अमृतसरम्, 21 जूनमासः (हि.स.)। द्वादशमस्य अन्ताराष्ट्रिययोगदिवसस्य अवसर उपलक्ष्ये भारतपाकिस्तानसीम्नि स्थिते वाघा अटारी संयुक्तपरीक्षणकेन्द्रे सीमा सुरक्षा बलस्य जवानैः योगाभ्यासः कृतः तथा देशवासिभ्यः स्वास्थ्यस्य, अनुशासनस्य तथा मानसिकसन्तुलनस्य सन्देशः प्रदत्तः। अस्मिन् अवसरे सीम्नि विशेषयोगशालायाः आयोजनम् अभवत्, यस्मिन् बहुसंख्यकाः सीमा सुरक्षा बलस्य अधिकारिणः, जवानाः तथा स्थानीयजनाः सहभागी अभवन्।

योगसत्रस्य प्रारम्भः प्रातःकाले सामूहिकप्रार्थनया अभवत्। जवानैः सूर्यनमस्कारः, ताडासनम्, अनुलोमविलोमः, कपालभातिः, भ्रामरी तथा अन्यानि योगासनानि अभ्यस्तानि। कार्यक्रमस्य उद्देश्यं जवानान् शारीरिकरूपेण स्वस्थाञ् स्थापयितुं तथा मानसिकरूपेण अपि सशक्तान् कर्तुम् आसीत्।

सीमा सुरक्षा बलस्य अधिकारिणः उक्तवन्तः यत् सीमासु चतुर्विंशतिघण्टाः देशस्य सुरक्षायां नियुक्तानां जवानानां कृते योगः तनावनिवारणस्य मानसिकैकाग्रतावर्धनस्य च प्रभावी माध्यमम् अस्ति। योगः न केवलं शरीरं स्वस्थं धारयति, अपितु कठिनपरिस्थितिषु अपि सकारात्मकचिन्तनस्य आत्मविश्वासस्य च संरक्षणे साहाय्यं करोति। अस्मिन् अवसरे सीमाक्षेत्रस्य युवानः अपि उत्साहपूर्वकं योगकार्यक्रमे सहभागी अभवन्।

योगप्रशिक्षकैः उपस्थितजनान् विविधयोगासनानां तेषां स्वास्थ्यलाभानां च विषये जानकारी प्रदत्ता। तैः उक्तं यत् नियमितयोगाभ्यासः अनेकाभ्यः गम्भीररोगेभ्यः संरक्षणं ददाति तथा जीवनशैलीं परिष्कर्तुम् अपि साहाय्यं करोति। सीमा सुरक्षा बलस्य पञ्जाब फ्रण्टियर इत्यस्य वरिष्ठाधिकारिणः उक्तवन्तः यत् योगः केवलं शारीरिकक्रिया नास्ति, अपितु सम्पूर्णजीवनपद्धतिः अस्ति। एतेन अनुशासनम्, आत्मविश्वासः तथा मानसिकसन्तुलनम् विकसितं भवति, यत् सीमासु नियुक्तानां जवानानां कृते अत्यन्तम् आवश्यकम् अस्ति।

कार्यक्रमस्य समये एका पृथ्वी एकं स्वास्थ्यं एकः संकल्पः योगः तथा योगेन शक्तिः योगेन सुरक्षा इति सन्देशः अपि प्रदत्तः। अधिकारिणः उक्तवन्तः यत् भारतस्य सीमाः केवलं आयुधैः एव न सुदृढाः भवन्ति, अपितु अनुशासनेन, संयमेन तथा स्वस्थजीवनशैल्या अपि सुदृढीभवन्ति।

कार्यक्रमस्य अन्ते सामूहिकप्रार्थना कृता तथा सर्वे प्रतिभागिनः नियमितरूपेण योगस्य स्वीकरणस्य संकल्पं कृतवन्तः। सीमा सुरक्षा बलस्य अधिकारिणः उक्तवन्तः यत् योगः भारतस्य प्राचीनसांस्कृतिकविरासतायाः अंशः सन् अधुना विश्वशान्तेः, स्वास्थ्यस्य तथा मानवकल्याणस्य सार्वभौमिकं माध्यमं जातम् अस्ति।----------------

Hindusthan Samachar / Dheeraj Maithani