जबलपुरम्, 21 जूनमासः (हि.स.)।

मध्यप्रदेशस्य राज्यपालः मङ्गुभाईपटेलः वीराङ्गनां महाराणीं रानीदुर्गावतीं प्रणम्य उक्तवान् यत् तस्याः जीवनं जनजातीयास्मितायाः, प्रजाकल्याणस्य, नारीशक्तेः, त्यागस्य, पराक्रमस्य, नेतृत्वक्षमतायाः तथा आत्मगौरवस्य अमरः सन्देशः अस्ति। तेन उक्तं यत् रानीदुर्गावती अद्यापि जनजातीयसमुदायस्य सहितं देशस्य प्रत्येकायाः कन्यायाः युवसन्ततेः च प्रेरणाकेन्द्रम् अस्ति।

राज्यपालः पटेलः रविवासरे जबलपुरे रानीदुर्गावतीविश्वविद्यालयस्य षट्त्रिंशत्तमे दीक्षान्तसमारोहे सम्बोधनं कुर्वन् आसीत्। तेन उक्तं यत् विश्वविद्यालयस्य षट्त्रिंशत्तमः दीक्षान्तसमारोहः राष्ट्रपतेः द्रौपदीमुर्मु महोदयायाः मुख्यातिथ्ये सम्पन्नः अभवत्, एतत् अस्माकं सर्वेषां कृते अत्यन्तं गौरवस्य विषयः अस्ति।

राज्यपालेन दीक्षान्तसमारोहे उपस्थितेभ्यः छात्रछात्राभ्यः उक्तं यत् तेषां उपाधिः केवलं वैयक्तिकी उपलब्धिः नास्ति, अपितु विकसितभारतनिर्माणस्य, नवाचारस्य तथा राष्ट्रस्य उज्ज्वलभविष्यस्य निर्माणकर्त्री शक्तिः अस्ति। तेन विद्यार्थिनः आहूताः यत् ते रानीदुर्गावत्याः सहितं देशस्य महान् जननायकानां शौर्यात्, लोककल्याणात् तथा संघर्षपूर्णजीवनात् प्रेरणां गृहीत्वा समाजस्य प्रति स्वकर्तव्यस्य निष्ठया निर्वहनं कुर्वन्तु।

तेन प्रत्येकविश्वविद्यालयं पञ्च पञ्च पश्चाद्वर्तिग्रामान् दत्तकरूपेण स्वीकर्तुं आग्रहः कृतः। तेन उक्तं यत् विद्यार्थी स्वयम् एतेषु ग्रामेषु गत्वा तत्रत्याः परिस्थितयः अवगच्छेयुः तथा अनुभवेयुः यत् जनजातीयसमाजस्य ग्रामीणक्षेत्राणां च विकासार्थं केषु केषु क्षेत्रेषु कार्यस्य आवश्यकता अस्ति। अनेन विद्यार्थिषु समाजसेवाभावनायाः, संवेदनशीलतायाः तथा उत्तरदायित्वस्य विकासः भविष्यति।

राज्यपालः पटेलः उक्तवान् यत् केन्द्रसर्वकारस्य अनेकाः जनकल्याणकारीयोजनाः समाजस्य अन्तिमव्यक्तिपर्यन्तं लाभप्रदानस्य उद्देशेन सञ्चाल्यन्ते। तेन पीएमजनमनयोजना, धरतीआबाग्रामोत्कर्षयोजना इत्यादीनां विविधयोजनानां उल्लेखं कृत्वा उक्तं यत् एतासां कृते सहस्रकोटिरूप्यकाणां प्रावधानं कृतम् अस्ति। तेन विद्यार्थिभ्यः आग्रहः कृतः यत् ते स्वक्षेत्राणां तहसीलक्षेत्राणां च विकासमानचित्रनिर्माणे सहयोगं कुर्वन्तु, येन जनजातीयविकासेन आधारभूतसुविधाभिः सम्बद्धानि कानि कार्याणि अद्यापि अवशिष्टानि सन्ति इति स्पष्टं ज्ञायेत। अनेन प्रत्येकस्मै दरिद्राय आवश्यकतायुक्ताय जनजातीयपरिवाराय शासनस्य योजनानां लाभः प्रभावकररूपेण प्रापयितुं शक्यते।

