पलवलम्, 21 जूनमासः (हि.स.)।

अन्ताराष्ट्रिययोगदिवसस्य अवसर उपलक्ष्ये रविवासरे पलवलस्य नेताजी सुभाषचन्द्रबोस क्रीडापरिसरे जिलास्तरीययोगकार्यक्रमस्य भव्यं आयोजनम् अभवत्। कार्यक्रमे केन्द्रीयराज्यमन्त्री कृष्णपाल गुर्जर मुख्यातिथिरूपेण उपस्थितः अभवत् तथा जनैः सह सामूहिकयोगाभ्यासं कृत्वा योगं जीवनस्य अभिन्नाङ्गत्वेन स्वीकर्तुं सन्देशं प्रदत्तवान्। स्वसम्बोधने केन्द्रीयराज्यमन्त्री कृष्णपाल गुर्जर उक्तवान् यत् योगः भारतस्य प्राचीनऋषिपरम्परायाः अमूल्या देनम् अस्ति।

योगः व्यक्तिं शारीरिकरूपेण, मानसिकरूपेण तथा आध्यात्मिकरूपेण सशक्तं करोति। सः उक्तवान् यत् अद्य विश्वस्य अनेके देशाः योगस्य महत्त्वं स्वीकुर्वन्ति तथा च तं स्वस्थजीवनस्य आधाररूपेण स्वीकरोन्ति। तेन नागरिकान् प्रतिदिनं योगाभ्यासं कर्तुं तथा स्वपरिवारं समाजं च योगस्य प्रति जागरूकं कर्तुम् आह्वानं कृतम्। कार्यक्रमे योगप्रशिक्षकाणां निर्देशनाधीनं उपस्थितजनैः प्राणायामः, ताडासनम्, वृक्षासनम्, भुजङ्गासनम्, वज्रासनम् इत्यादीनां विविधयोगक्रियाणाम् अभ्यासः कृतः। सम्पूर्णे परिसरे उत्साहस्य अनुशासनस्य च वातावरणं दृष्टिगोचरम् अभवत्। विद्यार्थिनः, युवानः, महिलाः, सामाजिकसङ्गठनानां प्रतिनिधयः तथा विविधविभागानां अधिकारिणः कर्मचारिणश्च उत्साहेन सहभागिनः अभवन्।

अस्मिन् अवसरे पलवलस्य उपायुक्तः जितेन्द्र छिल्लर, पुलिस अधीक्षकः नितिन सिङ्गला, पूर्वविधायकः दीपक मंगला, पूर्वमन्त्री सुभाष कत्याल इत्यादयः भारतीयजनतापक्षस्य अनेकाः वरिष्ठनेतारः, जनप्रतिनिधयः तथा प्रशासनिकाधिकारिणः उपस्थिताः आसन्। उपस्थितवक्तारः उक्तवन्तः यत् योगः केवलं व्यायामः नास्ति, अपितु जीवनयापनस्य श्रेष्ठा पद्धतिः अस्ति। नियमितयोगाभ्यासेन तनावः न्यूनीभवति, रोगप्रतिरोधकक्षमता वर्धते तथा व्यक्तिः स्वस्थं सन्तुलितं च जीवनं यापयितुं शक्नोति।

अस्मिन् जिलास्तरीये आयोजने बहुसंख्यकानां जनानां सहभागितया एतत् सिद्धं जातम् यत् योगस्य प्रति जनमानसे जागरूकता निरन्तरं वर्धमाना अस्ति। कार्यक्रमस्य अन्ते सर्वे प्रतिभागिनः नियमितयोगाभ्यासं कर्तुं स्वस्थजीवनशैलीं च स्वीकर्तुं संकल्पं कृतवन्तः।

---------------

Hindusthan Samachar / Dheeraj Maithani