्साहेन च परिपूर्णम् अभवत्, यदा विष्णुदेवसाय जनैः सह योगाभ्यासं कृतवान्। जिलाप्रशासनेन व्यापकस्तरे कृतानां सुदृढव्यवस्थानां परिणामस्वरूपम् अस्मिन् योगमहोत्सवे अपेक्षातः अधिकजनानां सहभागिता दृष्टा। प्रभातस्य शीतलवायुषु सहस्रशः आगताः नागरिकाः यदा एकस्वरेण एकतालेन एकलयेन च योगस्य विविधासनानां प्रदर्शनं कृतवन्तः, तदा सम्पूर्णम् अम्बिकापुरम् एकसूत्रे ग्रथितम् इव प्रतीतं जातम्।

अस्य महाकार्यक्रमस्य विशेषता एषा आसीत् यत् मुख्यमन्त्री विष्णुदेवसाय केवलं मञ्चात् औपचारिकतां न कृतवान्, अपितु सामान्यजनानां उत्साहं वर्धयन् योगं जीवनस्य अभिन्नाङ्गत्वेन स्वीकर्तुम् दृढसन्देशं दत्तवान्। सः पण्डाले उपस्थितं जनसमूहम् उद्दिश्य योगस्य बहून् लाभान् सरलशब्दैः प्रतिपादितवान्। मुख्यमन्त्री अवदत् यत् अद्यतनायां धावमानायां तनावपूर्णायां च जीवनशैल्यां योगः केवलं शारीरिकव्यायामः नास्ति, अपितु मानसिकशान्तेः आध्यात्मिकसन्तोषस्य च श्रेष्ठं साधनम् अस्ति। सः जनान् प्रेरयन् उक्तवान् यत् नियमितप्राणायामाभ्यासेन आसनाभ्यासेन च न केवलं शरीरस्य रोगप्रतिरोधकशक्तिः सुदृढा भवति, अपितु हृदयरोगेभ्यः, रक्तचापसमस्याभ्यः, मानसिकविषादादिभ्यः गम्भीरसमस्याभ्यश्च रक्षणं भवति। मुख्यमन्त्री विशेषरूपेण उक्तवान् यत् यदि वयं प्रतिदिनं किञ्चित्कालं स्वस्मै दास्यामः, तर्हि स्वस्थस्य ऊर्जावतः समाजस्य निर्माणं भविष्यति।

मुख्यमन्त्रिणः अस्य आत्मीयप्रयत्नस्य राज्यसरकारस्य जनकल्याणकारीनीतीनां च प्रभावेण छत्तीसगढे सामान्यनागरिकाणां कृते योगस्य स्वास्थ्यसुविधानां च प्राप्तिः अतीव सुगमा जाता। विष्णुदेवसाय एतस्मिन् विषये विशेषं बलम् अददात् यत् सरकारस्य मुख्योद्देशः योगं केवलं विशेषस्थानेभ्यः विशेषकार्यक्रमेभ्यश्च निष्कास्य दरिद्रजनानां, कृषकाणां, श्रमिकाणां, ग्राम्यजीवनस्य अन्तिमव्यक्तेः पर्यन्तं प्रापयितुम् अस्ति। एतदर्थं राज्यसरकारेण स्वास्थ्यकेन्द्रेभ्यः आरभ्य स्थानीयस्तरपर्यन्तं योगप्रशिक्षकाणां उपलब्धता सुलभा कृता, येन सामान्यजनाः कस्यापि आर्थिकभारस्य विना निःशुल्कं सम्यक् मार्गदर्शनं प्राप्नुयुः। जीवनं सरलम् आरोग्यपूर्णं च कर्तुं कृतः अयं शासकीयसंकल्पः जनानां मध्ये नूतनविश्वासं जनितवान्।

पीजीकॉलेजक्रीडाक्षेत्रे समुपस्थितः विशालः जनसमूहः अस्य तथ्यस्य प्रत्यक्षप्रमाणम् आसीत् यत् अधुना योगः छत्तीसगढस्य जनजीवने संस्काररूपेण प्रतिष्ठितः जातः। कार्यक्रमस्य अन्तिमचरणे यदा सहस्रशः हस्ताः एकत्र उत्थाप्य “सर्वे भवन्तु सुखिनः” इति प्रार्थना कृता, तदा सम्पूर्णं वातावरणं सकारात्मकऊर्जया परिपूर्णम् अभवत्। लघुबालकेभ्यः आरभ्य युवभ्यः वृद्धेभ्यश्च सर्वेषां उत्साहः दर्शनीयः आसीत्, ये मुख्यमन्त्रिणा सह पदे पदे मिलित्वा अस्य दिवसस्य अविस्मरणीयतां निर्मितवन्तः।

अनेन सफलेन भव्येन च आयोजनेन न केवलं सरगुजा, अपितु सम्पूर्णः छत्तीसगढः अपि देशस्य मानचित्रे योगक्रान्तेः नूतनकेन्द्ररूपेण प्रतिष्ठां प्राप्तवान्। समापनसमये प्रत्येकस्य मुखे एषः दृढसंकल्पः स्पष्टतया दृश्यते स्म यत् अद्यारभ्य आरोग्यरक्षणस्य एषा मुहिम् केवलम् एकदिवसीयोत्सवः न भविष्यति, अपितु वर्षस्य पञ्चषष्ट्यधिकत्रिशतदिनपर्यन्तं निरन्तरप्रवहन्ती जीवनशैली भविष्यति।

Hindusthan Samachar / Dheeraj Maithani