राज्यपालेन विद्यार्थिभ्यः उक्तं यत् तेषां मातापितरौ तान् संस्कारान् प्रदत्तवन्तौ, तेषां पालनपोषणं कृतवन्तौ तथा विश्वविद्यालयेन तेषां शिक्षायाः प्रगतये च अवसरः प्रदत्तः। अधुना तेषां दायित्वम् अस्ति यत् ते स्वमूलानि समाजं च कदापि न विस्मरन्तु तथा राष्ट्रनिर्माणे सक्रियसहभागितां कुर्वन्तु। तेन विश्वासः व्यक्तः यत् विद्यार्थी स्वजीवने सफलतां प्राप्स्यन्ति तथा समाजस्य कृते अपि उपयोगिनः सिद्धाः भविष्यन्ति। तेन उक्तं यत् यदा विद्यार्थिनां जीवनस्य नूतनः अध्यायः प्रारभ्यते तदा कालस्य अपेक्षा अस्ति यत् ते महाराण्याः रानीदुर्गावत्याः प्रेरणां स्वजीवने आत्मसात् कुर्वन्तु तथा लोकतान्त्रिकमूल्यानि, नारीसशक्तीकरणं तथा विकसितभारतस्य सङ्कल्पं स्वजीवनस्य ध्येयरूपेण स्वीकृत्य राष्ट्रस्य उन्नत्यै स्वश्रेष्ठं योगदानं ददतु।

रानीदुर्गावतीविश्वविद्यालयः शिक्षायाः अनुसन्धाने नवाचारे च क्षेत्रे नवीनाः उन्नतयः प्राप्स्यति इति मुख्यमन्त्री।

मुख्यमन्त्री डॉ यादवः उक्तवान् यत् देशस्य सर्वोच्चसंवैधानिकपदे आसीनायाः राष्ट्रपतेः द्रौपदीमुर्मु महोदयायाः गरिमामयी उपस्थितिः रानीदुर्गावतीविश्वविद्यालयस्य षट्त्रिंशत्तमं दीक्षान्तसमारोहं अधिकं गौरवशालिनं कृतवती। अयं अवसरः केवलं विश्वविद्यालयस्य न, अपितु समग्रमध्यप्रदेशस्य कृते अपि गौरवस्य विषयः अस्ति। तेन उक्तं यत् रानीदुर्गावतीविश्वविद्यालयः केवलं उच्चशिक्षायाः संस्थानं नास्ति। एतत् वीरतायाः, स्वाभिमानस्य तथा बलिदानस्य तस्याः गौरवशालिपरम्परायाः प्रतीकं अस्ति, यां अमरा वीराङ्गना रानीदुर्गावती स्वसाहसेन अदम्यपराक्रमेण च प्रतिष्ठापितवती।

तेन उक्तं यत् रानीदुर्गावती मुगलसम्राटः अकबरस्य विशालसेनायाः विरुद्धं अनेकानि युद्धानि कृत्वा असाधारणवीरतायाः परिचयं दत्तवती तथा मातृभूमेः स्वतन्त्रतायाः सम्मानस्य च रक्षणार्थं स्वप्राणान् समर्प्य आगामिपीढीनां कृते अमरप्रेरणायाः उदाहरणं प्रस्तुतवती। तेन विश्वासः व्यक्तः यत् रानीदुर्गावतीविश्वविद्यालयः शिक्षा, अनुसन्धनं तथा नवाचारक्षेत्रे नवीनाः उन्नतयः प्राप्स्यति। अत्रतः निर्गच्छन्त्यः प्रतिभाः देशस्य समाजस्य च विकासे महत्त्वपूर्णं योगदानं दास्यन्ति।

