लखनऊ, 21 जूनमासः (हि.स.)।

अन्ताराष्ट्रिययोगदिवसस्य अवसरे रविवासरे सम्पूर्णे प्रदेशे विशेषकार्यक्रमाः आयोजिताः। एतेषु कार्यक्रमेषु प्रदेशस्य राज्यपालः, मुख्यमन्त्री, उपमुख्यमन्त्रिणौ, विधानसभाध्यक्षः, विधानपरिषदः सभापतिः तथा सरकारस्य सर्वे मन्त्रिणः पृथक्पृथक्जनपदेषु योगकार्यक्रमेषु सहभागित्वं कृतवन्तः।

राज्यपालः आनन्दीबेनपटेल जनभवने योगाभ्यासं कृतवती। अपरत्र मुख्यमन्त्री योगीआदित्यनाथः झाँसीदुर्गक्षेत्रे झाँसीनगरे योगाभ्यासं कृतवान्। अस्मिन्नवसरे मुख्यमन्त्री झाँसीनगरे आयुषविभागेन प्रकाशितायाः पत्रिकायाः विमोचनम् अपि कृतवान्। मुख्यमन्त्री प्रदेशवासिभ्यः योगदिवसस्य शुभकामनाः प्रदाय अवदत् यत् अद्य विश्वस्य द्विशताधिकेषु देशेषु जनाः योगस्य माध्यमेन परस्परं सम्बद्धाः भवन्ति।

प्रधानमन्त्रिणः नरेन्द्रमोदिनः दृष्टिकोणानुरूपं वयं पुनः स्वविरासतां प्रति गौरवस्य अनुभूतिं कुर्मः। अस्मिन् कार्यक्रमे स्थानीयजनप्रतिनिधिभिः सह सामाजिकसाहित्यिकसांस्कृतिकराजनीतिकसङ्गठनानां कार्यकर्तारः अपि सम्मिलिताः आसन्।

उपमुख्यमन्त्री केशवप्रसादमौर्यः प्रयागराजस्य त्रिवेणीसङ्गमनोजस्थले प्रातः सप्तवादने सामान्यजनैः सह योगाभ्यासकार्यक्रमे सहभागित्वं कृतवान्। उपमुख्यमन्त्री बृजेशपाठकः लखनऊनगरस्य दरेजिडेन्सीपार्के तथा मैक्सहस्पिटले योगदिवसावसरे आयोजितेषु कार्यक्रमेषु सम्मिलितः अभवत्। रेजिडेन्सीपार्के लखनऊनगरे योगाभ्यासानन्तरं उपमुख्यमन्त्री बृजेशपाठकः अवदत् यत् योगः केवलम् अभ्यासः नास्ति, अपितु स्वस्थशरीरस्य शान्तमनसः सन्तुलितजीवनस्य च आधारः अस्ति। योगः अस्माकं भारतीयप्राचीनपरम्परायाः अभिन्नाङ्गम् अस्ति। योगः शरीरमनसोः मध्ये सामञ्जस्यस्थापनस्य शाश्वतं साधनम् अस्ति, यस्य नियमिताभ्यासेन मनुष्ये नूतना आत्मचेतना जागरिता भवति।

अस्मिन्नवसरे विधानपरिषदः सदस्यः उमेशद्विवेदी, लखनऊजनपदस्य जिलाधिकारी विशाखः तथा अन्ये गण्यमान्यजनाः उपस्थिताः आसन्।

भारतीयजनतापक्षस्य प्रदेशमहामन्त्री सङ्गठनप्रमुखः धर्मपालसिंहः लखनऊनगरस्य राजाजीपुरमक्षेत्रे द्वादशे अन्ताराष्ट्रिययोगदिवसे क्षेत्रस्य सम्मानितनागरिकैः सह सामूहिकयोगाभ्यासं कृतवान्। अस्मिन्नवसरे धर्मपालसिंहः अवदत् यत् योगः केवलं शारीरिकव्यायामः नास्ति, अपितु भारतीयसंस्कृतेः आध्यात्मिकतायाः जीवनदर्शनस्य च अमूल्योपहारः अस्ति, यः शरीरमनसोरात्मनश्च मध्ये सन्तुलनं स्थापयति।

अद्य विश्वस्य कोटिशः जनाः योगं स्वजीवनशैल्याः अङ्गत्वेन स्वीकृत्य स्वस्थसकारात्मकजीवनस्य दिशि अग्रसरन्ति। देशस्य प्रधानमन्त्रिणः नरेन्द्रमोदिनः सततप्रयत्नानां परिणामस्वरूपं योगाय वैश्विकी मान्यता प्राप्ता तथा च अद्य एषः भारतस्य सांस्कृतिकविरासतारूपेण विश्वस्य सर्वेषु कोणेषु प्रसारितः अस्ति।

तेन उक्तं यत् योगः न केवलं व्यक्तिगतस्वास्थ्यस्य आधारः अस्ति, अपितु सशक्तस्य स्वस्थस्य आत्मनिर्भरस्य राष्ट्रस्य निर्माणे अपि महत्त्वपूर्णं साधनम् अस्ति। वयं सर्वे नियमितयोगाभ्यासं स्वजीवनस्य अभिन्नाङ्गत्वेन स्वीकृत्य स्वस्थभारतस्य सशक्तभारतस्य च निर्माणे योगदानं दद्मः।

---------------

Hindusthan Samachar / Dheeraj Maithani