यमुनानगरम्, 21 जूनमासः (हि.स.)यमुनानगरे द्वादशस्य अन्ताराष्ट्रिययोगदिवसस्य अवसरे जगाधरीस्थितायाम् अन्नमण्ड्यां आयोजिते जिलास्तरीये योगसमारोहे बहुसंख्यकाः जनाः सहभागित्वा योगस्य प्रति स्वप्रतिबद्धतां जागरूकतां च प्रदर्शितवन्तः। कार्यक्रमे राज्यसभायाः सांसदः रेखाशर्मा मुख्यातिथिरूपेण उपस्थितवती। तया सह प्रशासनिकाधिकारिणः, जनप्रतिनिधयः, शिक्षणसंस्थानानां प्रतिनिधयः, विद्यार्थिनः तथा विविधसामाजिकसङ्गठनेभ्यः सम्बद्धाः जनाः अपि सम्मिलिताः आसन्।

समारोहं सम्बोधयन्ती रेखाशर्मा अवदत् यत् योगः भारतस्य सांस्कृतिकविरासतायाः तादृशम् अमूल्यम् आयामम् अस्ति, येन वैश्विकस्तरे मानवस्वास्थ्याय जीवनशैल्यै च नूतना दिशा प्रदत्ता। तया उक्तं यत् योगः शारीरिकसुदृढतायाः सह मानसिकैकाग्रतायाः, भावनात्मकसन्तुलनस्य, आध्यात्मिकशान्तेश्च प्रभावी साधनम् अस्ति। तया उक्तं यत् प्रधानमन्त्रिणः नरेन्द्रमोदिनः प्रयत्नैः योगाय अन्ताराष्ट्रियमञ्चे अभूतपूर्वा मान्यता प्राप्ता तथा च अद्य वैश्विकसमुदायः एनं स्वस्थजीवनस्य महत्त्वपूर्णपद्धतिरूपेण स्वीकरोति।

सांसदा नागरिकान् योगं दैनिकजीवनस्य अभिन्नाङ्गत्वेन स्वीकर्तुम् आह्वयन्ती अवदत् यत् नियमिताभ्यासेन मनुष्यः निरोगः, ऊर्जावान्, सकारात्मकचिन्तनयुक्तश्च भवितुम् अर्हति।

कार्यक्रमस्य समये प्रशिक्षितयोगविशेषज्ञानां निर्देशनाधीने सहभागिभिः विविधयोगासनानि, प्राणायामाः, ध्यानसम्बद्धाः अभ्यासाश्च कृताः। युवानः, महिलाः, विद्यार्थिनः तथा वरिष्ठनागरिकाः पूर्णोत्साहेन अनुशासनेन च योगसत्रे सहभागित्वं कृतवन्तः।

समारोहे विद्यार्थिभिः प्रदर्शिताः योगप्रदर्शनाः विशेषाकर्षणस्य केन्द्रम् अभवन्। एताभिः प्रस्तुतिभिः स्वास्थ्यस्य, अनुशासनस्य, सन्तुलितजीवनशैल्याः च महत्त्वं प्रभावीरीत्या प्रतिपादितम्।

कार्यक्रमस्य माध्यमेन स्वस्थसमाजस्य, मानसिकजागरूकतायाः, सकारात्मकजीवनमूल्यानां च संवर्धनस्य सन्देशः अपि प्रदत्तः। अनेन आयोजनेन स्पष्टतया प्रदर्शितं यत् योगः केवलं शारीरिकव्यायामपर्यन्तं सीमितः नास्ति, अपितु समग्रजीवनं सन्तुलितं सार्थकं च कर्तुं समर्था व्यापकजीवनपद्धतिः अस्ति।

---------------

Hindusthan Samachar / Dheeraj Maithani