मुख्यमन्त्री डॉ यादवः उक्तवान् यत् अद्य विश्वविद्यालयस्य छात्रछात्राः स्वप्रतिभया उत्कृष्टप्रदर्शनेन च प्रदेशस्य नाम राष्ट्रीयस्तरे गौरवान्वितं कुर्वन्ति। तेन प्रसन्नता व्यक्ता यत् अनेकैः विद्यार्थिभिः एकस्मात् अधिकाः स्वर्णपदकाः प्राप्ताः, यत् प्रदेशे गुणवत्तायुक्तशिक्षायाः शैक्षणिकोत्कृष्टतायाः च प्रमाणम् अस्ति। विशेषरूपेण छात्रीणाम् उपलब्धीनां प्रशंसां कुर्वन् तेन उक्तं यत् पुत्रीणां सफलता केवलं परिवारस्य न, अपितु सम्पूर्णसमाजस्य प्रदेशस्य च गौरवस्य विषयः अस्ति।

तेन उक्तं यत् प्रधानमन्त्रिणः नरेन्द्रमोदिनः नेतृत्वे भारतं विकासस्य नवीनान् आयामान् स्थापयति तथा मध्यप्रदेशः अपि शिक्षाक्षेत्रे निरन्तरं प्रगतिं करोति। तेन सूचितं यत् प्रदेशे उच्चशिक्षायाः सकलनामाङ्कनदरः राष्ट्रियमाध्यात् अधिकः भूत्वा अष्टाविंशतिदशमलव नव प्रतिशतपर्यन्तं प्राप्तः। विद्यालयशिक्षाक्षेत्रे अध्ययनत्यागदरं शून्यस्य समीपं नेतुं प्रयत्नाः सफलाः अभवन्। प्रदेशसर्वकारेण त्रयाणां नवीनानां शासकीयविश्वविद्यालयानां स्थापनायै महत्त्वपूर्णा पहल कृता अस्ति।

मुख्यमन्त्री उक्तवान् यत् राज्यसर्वकारः युवभ्यः गुणवत्तायुक्तां तकनीकीं रोजगारोन्मुखीं च शिक्षां प्रदातुं प्रतिबद्धः अस्ति। तेन उक्तं यत् कृषिप्रधानराज्यत्वात् प्रदेशे कृषिकल्याणवर्षस्य अन्तर्गतं कृषि तथा व्यावसायिकशिक्षया सह नवाचाराधारिताध्ययनं विशेषरूपेण प्रोत्साह्यते, येन युवानः आधुनिकप्रौद्योगिक्याः माध्यमेन आत्मनिर्भराः भूत्वा राष्ट्रनिर्माणे प्रभावकरां भूमिकां निर्वहितुं शक्नुयुः।

कार्यक्रमस्य प्रारम्भः राष्ट्रगीतेन, राष्ट्रगानेन तथा दीपप्रज्वलनेन अभवत्। ततः परं कुलगुरुः प्रो डॉ राजेशकुमारवर्मा स्मृतिचिह्नं समर्प्य राष्ट्रपतिं, राज्यपालं, मुख्यमन्त्रिणं तथा उच्चशिक्षामन्त्रिणं स्वागतं कृतवान्। स्वागतभाषणे कुलगुरुणा विश्वविद्यालयस्य उपलब्धीनाम् उल्लेखः कृतः। तेन उक्तं यत् विश्वविद्यालयेन प्रथमवारं एनएएसी संस्थातः ए प्लस श्रेणी प्राप्ता, यत् संस्थानस्य कृते गौरवस्य विषयः अस्ति। कार्यक्रमे उच्चशिक्षामन्त्री इन्दरसिंहपरमारः, अन्ये जनप्रतिनिधयः, प्रशासनिकाधिकारिणः तथा बहुसंख्यकाः विद्यार्थिनः उपस्थिताः आसन्।

---------------

Hindusthan Samachar / Dheeraj Maithani